ខេត្តបន្ទាយមានជ័យ ៖ ឆ្នាំ២០១៩នេះ នៅខេត្តបន្ទាយមានជ័យ មានកម្មករកម្មការិនីធ្វើការចំនួន២៣.៣៩៩នាក ។ នេះបើតាមតួលេខប្រកាសឲ្យដឹង ក្នុងឱកាសដែលប្រតិភូខេត្តធ្វើទស្សនកិច្ចនៅរោងចក្រកាត់ដេរ ស៊ីសូផុន អុីន…
ខេត្តបន្ទាយមានជ័យ ៖ ឆ្នាំ២០១៩នេះ នៅខេត្តបន្ទាយមានជ័យ មានកម្មករកម្មការិនីធ្វើការចំនួន២៣.៣៩៩នាក ។ នេះបើតាមតួលេខប្រកាសឲ្យដឹង ក្នុងឱកាសដែលប្រតិភូខេត្តធ្វើទស្សនកិច្ចនៅរោងចក្រកាត់ដេរ ស៊ីសូផុន អុីន ដាស្ទ្រៀល ក្នុងក្រុងសិរីសោភ័ណ កាលពីថ្ងៃទី១២ ខែកក្កដាកន្លងទៅ ។
លោក សាយជិញ ថាវីគិត ប្រធានក្រុមហ៊ុនស៊ីសូផុន អុីនដាស្ទ្រៀល បានមានប្រសាសន៍ប្រាប់គណៈប្រតិភូថា បច្ចុប្បន្នកម្មករកម្មការិនីដែលកំពុងធ្វើការងារក្នុងរោងចក្រកាត់ដេរមានចំនួនជិត៣.០០០នាក់ ។ លោកបញ្ជាក់ថា កម្មករកម្មការិនីធ្វើការងារ ក្នុងរោងចក្រកាត់ដេរក្រុមហ៊ុនស៊ីសូផុនអុីនដា ស្ទ្រៀល មានរថយន្តសម្រាប់ដឹកទៅមកដោយមិនបានគិតថ្លៃដឹកទេ ហើយប្រាក់ខែគោលគឺក្រុមហ៊ុនអនុវត្តតាមគោលការណ៍របស់រាជរដ្ឋាភិបាល ដើម្បីលើកកម្ពស់ជីវភាពបងប្អូនប្រជាពលរដ្ឋ និងកាត់បន្ថយចំណាកស្រុកដោយខុស
ច្បាប់ ។
លោក អ៊ុំ រាត្រី អភិបាលខេត្ត បានកោតសរសើរក្រុមហ៊ុនស៊ីសូផុន អុីនដាស្ទ្រៀល ដែលបានដំណើរការល្អ ទាំងក្រុមហ៊ុននិងកម្មករកម្មការិនីដែលមានការងារធ្វើស្របតាមគោលនយោបាយរបស់រាជរដ្ឋាភិបាលកម្ពុជា ដែលកំពុងអភិវឌ្ឍន៍ឧស្សាហកម្ម និងការបង្កើតឱកាសការងារមានផលិតភាពការងារខ្ពស់ ជំរុញ
អភិវឌ្ឍន៍ធនធានមនុស្ស និងជំរុញឲ្យមានទីផ្សារការងារមានគុណភាព ។
លោកអភិបាលខេត្តថ្លែងទៀតថា នៅខេត្ត បន្ទាយមានជ័យ មានរោងចក្រ សហគ្រាសក្នុងក្រុងប៉ោយប៉ែត និងក្រុងសិរីសោភ័ណ កម្មករកម្មការិនីដែលកំពុងបម្រើការងារមានចំនួន២៣.៣៩៩នាក់ ក្នុងនោះស្រី្ត១៣.៣៨៨នាក់មានរោងចក្រកាត់ដេរសម្លៀកបំពាក់ ផលិតគ្រឿងអេឡិចត្រូនិក ផលិតផលប្រអប់គ្រឿងអលង្ការ គ្រឿងបន្លាស់រថយន្ត គ្រឿងអគ្គិសនី និងរោងចក្រអាលុយមីនីញ៉ូម ។
លោក ខេង ស៊ុម ប្រធានក្រុមប្រឹក្សាខេត្ត ថ្លែងថា ក្រោយពេលប្រតិភូខេត្តធ្វើទស្សនកិច្ចនៅរោងចក្រក្រុមហ៊ុនស៊ីសូផុន អុីនដាស្ទ្រៀល ក្នុងក្រុងសិរិសោភ័ណ ឃើញសកម្មភាពកម្មករកម្មការិនីកំពុងធ្វើការងារយ៉ាងសកម្ម ហើយមានផាសុកភាព ។ (សម្រួលដោយ៖ ស្រីណា)
ចែករំលែកព័តមាននេះ