រាជធានីភ្នំពេញ ៖ អាជ្ញាធររាជធានីភ្នំពេញចាត់វិធានការជាថ្មីម្តងទៀត ដោយដាក់ផែនការបង្ក្រាបឱ្យ
អស់ នូវគ្រឿងញៀននៅតាមបណ្តាក្លិបកម្សាន្ត ខារ៉ាអូខេ ទាំងតូច ទាំងធំនៅក្នុងរាជធានីភ្នំពេញ នៅក្នុងឆ្នាំ២០១៩នេះ ខណៈដែលគ្រឿងញៀននៅតែជាបញ្ហាប្រឈម និងប៉ះពាល់យ៉ាងធ្ងន់ធ្ងរទៅដល់ស្រទាប់យុវវ័យ ។
វិធានការនេះ ធ្វើឡើងនៅក្នុងកិច្ចប្រជុំគណៈបញ្ជាការឯកភាពរាជធានីភ្នំពេញ កាលពីរសៀលថ្ងៃទី២៥មិថុនា នៅសាលារាជធានីភ្នំពេញ ដោយមានការចូលរួមពីអាជ្ញាធរខណ្ឌទាំង១៤ កម្លាំងមានសមត្ថកិច្ច និងមន្ទីរពាក់ព័ន្ធមួយចំនួនទៀត ។ លោកស ថេត ឱ្យដឹងថា ការបង្ក្រាបគ្រឿងញៀននៅតែអនុវត្តបន្ត នៅតាមក្លិបកម្សាន្ត នានានៅក្នុងរាជធានីភ្នំពេញ ។
ទោះបីនៅតាមក្លិបកម្សាន្តទាំងនោះ មានខ្នងបង្អែកធំប៉ុណ្ណាក៏ដោយ ដោយយើងនឹងអនុវត្តតាមអនុសាសន៍របស់សម្ដេចក្រឡាហោមស ខេង ថា នៅឆ្នាំ២០១៩ នេះគឺជាឆ្នាំដែលយើងត្រូវលុបបំបាត់ឲ្យអស់បញ្ហាគ្រឿងញៀននៅតាមបណ្ដាក្លឹបកំសាន្តខារ៉ាអូខេ នានានៅទូទាំងប្រទេស ។ ដោយហេតុថា នៅតាមក្លិបកម្សាន្តទាំងនោះ ភាគច្រើនលើសលប់គឺសុទ្ធតែជាស្រទាប់យុវជន យុវវ័យ នាំគ្នាពពាក់ពពូនទៅសេបគ្រឿងញៀននៅ ក្នុងក្លិបដែលធ្វើឲ្យប៉ះពាល់យ៉ាងធ្ងន់ធ្ងរដល់ធនធានមនុស្ស។
លោកស ថេត បានបញ្ជាក់ថា ក្នុងនាមសមត្ថកិច្ច ត្រូវតែបង្ក្រាបអោយអស់ បទល្មើសនានានៅតាមមូលដ្ឋាន រួមទាំងបទល្មើសក្មេងទំនើងអុកឡុកនៅតាមមូលដ្ឋានជាដើម សំដៅធ្វើយ៉ាងណាឲ្យប្រជាពលរដ្ឋមានភាពកក់ក្តៅនិងជឿជាក់មកលើកម្លាំងមានសមត្ថកិច្ចរបស់យើង។
អភិបាលនៃគណៈអភិបាលរាជធានីភ្នំពេញនិងជាប្រធានគណៈបញ្ជាការឯកភាពរាជធានីភ្នំពេញ លោកឃួង ស្រេង បានមានប្រសាសន៍ថា កិច្ច ការពារសន្តិសុខ ជូនប្រជាពលរដ្ឋគឺជាការងាររបស់ សមត្ថកិច្ចនិងអាជ្ញាធររបស់យើង ដូច្នេះទេយើងត្រូវតែរួមគ្នាធ្វើយ៉ាងណាឲ្យភូមិសង្កាត់មានសុវត្ថិភាព។
ពាក់ព័ន្ធនឹងក្លឹប កំសាន្តនានាទោះបីតូចឬធំនៅក្នុងរាជធានីភ្នំពេញទាំងអស់ អាជ្ញាធរខណ្ឌទាំង១៤ត្រូវតែចុះត្រួតពិនិត្យ ហើយបើដឹងថានៅក្នុងក្លឹបកម្សាន្តដំបូងមានបង្កប់ទៅដោយគ្រឿងញៀនដាច់ខាតត្រូវតែធ្វើការបង្ក្រាបបិទអាជីវកម្មក្លឹបទាំងនោះតែម្ដង។ លោកឃួង ស្រេងបានបញ្ជាក់ថា រាល់ក្លឹបកំសាន្ត និង ktv ទាំងអស់ អាជ្ញាធរខណ្ឌយើងត្រូវណែនាំពួកគាត់ ឲ្យជៀសឆ្ងាយពីបញ្ហាគ្រឿងញៀននៅក្នុងក្លឹបកម្សាន្តទាំងនោះ បើពួកគាត់មិនស្ដាប់តាមការណែនាំរបស់យើងទេ យើងក្នុងនាមជាអាជ្ញាធរមូលដ្ឋានត្រូវតែបិទអាជីវកម្មក្លិបរបស់ពួកគាត់។
លោកបន្តថា ប្រទេសកម្ពុជាគឺជាប្រទេសមួយមានភាពស៊ីវីល័យហើយ ដូច្នេះទេត្រូវតែមានអ្វីៗគ្រប់
យ៉ាង មានទាំងក្លិបកម្សាន្តមានទាំងខារ៉ាអូខេ មានទាំងកន្លែងហូបចុកផឹកស៊ី និងកន្លែងសប្បាយភាពមួយចំនួនទៀត ប៉ុន្តែអ្វីដែលសំខាន់ទីមួយនោះគឺ គឺបញ្ហាសន្តិសុខ ហើយអ្នកដែលការពារ និងរក្សាបាននូវសន្តិសុខនេះ គឺមានតែកងកម្លាំងនិងអាជ្ញាធរមានសមត្ថកិច្ចរបស់យើងនឹងហើយ ដូច្នេះទេយើងត្រូវតែអូនរួមគ្នាការពារឲ្យបានសន្តិសុខ ធ្វើយ៉ាងណាឲ្យភូមិឃុំមានសុវត្ថិភាព ទទួលបានភាពកក់ក្តៅពីប្រជាពលរដ្ឋ៕ (សម្រួលដោយ៖ ស្រីណា)
ចែករំលែកព័តមាននេះ