រាជធានីភ្នំពេញ ៖ អ្នកជំនាញវិស័យអចលនទ្រព្យកម្ពុជា បានបង្ហាញពីការព្រួយបារម្ភលើការប៉ះពាល់វិស័យអចលនទ្រព្យទាំងមូល ជាពិសេសគម្រោងអគារដែលវិនិយោគដោយវិនិយោគិនចិន ក្រោយមានហេតុការបាក់រលំអគារនៅខេត្តព្រះសីហនុ កាលពីថ្ងៃទី២២ កន្លងទៅនាំឲ្យមានជនរងគ្រោះបាត់បង់ជីវិត ២៨ នាក់និងរបួស២៦ នាក់ផ្សេងទៀតនោះ ។
លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានមានប្រសាសន៍តាមទូរស័ព្ទអោយដឹងថា ករណីបាក់រលំអគារនៅខេត្តព្រះសីហនុ ចង់មិនចង់វានឹងមានផលអវិជ្ជមានដល់វិស័យសំណង់នៅកម្ពុជា ជាពិសេសសំណង់ដែលសាងសង់ដោយវិនិយោគិនចិនតែម្តង ។ ក៏ប៉ុន្តែទន្ទឹមនឹងនេះដែរ រដ្ឋាភិបាលនិងអ្នកពាក់ព័ន្ធឯទៀត ត្រូវរឹតបន្តឹងចំពោះសំណង់ទូទាំងប្រទេស ដើម្បីអោយពួកគេត្រូវអនុលោមតាមបទដ្ឋានបច្ចេកទេសអោយបានត្រឹមត្រូវ ជៀសវាងមានបញ្ហានេះកើតឡើងម្ដងទៀតនៅថ្ងៃអនាគត ។ លោកបានបន្តថា អ្នកវិនិយោគ ឬអ្នកដែលមានបំណងចង់វិនិយោគលើវិស័យសំណង់ដោយទិញ ឬក៏ជួលអគារខ្ពស់ ជាពិសេសនៅខេត្តព្រះសីហនុ នឹងមានអារម្មណ៍អវិជ្ជមានមួយ ក្រោយការបាក់រលំអគារនេះ ហើយអាចនឹងដកសេចក្តីទុកចិត្តពីការវិនិយោគលើវិស័យនេះ ជាពិសេសគម្រោងរបស់ជនជាតិចិនផ្ទាល់តែម្ដង ដូច្នេះហើយវាក៏នឹងអាចរងផលប៉ះពាល់មួយចំនួនដល់វិស័យអចលនទ្រព្យ តែយ៉ាងណាវាមិនធំធេងពេកនោះទេ ។
លោក ច្រឹក សុខនីម បានមានប្រសាសន៍បន្ថែមទៀតថា « នេះជាបទពិសោធន៍មួយសម្រាប់ប្រទេសកម្ពុជា ក្នុងការរឹតបន្តឹងចំពោះសំណង់អត់ច្បាប់ និងសំណង់មិនធ្វើតាមបទដ្ឋានបច្ចេកទេសត្រឹមត្រូវ ហើយចាប់ពីពេលនេះទៅ កម្ពុជាត្រូវតែរឹតបន្តឹងឡើងវិញ នៅសំណង់អត់ច្បាប់សាងសង់និងសំណង់ដែលមិនមានបច្ចេកទេសត្រឹមត្រូវ ដើម្បីទប់ស្កាត់បញ្ហានេះ កុំអោយកើតមានឡើងនៅថ្ងៃក្រោយ »។ ពាក់ព័ន្ធជាមួយនឹងសេចក្តីសម្រេចរបស់រាជរដ្ឋាភិបាល និងក្រសួងរៀបចំដែនដីនគរូបនីយកម្មនិងសំណង់ បង្កើតគណៈកម្មការត្រួតពិនិត្យគុណភាពសំណង់នៅខេត្តព្រះសីហនុ លោក ច្រឹកសុខនីម បានសាទរនិងគាំទ្រ តែគណៈកម្មការនេះ មិនគួរត្រួតពិនិត្យតែក្នុងខេត្តព្រះសីហនុនោះទេ បន្តបន្ទាប់គួរតែត្រួតពិនិត្យគុណភាពសំណង់នៅទូទាំងប្រទេស ដើម្បីធានាឱ្យបានថាសំណង់នៅកម្ពុជា ត្រូវតែមានគុណភាពនិងមិនមានបញ្ហានៅពេលក្រោយ ។
