រាជធានីភ្នំពេញ ៖ អាជ្ញាធរប្រទេសវៀតណាមបានចាប់នារីខ្មែរ៣នាក់ ប្រគល់ឲ្យសមត្ថកិច្ចនាយកដ្ឋានប្រឆាំងការជួញដូរមនុស្ស និងការពារអនីតិជនកម្ពុជា បន្ទាប់ពីពួកគេត្រូវបានមេខ្យល់នាំឆ្លងដែន ទៅប្រកបអាជីវកម្មពរពោះជំនួស ដើម្បីនាំកូនចេញទៅប្រទេសចិន ។
នាព្រឹកថ្ងៃទី១៦ កក្កដា កម្លាំងសមត្តកិច្ចបាននាំខ្លួនស្ត្រីទាំង៣ទៅកាន់សាលាដំបូងរាជធានីភ្នំពេញ ដើម្បីធ្វើការសាកសួរ និងចោទប្រកាន់ជាផ្លូវការ ។ ស្ត្រីទាំង៣អាយុ៣២ឆ្នាំ ២នាក់ និងម្នាក់អាយុ៣១ឆ្នាំ ។ ស្ត្រីទាំង៣នេះនៅក្នុងភូមិតែមួយក្នុងស្រុកអង្គស្នួល ខេត្តកណ្តាល ។ សំណុំរឿងនារីពរពោះជំនួសទាំង៣នាក់ កំពុងស្ថិតនៅដំណាក់ការអយ្យការអមសាលាដំបូងសាកសួរនៅឡើយ និងមិនទាន់ដឹងថាមានការសម្រេចបែបណានៅឡើយទេ ។
ដើមចមជុំវិញករណីពរពោះជំនួសខាងលើនេះ យោងតាមចម្លើយសារភាពរបស់ស្ត្រីម្នាក់នៅមុខសមត្ថកិច្ចឲ្យដឹងថា ក្នុងអំឡុងខែតុលា ឆ្នាំ២០១៨ នាងបានទៅផ្ទះស្ត្រីម្នាក់ទៀត ដែលស្ថិតនៅភូមិជាមួយគ្នា ពេលនោះគេបាននិយាយបញ្ចុះបញ្ជូលនាងឲ្យទៅរកស៊ីមុខរបរប្រកបការងារពរពោះជំនួសឲ្យជនជាតិចិននៅភ្នំពេញ ដែលនឹងទទួលបានប្រាក់ចំនួន៨០០០ដុល្លារអាមេរិក ពេលបង្កើតបានទារកម្នាក់ ។
លុះដល់ថ្ងៃទី១១ ខែតុលា ឆ្នាំ២០១៨ គេក៏បាននាំនាងមកភ្នំពេញដើម្បីជួបមេខ្យល់ជាជនជាតិចិន ដែលមានគ្នា៧នាក់ធ្វើកិច្ចការនេះ ។ ដល់ថ្ងៃទី២៥ ខែតុលា ២០១៨ មេខ្យល់បានយកក្រុមគ្រូពេទ្យចិនមកពិនិត្យប្រដាប់បន្តពូជ ហើយក៏ដាក់បញ្ចូលមេជីវិតទៅក្នុងស្បូន រួចបានឲ្យលុយកាក់មួយចំនួនសម្រាប់ចាយវាយបណ្តោះអាសន្ន និងថែរក្សាសុខភាព ។
បន្ទាប់មកនាងក៏មានផ្ទៃពោះ រហូតដល់ថ្ងៃទី១២ មិថុនា ឆ្នាំ២០១៩ មេខ្យល់បាននាំនាងធ្វើដំណើរទៅកាន់ប្រទេសវៀតណាម ដើម្បីឆ្លងដែនទៅផ្តល់កំណើតឱ្យកូននៅប្រទេសចិន ដែលមេខ្យល់បានឲ្យប្រាក់នាងបន្ថែម២ ០០០ដុល្លារអាមេរិកទៀត ។ នៅថ្ងៃទី២៩ ខែមិថុនា ឆ្នាំ២០១៩ ពេលទៅដល់ប្រទេសវៀតណាម នាងបានជួបស្ត្រីចិន២នាក់ ទារកម្នាក់ និងស្ត្រីខ្មែរម្នាក់ទៀតដែលមេខ្យល់បានបញ្ជូនឲ្យទៅតាមជួយមើលថែទាំទារក និងអ្នកពរពោះ ។
ការធ្វើដំណើរទៅដល់ច្រកទ្វារបាវិតក៏មានបុរសជនជាតិចិនម្នាក់ជាអ្នករត់ការ និងចេញសោហ៊ុយគ្រប់បែបយ៉ាងទាំងអស់ ។ បន្ទាប់មកពួកគេបានបន្តដំណើរតាមរថយន្តតាក់សុី រហូតដល់ចំណតរថភ្លើងទីក្រុងហូជីមិញ និងមានតម្រូវចំណាយពេល២ថ្ងៃ២យប់ទៀតទើបទៅដល់ទីក្រុងហាណូយ ដែលនៅទីនោះ មានជនជាតិចិនមួយក្រុមទៀតចាំទទួល និងរៀបចំបែបបទឆ្លងដែនទៅកាន់ប្រទេសចិន ក៏ត្រូវសមត្ថកិច្ចវៀតណាមចាប់ខ្លួនទាំងអស់ ក្នុងនោះមាននារីខ្មែរ៣នាក់ មានចិន និងវៀតណាម តែពួកគេត្រូវបានអាជ្ញាធរវៀតណាមចាប់បញ្ជូនទៅតាមប្រទេសរៀងៗខ្លួន ។
លុះថ្ងៃទី៩ ខែកក្កដា ឆ្នាំ២០១៩ ខណៈពេលដែលសមត្ថកិច្ចវៀតណាម កំពុងឃុំខ្លួនបណ្ដោះអាសន្នស្រាប់តែនារីម្នាក់ឈឺពោះសម្រាលបានកូនស្រីម្នាក់ ។ លុះថ្ងៃទី១៣ ខែកក្កដាឆ្នាំ២០១៩ អាជ្ញាធរវៀតណាមបានសម្រេចបញ្ជូននាងទាំង៣នាក់ និងទារកមកប្រទេសកម្ពុជាវិញ ។ មន្ត្រីនគរបាលនាយកដ្ឋានប្រឆាំងការជួញដូរមនុស្ស និងការពារអនីតិជនក្រសួងមហាផ្ទៃ បានបង្ហើបឲ្យដឹងថា សំណុំរឿងពរពោះជំនួស ដែលក្រុមឈ្មួញទុច្ចរិតបានប្រព្រឹត្តនេះ ពិតជាមានគោលដៅច្បាស់លាស់ ដើម្បីនាំម្តាយទៅយកទារកចេញទៅក្រៅប្រទេស ដែលជាបទល្មើសខុសច្បាប់ប្រាកដមែន ។ លោកថា ដូច្នេះតំណាងអយ្យការអមសាលាដំបូងរាជធានីភ្នំពេញ និងធ្វើការចោទប្រកាន់ជនសង្ស័យតាមនីតិវិធី ៕ (សម្រួលដោយ៖ ស្រីណា)
ចែករំលែកព័តមាននេះ