ខេត្តបាត់ដំបង៖ «គ្រប់រថយន្តដឹកស៊ីម៉ង់ត៍ចេញពីរោងចក្រផលិតស៊ីម៉ង់ត៍ដ៏ធំមួយ នៅស្រុករតនមណ្ឌល ទៅកាន់ទីផ្សារនានានៅទូទាំងប្រទេស ត្រូវផ្ដល់លេខរថយន្ត ឬប្រភេទរថយន្តជាមុន ឱ្យទៅអ្នកគ្រប់គ្រងស្ថានីយ៍ជញ្ជីងថ្លឹងរថយន្តនានា នៅតាមផ្លូវជាតិលេខ៥ ដើម្បីងាយស្រួលសម្គាល់ពេលបង់លុយ ជាថ្នូរនឹងការដឹកលើសទម្ងន់ និងមិនចាំបាច់បើកឡើងជញ្ជីងថ្លឹង»។ នេះជាការទម្លាយឱ្យដឹងពីក្រុមអ្នកបើកបររថយន្តដឹកទំនិញនានា ដែលមិនសប្បាយចិត្តនិងក្រុមជញ្ជីងនៅតាមផ្លូវជាតិ ។
ក្រុមអ្នកបើករថយន្តដឹកទំនិញបានទម្លាយរឿងនេះ កាលពីសប្ដាហ៍មុន ។ ពួកគេបាននិយាយថា ស្ទើរគ្រប់រថយន្តទាំងអស់ ដែលដឹកស៊ីម៉ងត៍ចេញពីរោងចក្រផលិតស៊ីម៉ង់ត៍ដ៏ធំសម្បើមមួយ នៅស្រុករតនមណ្ឌល សុទ្ធតែផ្ទុកលើសចំណុះទ្វេដង ជាពិសេសរថយន្តប្រភេទ «ខ្លាឌឺហ្វម ឬ យីឌុប»។ រថយន្តប្រភេទនេះ ក្នុងមួយគ្រឿងៗ អាចផ្ទុកលើសទម្ងន់ចន្លោះពី៥០តោន ដល់៨០តោន ខណៈដែលរថយន្តទាំងនេះត្រូវបានកំណត់ឲ្យផ្ទុកទម្ងន់ត្រិមតែជិត៣០តោនតែប៉ុណ្ណោះ។
អ្នកបើករថយន្តម្នាក់សុំមិនប្រាប់ឈ្មោះ បានប្រាប់យ៉ាងដូច្នេះថា «ខ្ញុំបានដឹង អំពីលក្ខខណ្ឌរវាងក្រុមរថយន្តដឹកស៊ីម៉ង់ត៍ ជាមួយនឹងពួកក្រុមជញ្ជីងថ្លឹងនានា នៅលើផ្លូវជាតិលេខ៥ ។ ក្រុមជញ្ជីងបានតម្រូវឲ្យអ្នកបើកបររថយន្តដឹកស៊ីម៉ង់ត៍ទាំងអស់ ត្រូវផ្ដល់លេខរថយន្ត និងប្រភេទរថយន្តនីមួយៗផងដែរ ឲ្យពួកគេ (ពួកជញ្ជីង) ជាមុន ដើម្បីងាយស្រូលចាំពេលបង់លុយ។ រាល់រថយន្តដឹកស៊ីម៉ង់ត៍ក្នុង១គ្រឿងត្រូវបង់ឲ្យទីតាំងជញ្ជីង១កន្លែងចំនួន១០ម៉ឺនរៀល ជាថ្នូរនឹងមិនចាំបាច់ឡើងថ្លឹង»។
ក្រុមអ្នកបើករថយន្តដែលសុំមិនប្រាប់ឈ្មោះទាំងនេះ បានលើកឡើងថា «សម្រាប់រថយន្តដឹកទំនិញធម្មតាដូចពួកខ្ញុំ.. ពេលដល់កន្លែងជញ្ជីងត្រូវតែឡើងថ្លឹង មិនថា ពេលយប់ឬពេលថ្ងៃនោះទេ បើទោះជាដឹកទម្ងន់ត្រិមច្បាប់កំណត់ ឬ ក្រោមច្បាប់កំណត់ក្តី គឺមិនអាចបើកហូសជញ្ជីងឡើយ។ ព្រោះខ្ញុំខ្លាចក្រុមជញ្ជីងតាមចាប់បង្ខំទាប្រាក់ក្រៅផ្លូវការ។ ប៉ុន្តែបើក្រុមរថយន្តដឹកស៊ីម៉ង់ត៏ ទោះមិនបាច់ថ្លឹងក៏អាចបើកបង្ហូសបានដែរ ព្រោះពួកគេបានបង់លុយជាមុនជួនមន្ត្រីជញ្ជីងនៅតាមផ្លូវទាំងនោះរួចរាល់ហើយ»។
ពាក់ព័ន្ធនឹងករណីនេះ មន្ត្រីជំនាញ នៃមន្ទីរសាធារណការនិងដឹកជញ្ជូនខេត្តបាត់ដំបង មួយរូបដែលសុំមិនប្រាប់ឈ្មោះដែរ បានប្រាប់កោះសន្តិភាព នៅព្រឹកថ្ងៃទី២៧មិថុនា នេះថា សព្វថ្ងៃនេះខាងមន្ទីរសាធារណការខេត្ត មិនមានសិទ្ធចុះត្រូតពិនិត្យលើរថយន្តផ្ទុកលើសចំណុះទាំងនោះទេ ។ ព្រោះការងារថ្លឹងរថយន្តផ្ទុកលើសចំណុះនេះ ជាការទទូលខុសត្រូវទាំងស្រុងរបស់ក្រសួងសាធារណការនិងដឹកជញ្ជូន។ មន្ត្រីដដែលនេះបានបញ្ជាក់ដែរថា បច្ចុប្បន្នមន្ត្រីជំនាញ នៃមន្ទីរសាធារណការនិងដឹកជញ្ជូនខេត្ត មានសិទ្ធត្រិមតែចុះត្រូតពិនិត្យផ្នែកបច្ចេកទេសយានយន្តប៉ុណ្ណោះ។ ដូច្នេះខាងមន្ទីរសាធារណការ មិនបានដឹងរឿងនេះឡើយ។
