រាជធានីភ្នំពេញ ៖ ដើម្បីបំពេញបន្ថែមនូវបញ្ហាកង្វះថាមពលអគ្គិសនីនៅក្នុងប្រទេសកម្ពុជា ជាពិសេសនៅរាជធានីភ្នំពេញ ដែលមានសង្វាក់ផលិតកម្មច្រើននោះ ព្រឹទ្ធសភាកម្ពុជា នឹងអនុម័តសេចក្តីព្រាងច្បាប់អោយក្រុមហ៊ុនចំនួនបី ដំណើរការរោងចក្រផ្គត់ផ្គង់អគ្គិសនីនៅក្នុងប្រទេសកម្ពុជា ក្នុងនោះមានរោងចក្រថាមពលអគ្គិសនី ដើរដោយធ្យូងថ្មចំនួន១ និងរោងចក្រអគ្គិសនីដើរដោយពន្លឺព្រះអាទិត្យចំនួន២ ។ សម្រាប់រោងចក្រអគ្គិសនីចំនួន២ ដែលព្រឹទ្ធសភាគ្រោងនឹងអនុម័តនៅថ្ងៃទី១១ កក្កដា ២០១៩នេះនឹងផ្ដល់ថាមពលបានប្រមាណ៦០មេហ្កាវ៉ាត់ ដើម្បីបំពេញបន្ថែមនូវការខ្វះខាតថាមពលអគ្គិសនី ជាពិសេសនៅរាជធានីភ្នំពេញ ។
បើតាមលោក ម៉ម ប៊ុននាង អ្នកនាំពាក្យព្រឹទ្ធសភាបានមានប្រសាសន៍ក្រោយកិច្ចប្រជុំគណៈកម្មាធិការអចិន្ត្រៃយ៍កាលពីព្រឹកថ្ងៃទី០៨ កក្កដា ២០១៩នេះថា នៅចុងឆ្នាំ ២០១៩នេះ រោងចក្រថាមពលអគ្គិសនីដើរដោយពន្លឺព្រះអាទិត្យចំនួន២ នឹងត្រូវអនុញ្ញាតឱ្យដំណើរការ ដើម្បីជួយផ្គត់ផ្គង់ថាមពលអគ្គិសនី នៅកម្ពុជា ជាពិសេសនៅពេលថ្ងៃ ព្រោះជាពេលវេលាដែលត្រូវការថាមពលច្រើនសម្រាប់ផ្គត់ផ្គង់នៅតាមរោងចក្រសហគ្រាសនិងកន្លែងផលិតនានាក្នុងរាជធានីភ្នំពេញ ។ លោកថា៖« រោងចក្រថាមពលអគ្គិសនី ដែលនឹងដំនើរនៅចុងឆ្នាំនេះជារោងចក្រដើរដោយថាមពលពន្លឺព្រះអាទិត្យ ហើយរោងចក្រនេះ នឹងផលិតថាមពលបានតែក្នុងពេលថ្ងៃប៉ុណ្ណោះ ដូច្នេះវានឹងអាចផ្ដល់ថាមពលមួយចំនួនដល់អគ្គិសនីកម្ពុជា យកទៅចែកចាយនៅតាមសហគ្រាសដែលត្រូវការបន្ថែម » ។
លោកបន្តថា កំលាំងថាមពល៦០មេហ្កាវ៉ាត់នេះដែរ នឹងអាចឆ្លើយតបនឹងតម្រូវការរបស់ប្រជាពលរដ្ឋនៅពេលថ្ងៃបានមួយចំណែក ព្រោះការងារសង្វាក់ផលិតកម្មមួយចំនួនធ្វើនៅពេលថ្ងៃ ហើយពេលយប់វិញមានការថយចុះនូវការប្រើប្រាស់ថាមពលអគ្គិសនីរហូតដល់ ២០០មេហ្កាវ៉ាត់ឯណោះ ។ នេះគឺជាការខិតខំមួយបន្ថែមទៀតរបស់រាជរដ្ឋាភិបាលកម្ពុជា ក្នុងការកាត់បន្ថយការខ្វះខាតថាមពលអគ្គិសនីនៅក្នុងប្រទេសកម្ពុជា ជាក់ស្ដែងកម្ពុជា បានជួបប្រទះម្ដងហើយ នៅពេលថ្ងៃគឺខ្វះថាមពលច្រើនរហូតដល់ផ្ដាច់ពីតំបន់មួយទៅផ្គត់ផ្គង់តំបន់មួយ ហើយការខ្វះខាតនេះទៀតសោត គឺមានតែនៅរដូវប្រាំងប៉ុណ្ណោះ ។
