ខេត្តកំពង់ឆ្នាំង ៖ បន្ទាប់ពីមានករណីតវ៉ារបស់ប្រជាពលរដ្ឋអ្នកឃុំព្រៃគ្រី ស្រុកជលគីរី ដែលប្រឆាំងដាច់ខាតការចាក់លុបដីមេទឹកទំនប់តាកុយ កាលពីពេលថ្មីៗកន្លងទៅនេះនៅព្រឹកថ្ងៃទី១០ ខែកក្កដា ឆ្នាំ២០១៩ រដ្ឋបាលសាលាស្រុកជលគីរី បានអញ្ជើញប្រជាពលរដ្ឋ ជាច្រើនរយគ្រួសារ មកជួបជុំគ្នាដើម្បីបញ្ជាក់ពីជំហររបស់រដ្ឋបាលសាលាស្រុក និងដោះស្រាយបញ្ហាជូនប្រជាពលរដ្ឋ ។
នៅព្រឹកនោះ គេឃើញអភិបាលស្រុកជលគីរីលោក ហៃ មនោរម្យ បានលើកឡើងក្នុងឥរិយាបទខឹងសំបារតែលោកបានសុំទោសវិញថា «លោកមិនមែនចិត្តព្រះទេ លោកខឹងខ្លះដែរ ដោយសារកន្លងទៅប្រជាពលរដ្ឋបានចោទលោកថា បានទិញដីនៅចំណុចទំនប់តាកុយ ហើយបានចាក់ដីលុបមេទឹកក្នុងគោលបំណងពុះឡូត៍លក់» ។
លោកសូមធ្វើការបដិសេធន៍ថា «គ្មានដីមួយដុំនៅស្រុកជលគីរីទេ បច្ចុប្បន្នលោកជួលផ្ទះគេស្នាក់នៅឯផ្សារផ្អាវ ខេត្តកំពង់ចាម មានចំងាយ ៦-៧ គីឡូម៉ែត្រ ហើយមកធ្វើការដល់ស្រុកជលគីរីនេះរាល់ថ្ងៃ ។ ការចោទប្រកាន់បែបនេះគ្មានយុត្តិធម៌ដល់លោកជាអភិបាលស្រុកនោះទេ សូមបង្ហាញការពិតផង» ។
លោកបានបញ្ជាក់ថា៖ តាមគម្រោងអភិវឌ្ឍន៍ស្រុកជលគីរីទី១ គឺជីកប្រឡាយពីទន្លេ ប្រវែង ១២០០ម៉ែត្រ និងទ្វារទឹកមួយកន្លែង ចំណុចដារអំបិល មកចំណុចភ្នំមាន់ ដើម្បីបូមទឹកទន្លេ នៅពេលដែលមានការខ្វះខាតទឹក ។ ទី២កែសម្រួលប្រព័ន្ធទ្វារទឹក ៥ កន្លែងដោយផ្សារដែកបន្ថែម ដាក់តាមលូអោយបានខ្ពស់ ក្នុងគោលបំណងទប់ទឹកឲ្យបានច្រើន ។
ចំណែកទី ៣ ស្ដា អាងទឹកទំនប់តាកុយដែលមានបណ្ដោយ ១០០ ម៉ែត្រ ទទឹង ១០០ ម៉ែត្រ និងអោយមានជម្រៅ ៣ ម៉ែត្រ ហើយយកអាចម៍ដីទៅចាក់ បំពេញសាលាស្រុក និងទីសាធារណៈមួយចំនួន ដូចជាតំបន់ទំនប់អាកុយចម្ងាយប្រវែង ៣០ម៉ែត្រជិតក្នុងគោលបំណងទុកដីនេះជាសាធារណៈសម្រាប់ចំណតរថយន្ត និង ម៉ូតូ ចត នាខែវស្សា ផងដែរ ។
ក្រោយពីការលើកឡើងរបស់លោកអភិបាលស្រុកជលគិរីរួចមកប្រជាពលរដ្ឋ ព្រមទទួលយកគម្រោង២ខាងលើ តែគម្រោងទី៣ គឺស្ដាអាងទឹកទំនប់តាកុយយកអាចម៍ដី ទៅចាក់បំពេញតាមទីសាធារណៈ គឺធ្វើអោយប៉ះពាល់ដល់ចុងមេទឹកទំនប់តាកុយ ដែលប្រជាពលរដ្ឋធ្លាប់បូមទឹកប្រើប្រាស់អាស្រ័យផល ប្រជាពលរដ្ឋមិនព្រមជាដាច់ខាត ។
ម្យ៉ាងវិញទៀតប្រជាពលរដ្ឋបានដឹងច្បាស់ណាស់ថា គោលបំណងនៃការចាក់ដីលប់ប្រឡាយនៅចំណុច ចុងមេទឹកទំនប់តាកុយគឺដើម្បីភ្ជាប់ទៅដីមួយកន្លែង ដែលអភិបាលរងស្រុកជលគីរីម្នាក់បានទិញពីប្រជាពលរដ្ឋ (មានសាក្សីជាអ្នកលក់តែសុំមិនបញ្ចេញឈ្មោះក្នុងតម្លៃ៥ពាន់ដុល្លារ) ដើម្បីអោយដីនោះបានតម្លៃថ្លៃ ព្រោះដីដែលអភិបាលស្រុកបានទិញទុកនោះនៅខាងក្នុងហើយមានប្រឡាយទឹកពីមុខ ។ យ៉ាងនេះក្តីនៅព្រឹកនោះ អភិបាលរងស្រុកជលគីរីលោក ដូវ គឹមស៊ីន បានឆ្លើយប្រាប់អ្នកដសារព័ត៌មានថា មិនបានទិញដីនោះពីប្រជាពលរដ្ឋទេ ៕
កែសម្រួលដោយ ៖ សំណាង
ចែករំលែកព័តមាននេះ