ព្រះបរមសាស្តាទ្រង់ប្រារព្ធព្រះថេរៈមួយអង្គដែលលោកអនិច្ចធម្មទៅបានយោនយកកំណើតជាប្រេត មានខ្លួនប្រាណដូចមនុស្ស មានពណ៌សម្បុរស្អាតល្អ តែមុខមាត់ដូចសត្វជ្រូក នេះក៏ព្រោះកម្មដែលខ្លួនបានសាងទុកមក ។
រឿងនេះមាននិយាយនៅក្នុងគម្ពីរធម្មបទដែលដំណាលថា ថ្ងៃមួយព្រះនារទត្ថេរបានប្រទះឃើញប្រេតនោះហើយសួរថា កាយទាំងមូលរបស់អ្នក មានសម្បុរដូចមាស មានរស្មីភឺ្លស្វាងសព្វទិស តែមាត់របស់អ្នកដូចមាត់ជ្រូក តើកាលពីជាតិមុន អ្នកបានធ្វើអំពើដូចម្តេច ?
សមណៈប្រេតនោះតបថា បពិត្រព្រះនារទៈ ខ្ញុំជាបុគ្គលបានសង្រួមកាយល្អហើយ តែមិនសង្រួមវាចាពោលពាក្យឥតប្រយោជន៍ដោយប្រការផ្សេងៗ ព្រោះហេតុនោះ បានជាខ្ញុំមានសម្បុរកាយដូចមាស តែមានមាត់ដូចសត្វជ្រូកបែបនេះ ដូចលោកម្ចាស់បានឃើញស្រាប់ហើយ។
បពិត្រព្រះនារទៈ ខ្ញុំសូមទូលរឿងនេះដល់លោកម្ចាស់ សូមលោកម្ចាស់កុំធ្វើបាបដោយមាត់ កុំមានមាត់ដូចមាត់ជ្រូកឡើយ រងទុក្ខវេទនាខ្លាំងក្លាណាស់ ។
សូមលោកម្ចាស់ពោលតែពាក្យពិតត្រង់ ពាក្យត្រឹមត្រូវទៅបានហើយ សូមលោម្ចាស់ចូរជាអ្នកខ្លាចបាប ខ្លាចអំពើអាក្រក់ ភ័យនៅក្នុងវដ្តសង្សារចុះ ។
ចែករំលែកព័តមាននេះ