រាជធានីភ្នំពេញ ៖ ដើម្បីឱ្យទីផ្សារអន្តរធនាគារនៅក្នុងស្រុកមានដំណើរការទៅមុខប្រកបដោយភាពរលូននិងកាន់តែមានប្រសិទ្ធភាពពីមួយពេលទៅមួយពេល ធនាគារជាតិនៃកម្ពុជា ហៅកាត់ NBC និងធនាគារកណ្តាលកូរ៉េចាប់ផ្តើមធ្វើការសិក្សាស្រាវជ្រាវរួមគ្នាទៅលើប្រធានបទ «ការអភិវឌ្ឍទីផ្សារអន្តរធនាគារនៅកម្ពុជា»។ លោកស្រី…
រាជធានីភ្នំពេញ ៖ ដើម្បីឱ្យទីផ្សារអន្តរធនាគារនៅក្នុងស្រុកមានដំណើរការទៅមុខប្រកបដោយភាពរលូននិងកាន់តែមានប្រសិទ្ធភាពពីមួយពេលទៅមួយពេល ធនាគារជាតិនៃកម្ពុជា ហៅកាត់ NBC និងធនាគារកណ្តាលកូរ៉េចាប់ផ្តើមធ្វើការសិក្សាស្រាវជ្រាវរួមគ្នាទៅលើប្រធានបទ «ការអភិវឌ្ឍទីផ្សារអន្តរធនាគារនៅកម្ពុជា»។
លោកស្រី ជាសិរី អគ្គនាយកបច្ចេកទេសធនាគារជាតិនៃកម្ពុជាប្រាប់ក្រុមអ្នកសារព័ត៌ក្នុងសិក្ខាសាលាចាប់ផ្តើមជាផ្លូវការនូវកម្មវិធី «ភាពជាដៃគូផ្តល់ចំណេះដឹង២០១៩រវាងធនាគារជាតិនៃកម្ពុជា និងធនាគារកណ្តាលកូរ៉េ សម្រាប់ការស្រាវជ្រាវរួមគ្នាលើប្រធានបទស្តីពី«ការអភិវឌ្ឍទីផ្សារអន្តរធនាគារនៅកម្ពុជា» កាលពីថ្ងៃទី៩ ខែកក្កដាថា «ការចុះហត្ថលេខារួមគ្នានៅថ្ងៃនេះ ជាការចែករំលែកបទពិសោធន៍ ចំណេះដឹងឱ្យគ្នាទៅវិញទៅមក រវាងធនាគារជាតិនៃកម្ពុជា ធនាគារកណ្តាលកូរ៉េ និងសាកលវិទ្យាល័យធំៗចំនួន៣របស់ប្រទេសកូរ៉េខាងត្បូង ។
តាមលោកស្រី នាយកបច្ចេកទេស កិច្ចសហប្រតិបត្តិការស្រាវជ្រាវរួមគ្នារវាង ធនាគារជាតិនៃកម្ពុជា និងធនាគារកណ្តាលកូរ៉េ ក្នុងរយៈពេល៤ឆ្នាំកន្លងទៅនេះមានប្រធានបទខុសៗគ្នា ។ ជាក់ស្តែងនៅឆ្នាំទី៤ស្រាវជ្រាវទាក់ទងនិងការអភិវឌ្ឍទីផ្សារអន្តរធនាគារនៅកម្ពុជា។លោកស្រីបានបញ្ជាក់ថា «ការស្រាវជ្រាវរួមគ្នាយើងត្រូវធ្វើម៉េចអភិវឌ្ឍទីផ្សារអន្តរធនាគារនៅស្រុកយើងមានប្រសិទ្ធភាពជាងមុនមានដំណើររលូនជាងមុន។ ព្រោះកន្លងមកធនាគារជាតិនៃកម្ពុជាយើងព្យាយាមអភិវឌ្ឍន៍ទីផ្សារអន្តរធនាគារ ប៉ុន្តែវាមានភាពរអាក់រអួលនូវមិនទាន់ ហេតុដូចនេះយើងចង់ស្រាវជ្រាវបន្ថែមទៀតថានៅមានអ្វីខ្លះទៀតដែលយើងអាចបន្តធ្វើបាន ដើម្បីឱ្យការងារនេះដើរទៅមុខប្រកបដោយប្រសិទ្ធភាពហើយធ្វើយ៉ាងជួយរក្សាស្ថិរភាពហិរញ្ញវត្ថុនៅកម្ពុជា»។
