មិនថាអ្នកបួសឬគ្រហស្ថសុទ្ធតែជាអ្នកប្រាថ្នាសេចក្តីសុខ ចង់បានកិត្តិយសដូចគ្នា បើទោះជាទាំងពីរភេទនេះមានកិច្ចប្រតិបត្តិផ្សេងគ្នាក៏ដោយ ។
សេចក្តីសុខ និងភាពថ្លៃថ្នូររបស់គ្រហស្ថតាំងនៅបានលុះណាតែបុគ្គលនោះជាអ្នកប្រកបការងារត្រឹមត្រូវ ចិញ្ចឹ មជីវិតដោយសម្មាអាជីវោ បណ្តុះចិត្តក្នុងការបរិច្ចាគទាន អប់រំកាយវាចាចិត្តឱ្យប្រព្រឹត្តតែក្នុងអំពើល្អ និងវៀរចាកអំពើអាក្រក់ចោលទាំងអស់ ទើបបាននាមថា ជាអ្នករស់នៅដោយកិត្តិយស ជីវិតមានសេចក្តីសុខ ។
ឯបព្វជិតវិញដើម្បីធ្វើឱ្យជីវិតថ្លៃថ្នូរគួរដល់ការប្រតិបត្តិតាមកិច្ចធម៌វិន័យត្រឹមត្រូវ រក្សាសីលបួនឱ្យបរិសុទ្ធ គោរពឱ្យហ្មត់ចត់ ចៀសឱ្យឆ្ងាយពីអនេសនៈ២១ និងបាបធម៌៥ យកវិន័យជាធំក្នុងការប្រតិបត្តិ ធ្វើចិត្តឱ្យផូរផង់ប្រាសចាកអំពើជាអកុសល កាន់ត្រៃសិក្ខាឱ្យបានខ្ជាប់ខ្ជួន សង្រួមនូវឥន្ទ្រិយទាំង៦មានចក្ខុន្ទ្រិយ(សង្រួមភ្នែក)ជាដើម កុំឱ្យលោតកញ្ជ្រោលទៅតាមបច្ចេកវិទ្យាទំនើបបែបបច្ចុប្បន្ន ។
នោះជីវិតរបស់អ្នកបួសនឹងបាននាមថារស់នៅដោយសេចក្តីបរិសុទ្ធ ទាំងបរិបូណ៌ដោយសេចក្តីសុខ ។
ចែករំលែកព័តមាននេះ