បើតាមលោក សន សៀប នាយកគ្រប់គ្រងក្រុមហ៊ុនអចលនទ្រព្យ ឃីរៀលអ៊ីស្ទេតបានអោយដឹងផងដែរថា លោកមិនទាន់ហ៊ានសន្និដ្ឋានបាននោះទេ ថាវាប៉ះពាល់ដល់វិស័យសំណង់កម្ពុជាកម្រិតណានោះ តែកន្លងមកលោកតែងតែផ្ដល់ជាមតិយោបល់ដល់វិនិយោគិនដែលចង់ទិញគម្រោងវិនិយោគ ជាអគារខុនដូ រឺអាផាត់មិន គឺត្រូវរកភាពស្របច្បាប់នៃគម្រោងនោះ ។ មានន័យថាតើគម្រោងនោះ មានច្បាប់អនុញ្ញាតសាងសង់ពីក្រសួងត្រឹមត្រូវដែរ ឬអត់ មានច្បាប់អនុញ្ញាតឱ្យសាងសង់ដែរ ឬអត់ ។ លោកបានបន្តថា ការវិនិយោគលើការទិញគម្រោងសំណង់ខុនដូរ អាផាត់មិន និងគម្រោងអគារផ្សេងៗទៀត ក្នុងករណីមិនច្បាស់លាស់ គួរស្វែងរកមេធាវី ឬអ្នកប្រឹក្សាយោបល់ផ្នែកអចលនទ្រព្យ ដើម្បីឱ្យជួយពួកគាត់ ក្នុងការស្វែងរកផ្លូវច្បាប់ និងរកឱ្យឃើញថាតើសំណង់ដែលបំរុងនឹងទិញនោះ មានច្បាប់ត្រឹមត្រូវ គួរទិញឬមិនគួរទិញ ជៀសវាងមានបញ្ហានៅថ្ងៃខាងមុខ ។ លោកបានបន្ថែមថាពាក់ព័ន្ធនឹងការបង្កើតគណៈកម្មការត្រួតពិនិត្យសំណង់នៅខេត្តព្រះសីហនុ គឺរឿងល្អណាស់ ព្រោះនៅខេត្តនេះសំណង់កើនឡើងលឿនហួសពីការគិត ដូច្នេះហើយ ត្រូវការមានការត្រួតពិនិត្យអោយបានម៉ត់ចត់ ជៀសវាងសាសង់ហើយទើបសុំច្បាប់ជាក្រោយ ។
សម្ដេចអគ្គមហាសេនាបតីតេជោ ហ៊ុន សែននាយករដ្ឋមន្ត្រីនៃកម្ពុជា បានមានប្រសាសន៍ថា សម្ដេចនឹងចាត់ការនូវមន្ត្រីធំណានៅពីក្រោយសំណង់អត់ច្បាប់នៅកម្ពុជា តែរហូតមកដល់ពេលនេះ មិនទាន់មានភស្តុតាងណាមួយបង្ហាញពីមន្ត្រីធំដែលកាងសំណង់អត់ច្បាប់នៅឡើយ ។ សម្ដេចមានប្រសាសន៍ ថានឹងមិនទុកអោយអ្នកកាងសំណង់អត់ច្បាប់នៅកម្ពុជាបន្តទៀតនោះទេ ។ គួរបញ្ជាក់ថា គិតត្រឹម៥ខែដំបូង ឆ្នាំ ២០១៩នេះ ទុនវិនិយោគក្នុងវិស័យសំណង់នៅ
កម្ពុជាមានទំហំទឹកប្រាក់ប្រមាណជា ២,៨៩ ពាន់លានដុល្លារអាមេរិក ខណៈទុនវិនិយោគក្នុង៥ខែដំបូងនៃឆ្នាំ២០១៨ មានទឹកប្រាក់ប្រមាណត្រឹម ជាង១,៧៧ពាន់លាន ដុល្លារអាមេរិកប៉ុណ្ណោះ ៕ កែសម្រួលដោយ ៖ សុឃាក់
ចែករំលែកព័តមាននេះ