កោះសន្តិភាពមិនអាចស្វែងរកការបំភ្លឺណាមួយពីមន្ត្រីគ្រប់គ្រងស្ថានីយ៍ជញ្ជីងថ្លឹងរថយន្តនានា នៅលើផ្លូវជាតិលេខ៥បានឡើយ នៅថ្ងៃទី២៧ មិថុនា ជុំវិញការលើកឡើងខាងលើនេះ ដោយសារតែនៅលើផ្លូវជាតិនានា ដែលស្ថិតក្នុងភូមិសាស្ត្រ ខេត្តបាត់ដំបង មិនមានទីតាំងស្ថានីយ៏ជញ្ជីងថ្លឹងរថយន្ត។ ប៉ុន្តែជុំវិញករណីនេះដែរ បើតាមប្រភពពីក្រុមអ្នកដឹកទំនិញដដែលបានប្រាប់ថា ក្រុមរថយន្តដឹកស៊ីម៉ង់ត៏ទាំងអស់ត្រូវបានមន្ត្រីប្រចាំស្ថានីយ៏ថ្លឹងរថយន្តនីមួយៗ ណែនាំឲ្យធ្វើដំណើរពេលយប់ ដើម្បីបិតបាំងពីភ្នែកមហាជន ឬអ្នកសារព័ត៌មានដែលព្យាយាមថតសកម្មភាពមិនប្រក្រតីរវាងរថយន្ត និងទីតាំងជញ្ជីងថ្លឹង ។
ប្រភពដដែលនេះបានបញ្ជាក់ថា សព្វថ្ងៃនេះ មានរថយន្តរាប់រយគ្រឿង ដែលសំរុកចូលទៅដឹកស៊ីម៉ង់ត៍ ចេញពីរោងចក្រផលិតស៊ីម៉ង់ត៍ក្នុងស្រុករតនមណ្ឌល។ ប៉ុន្តែក្រោយពីឡើងស៊ីម៉ង់ត៍ពេញរថយន្តនីមួយៗហើយ ពួកគេត្រូវបើកចេញពីក្នុងរោងចក្រ មកសំចតហែរហមគ្នានៅតាមដងផ្លូវខាងក្រៅរោងចក្រជាបណ្ដោះអាសន្នសិន ដោយរងចាំចាប់ពីម៉ោង៧យប់តទៅ ទើបពួកគេចេញដំណើរ។ រថយន្តនីមួយៗមិនចាំបាច់ឡើងថ្លឹងទេ ពេលដល់ស្ថានីយជញ្ជីង គឺបើកបង្ហូសតែម្ដង។ ព្រោះពួកគេបានបង់លុយរួចជាស្រេច មុនពេលបើករថយន្តទៅដឹកស៊ីម៉ង់ត៍នៅរោងចក្រខាងលើ។
ជុំវិញភាពមិនប្រក្រតីរបស់ក្រុមជញ្ជីងថ្លឹងរថយន្តនៅលើផ្លូវជាតិលេខ៥ ខាងលើនេះ ក្រុមអ្នកបើករថយន្តដឹកទំនិញ បានទាមទាឲ្យខាងក្រសួងត្រូវមានវិធានការស៊ើបអង្កេតជាបន្ទាន់។ ព្រោះមួយយប់ៗ មានរថយន្តផ្ទុកស៊ីម៉ង់ត៏រាប់រយគ្រឿងដែលធ្វើដំណើរលើផ្ទូវជាតិលេខ៥ ដែលមិនបានឡើងជញ្ជីងថ្លឹង។ ជាមួយនឹងសកម្មភាពមិនប្រក្រតីនេះ មហាជនក៏បានលើកឡើងដែរថា បើករណីខាងលើនេះវាបានកើតឡើងពិតប្រាកដមែន រវាងក្រុមអ្នកដឹកស៊ីម៉ង់ត៏ និងក្រុមជញ្ជីងថ្លឹងទាំងនេះ ពួកគេមិនត្រិមតែបានឃុំឃិតគ្នាប្រព្រឹត្តអំពើពុករលួយប៉ុណ្ណោះទេ គឺពួកគេថែមទាំងបានរួមដៃគ្នាបំផ្លាញផ្លូវថ្នល់យ៉ាងធ្ងន់ធ្ងរទៀតផង ។
ដូច្នេះ ក្រសួងសាមី ឬស្ថាប័នពាក់ព័ន្ធនានា គួរតែចាត់វិធានការឲ្យបានខ្លាំងក្លាទៅលើក្រុមអ្នកពាក់ព័ន្ធទាំងនេះ ដើម្បីជៀសវាងកុំឲ្យក្រុមឈ្មួញទុច្ចរឹតនិងក្រុមមន្ត្រីខិលខូចទាំងនោះ រួមដៃគ្នាប្រើល្បិច«ត្រីងៀតឆ្លៀតពង» ។ (សម្រួលដោយ៖ ស្រីណា)
ចែករំលែកព័តមាននេះ