ការសិក្សាស្រាវបន្ថែមធ្វើឡើងប្រចាំឆ្នាំនេះតាមនាយកបច្ចេកទេស «ជាធម្មតាស្ថានភាពហិរញ្ញវត្ថុនៅលើភពលោកមានការប្រែប្រួលជាលំដាប់។ដូចនេះអ្វីដែលយើងធ្លាប់បានល្អនៅឆ្នាំមុនដើរទៅរលូនវាប្រាកដនៅឆ្នាំនេះវានៅតែដើររលូននោះទេ ព្រោះបរិស្ថាននៅជុំវិញយើងវាប្រែប្រួល អីចឹងហើយការធ្វើឱ្យមានភាពប្រសើរជាលំដាប់នេះ ជាការងារដែលធនាគារជាតិត្រូវធ្វើបន្តជាប់ជានិច្ច។យើងចង់ស្វែងយល់អំពីឧបករណ៍ថ្មីៗដែលយើងគួរតែមាន, យើងអាចស្វែងយល់ឱ្យគ្រឹះស្ថានធនាគារអាចចូលរួមនៅក្នុងទីផ្សារអន្តរធនាគារបានច្រើនជាងមុន។យើងពិនិត្យមើលទៅលើឧបករណ៍ដែលយើងបានដាក់បញ្ចូលត្រូវរៀបចំបែបណា ដូចជាអត្រាការប្រាក់ និងពេលវេលាកំណត់ជាដើមនេះឱ្យវាមានភាពទាក់ទាញនិងមានប្រសិទ្ធភាពជាងមុន»។
លោកស្រី នាវ ចន្ទ័ថាណា ទេសាភិបាលរងធនាគារជាតិនៃកម្ពុជាមានប្រសាសន៍ពេលបើកកម្មវិធីថាប្រធានបទស្រាវជ្រាវរួមគ្នានៅឆ្នាំនេះលើការអភិវឌ្ឍន៍ទីផ្សារអន្តរធនាគារនៅកម្ពុជាគឺទាន់ពេលវេលាព្រោះធនាគារជាតិនៃកម្ពុជាកំពុងលើកទឹកចិត្តដល់ចលនានៃការផ្តល់ប្រាក់កម្ចីជាអន្តរធនាគារ។ ការស្រាវជ្រាវនេះមានគោលដៅវាយតម្លៃស្ថានភាពបច្ចុប្បន្ននៃទីផ្សារអន្តរប្រទេសរបស់កម្ពុជានិងព្យាយាមរកវិធីដើម្បីអភិវឌ្ឍវាហើយប្រើប្រាស់សាច់ប្រាក់បន្ថែមក្នុងប្រព័ន្ធធនាគារឱ្យកាន់តែមានប្រសិទ្ធិភាព។
លោកស្រីបានបន្តថា «ខ្ញុំជឿជាក់យ៉ាងមុតមាំថាលទ្ធផលនៃការស្រាវជ្រាវនឹងជួយដល់ធនាគារជាតិនៃកម្ពុជាឱ្យរីកចម្រើនឆ្ពោះទៅរកគោលនយោបាយរូបិយវត្ថុផ្អែកលើទីផ្សារ»។
លោក Kee-Sun Jang តំណាងធនាគារកណ្តាលកូរ៉េបាននិយាយថានេះគឺជាទំនាក់ទំនងដ៏សំខាន់មួយរវាងធនាគារកូរ៉េនិងធនាគារជាតិនៃកម្ពុជា។ តាមតំណាងធនាគារកណ្តាលកូរ៉េ «ប្រធានបទសម្រាប់ប្រទេសកម្ពុជានៅឆ្នាំនេះគឺការអភិវឌ្ឍទីផ្សារអន្តរធនាគារនៅកម្ពុជាត្រូវបានសំរេចដោយការព្រមព្រៀងគ្នារវាង BOK និង NBC ហើយយើងបានសម្រេចចិត្តផ្តោតលើការដាក់បញ្ចូលឧបករណ៍ហិរញ្ញវត្ថុនិងបញ្ហាច្បាប់ទាក់ទងនឹងទីផ្សារអន្តរធនាគារ»។
គួររម្លឹកថាការសិក្សាស្រាវជ្រាវលើ «ការអភិវឌ្ឍទីផ្សារអន្តរធនាគារនៅកម្ពុជា» ដែលមានគោលបំណងបង្កាឬបញ្ចៀសហានិភ័យកុំឱ្យកើតមានឡើងនៅក្នុងវិស័យធនាគារនិងហិរញ្ញវត្ថុតាមរយៈការប្រែប្រួលនិន្នាការនៅលើពិភពលោកនេះប្រើពេលស្រាវជ្រាវរយៈពេល៤ខែបន្ទាប់ពីកិច្ចចុះហត្ថលេខារួមគ្នា៕ កែសម្រួលដោយ ៖ សុឃាក់
ចែករំលែកព័តមាននេះ