លោកបន្ថែមថា កម្ពុជានឹងមានថាមពលអគ្គិសនីប្រើប្រាស់កាន់តែច្រើន នៅចុងឆ្នាំ ២០២០ រឺ ដើមឆ្នាំ២០២១ ព្រោះក្រៅពីរោងចក្រដើរដោយថាមពលពន្លឺព្រះអាទិត្យ កម្ពុជាក៏គ្រោងនឹងដំណើរការរោងចក្រថាមពលអគ្គិសនី ដើរដោយធ្យូងថ្ម នៅខេត្តពោធិ៍សាត់ដែលផ្ដល់ថាមពលដល់ទៅ៨០មេហ្កាវ៉ាត់ទៀត ។លោកថា៖« ក្រៅពីនេះ ប្រមុខរាជរដ្ឋាភិបាលក៏បានរៀបចំអោយចរចារទិញម៉ាស៊ីនភ្លើងដើរដោយប្រេងខ្មៅ ពីប្រទេសហ្វាំងឡង់ចំនួនពីរទៀត ដែលអាចផ្ដល់ថាមពលដល់ទៅ ៦០០មេហ្កាវ៉ាត់ » ។
សម្ដេចតេជោ ហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជាបានមានប្រសាសន៍ថាកម្ពុជា បានត្រៀមរួចរាល់ហើយសម្រាប់ការទប់ទល់នឹងការខ្វះខាតថាមពលអគ្គិសនី ជាពិសេសនៅរដូវប្រាំង ដោយកម្ពុជាបានទិញម៉ាស៊ីនផលិតអគ្គិសនីរួចស្រេច និងបន្តអភិវឌ្ឍន៍ប្រភពអគ្គិសនីផ្សេងៗទៀតតាមតែអាចធ្វើបាន ។
តាមរបាយការណ៍របស់អាជ្ញាធរអគ្គិសនីកម្ពុជា នៅចុងឆ្នាំ២០១៨ប្រភពផលិតអគ្គិសនីក្នុងស្រុកមានអានុភាព ២.២០៧,៧៦ មេហ្គាវ៉ាត់ ។ ទន្ទឹមនឹងនេះកម្ពុជាបានបញ្ឈប់ដំណើរការប្រភពអគ្គិសនីប្រើប្រេងខ្មៅ ៥២.៧មេហ្គាវ៉ាត់ និងលុបបំបាត់ការផលិតអគ្គិសនីប្រើម៉ាស៊ីនម៉ាស៊ូតរបស់អ្នកកាន់អាជ្ញាបណ្ណអស់ ៣៦.២៣មេហ្គាវ៉ាត់ ។ ចំណែកប្រភពនាំចូលពីប្រទេសជិតខាងបានកាត់បន្ថយមកនៅត្រឹម ១៤.៥៥% នៅឆ្នាំ២០១៨ ដែលបានថយចុះជាបន្តបន្ទាប់ពី ៤០.០៦% នៅឆ្នាំ២០១៤ ។
នៅចុងឆ្នាំ២០១៨ បរិមាណថាមពលអគ្គិសនីដែលបានផ្តល់សរុបមាន ៩,៣០៧.៤៤លានគីឡូវ៉ាត់ម៉ោង គឺកើនឡើង ១.៩១ដងក្នុងអំឡុងឆ្នាំ២០១៤ ដល់ឆ្នាំ២០១៨ ។ ប្រភពដដែលបានឲ្យដឹងផងដែរថា ថាមពលអគ្គិសនីដែលកម្ពុជាប្រើប្រាស់បច្ចុប្បន្ននេះ មានប្រភពសំខាន់ៗរួមមានវារីអគ្គិសនី រោងចក្រធ្យូងថ្ម រោងចក្រដើរដោយប្រេងខ្មៅ ប្រភពថាមពលពន្លឺព្រះអាទិត្យ (សូឡា) និងប្រភពនាំចូលពីប្រទេសជិតខាង ៕ កែសម្រួលដោយ ៖ សុឃាក់
ចែករំលែកព័តមាននេះ