អ្វីដែលអ្នកទទួលទានគឺសំខាន់ណាស់កំឡុងពេលមានផ្ទៃពោះ។ ការទទួលទានអាហារនិងភេសជ្ជៈមិនត្រឹមត្រូវក្នុងរយៈពេលនេះអាចបង្កើនហានិភ័យនៃបញ្ហជាច្រើនគួរអោយព្រួយបារម្ភ។ ប៉ុន្តែកុំបារម្ភ! ថ្ងៃនេះវេបសាយសុខភាព Health.com.kh នឹងបង្ហាញអោយដឹងពីភេសជ្ជៈដែលល្អបំផុតសម្រាប់ស្ត្រីមានផ្ទៃពោះទទួលទាន ៖
១. ទឹកធម្មតា ៖ ការទទួលទានទឹកគ្រប់គ្រាន់ក្នុងកំឡុងពេលមានផ្ទៃពោះមិនត្រឹមតែជួយដល់ការផលិតទឹកដោះរបស់រាងកាយនិងទប់ស្កាត់បញ្ហាខ្សោះជាតិទឹកប៉ុណ្ណោះទេ ប៉ុន្តែក៏ជួយរក្សាសុខភាពនៃកោសិកាគ្រាប់ឈាមផងដែរ។
២. ទឹកដូង ៖ ភេសជ្ជៈធម្មជាតិនេះប្រសើរណាស់សម្រាប់ស្ត្រីមានផ្ទៃពោះដោយវាមានផ្ទុកសម្បូរទៅដោយសារធាតុ isotonic ធម្មជាតិជួយទប់ស្កាត់បញ្ហាខ្សោះជាតិទឹកក្នុងរាងកាយ។ ទឹកដូងក៏ជាប្រភពដ៏ប្រសើរនៃជាតិអេឡិចត្រូលីត្រផងដែរ។ ការទទួលទានទឹកដូងថែមទាំងជួយដល់ដំណើរការនៃការផលិតទឹកដោះទៀតផង។
៣. ទឹកផ្លែឈើស្រស់ ៖ ទឹកផ្លែឈើស្រស់ៗដូចជា ទឹកក្រូច ទឹកឪឡឹក និងទឹកម្នាស់សុទ្ធតែមានផ្ទុកសម្បូរទៅដោយជាតិសសៃ រួមទាំងវីតាមីន C ដែលជួយសម្រួលដល់ការសម្រាល។ សារធាតុចិញ្ចឹមក្នុងទឹកផ្លែឈើស្រស់ក៏មានប្រយោជន៍ចំពោះប្រព័ន្ធភាពស៊ាំរបស់ទារកក្នុងផ្ទៃផងដែរ។ ទោះជាយ៉ាងណាត្រូវប្រាកដថាទឹកផ្លែឈើដែលអ្នកទទួលទានគឺចម្រាញ់ចេញពីផ្លែឈើសុទ្ធ និងធម្មជាតិ ១០០ភាគរយ។
៤. ទឹកបន្លែស្រស់ ៖ សម្រាប់ស្ត្រីជាម្ដាយដែលមិនចង់ទទួលទានបន្លែ ប៉ុន្តែចង់ទទួលបានអត្ថប្រយោជន៍ពីវា គឺអាចសាកល្បងធ្វើទឹកបន្លែស្រស់ដើម្បីទទួលទានជំនួសវិញ។
៥. ទឹកដោះគោស្រស់ ៖ មានផ្ទុកសម្បូរទៅដោយប្រូតេអ៊ីន វីតាមីន B12 និងកាល់ស្យូម ព្រមជាមួយសារធាតុចិញ្ចឹមល្អៗផ្សេងទៀតដែលរាងកាយត្រូវការចាំបាច់កំឡុងពេលមានផ្ទៃពោះ។
៦. ទឹកក្រូចឆ្មារ ៖ ទឹកក្រូចឆា្មរជាប្រភពដ៏ប្រសើរនៃវីតាមីន C ហើយនៅពេលទទួលទានបែបត្រជាក់ភេសជ្ជៈនេះនឹងជួយរាងកាយរក្សាជាតិទឹក។ ទឹកក្រូចឆ្មារក៏មានប្រសិទ្ធិភាពរំងាប់សសៃប្រសាទបន្ទាប់ពីអាការៈចាញ់ផងដែរ (ប្រភពពី៖ Health.com.kh)៕ (កែសម្រួលដោយ ៖ បុប្ផា)
ចែករំលែកព័តមាននេះ