ខេត្តព្រះសីហនុ ៖ រដ្ឋបាលខេត្ត និងសាខាកាកបាទក្រហមខេត្តព្រះសីហនុបានធ្វើពិធីសូត្រមន្ត ដែលនៅរសៀលថ្ងៃទី២៨ ខែមិថុនានេះ ដោយពិធីសូត្រមន្តនេះមានព្រះសង្ឃចំនួន២៨អង្គ ត្រូវបានប្រារព្ធឡើង ដើម្បីឧទ្ទិសកុសលជូន វិញ្ញាណក្ខន្ធសពកម្មករទាំង២៨នាក់…
ខេត្តព្រះសីហនុ ៖ រដ្ឋបាលខេត្ត និងសាខាកាកបាទក្រហមខេត្តព្រះសីហនុបានធ្វើពិធីសូត្រមន្ត ដែលនៅរសៀលថ្ងៃទី២៨ ខែមិថុនានេះ ដោយពិធីសូត្រមន្តនេះមានព្រះសង្ឃចំនួន២៨អង្គ ត្រូវបានប្រារព្ធឡើង ដើម្បីឧទ្ទិសកុសលជូន វិញ្ញាណក្ខន្ធសពកម្មករទាំង២៨នាក់ ដែលបានស្លាប់បាត់បង់ជីវិត ក្នុងហេតុការណ៍បាក់រលំអគារនៅក្រុងព្រះសីហនុ កាលពីរាត្រីទាបភ្លឺថ្ងៃទី២២ ខែមិថុនានេះ ។
ឯកឧត្តម យន្ត មីន អភិបាលខេត្តព្រះសីហនុមានប្រសាសន៍ថា ៖ ក្នុងនាមថ្នាក់ដឹកនាំបានសំដែងការសោកស្តាយសោកសៅក្រៃលែង ចំពោះហេតុការណ៍ដ៏រន្ធត់មួយនេះព្រមទាំងបានបួងសួងព្រលឹងសពទាំង២៨នាក់នេះមកទទួលកុសលផលបុណ្យ និងបានទៅកើតនៅសុគតិភពគ្រប់គ្នា និងជូនពរអ្នកដែលរងរបួសចំនួ២៦នាក់ផងដែរអោយឆាប់ជាសះស្បើយ ។ លោកក៏បានសុំការអភ័យទោសពីពលរដ្ឋនៅខេត្តព្រះសីហនុចំពោះការខ្វះខាតណាមួយក្នុងរដ្ឋបាលរបស់លោករយៈពេលជិត៤ឆ្នាំមកនេះ ។
គួររំលឹកថា នៅថ្ងៃរាត្រីទាបភ្លឺថ្ងៃទី២២ ខែមិថុនា អគារគ្រោងដែកកម្ពស់៧ជាន់ របស់ជនជាតិចិន មានទីតាំងនៅក្នុងសង្កាត់លេខ៤ ក្រុងព្រះសីហនុ ត្រូវបានបាក់រំលំបានបណ្តាល អោយកម្មករខ្មែរចំនួន២៦នាក់របួស និង២៨នាក់ទៀតបានស្លាប់ក្នុងគំនរអគារបាក់បែកនោះ ។ បច្ចុប្បន្នអ្នកជាប់ពាក់ព័ន្ធមួយចំនួនកំពុងចាត់ការតាមផ្លូវច្បាប់ ចំណែកមូលហេតុនៃការរលំបាក់នេះកំពុងត្រូវបានស៊ើបអង្គេតដោយក្រុមជំនាញ ។
ក្រោយកើតហេតុការណ៍ដ៏គួរអោយសោកស្តាយនេះកម្លាំងជួយសង្គ្រោះជាង១៥០០នាក់ មកពីអង្គភាពនានា បានមកជួយរុករកមនុស្សដែលជាប់គាំងក្នុងគំនរអគាររលំបាក់បែកនេះ ដោយមានវត្តមានថ្នាក់ដឹកនាំក្រសួងស្ថាប័នជាច្រើននាក់ចុះសួរសុខទុក្ខដោយផ្ទាល់ផងដែរ ។
ពិសេសជាងនេះវត្តមានសម្តេចតេជោហ៊ុនសែន បានអញ្ជើញចុះដល់ទីតាំងបាក់រលំអគារនេះដោយផ្ទាល់រហូតដល់ការរុករកបានបញ្ចប់សព្វគ្រប់នៅម៉ោង៧និង៣០នាទីយប់ ថ្ងៃទី២៤ ខែមិថុនា ៕ កែសម្រួលដោយ ៖ សុឃាក់
ចែករំលែកព័តមាននេះ