ខេត្តព្រះសីហនុ ៖ គិតត្រឹមវេលាម៉ោង៦ល្ងាច ថ្ងៃទី២៤ ខែមិថុនា ជនរងគ្រោះដែលស្លាប់បានកើនឡើងដល់២៨នាក់ និង២៦នាក់រងរបួស ដែលត្រូវបានសង្គ្រោះចេញពីគំនរបែកបាក់នៃអគារដែលរលំបាក់នៅខេត្តព្រះសីហនុ ។ ទោះបីជាបែបណា…
ខេត្តព្រះសីហនុ ៖ គិតត្រឹមវេលាម៉ោង៦ល្ងាច ថ្ងៃទី២៤ ខែមិថុនា ជនរងគ្រោះដែលស្លាប់បានកើនឡើងដល់២៨នាក់ និង២៦នាក់រងរបួស ដែលត្រូវបានសង្គ្រោះចេញពីគំនរបែកបាក់នៃអគារដែលរលំបាក់នៅខេត្តព្រះសីហនុ ។ ទោះបីជាបែបណា គេមិនប្រាកដប្រជាថា តើនៅសល់អ្នកស្លាប់ឬរបួសប៉ុន្មាននាក់ទៀតទេ ខណៈការជីកកកាយនៅតែបន្តរុករកមិនឈប់ ។ តាមប្រភពព័ត៌មានពីសាក្សីខ្លះនិយាយថា កាលពីល្ងាចថ្ងៃទី២២ មិថុនា ពោលគឺមុនពេលអគាររលំបាក់ប៉ុន្មានម៉ោង គេឃើញមានរថយន្ត២គ្រឿងដឹកកម្មករចូល ដែលមានមនុស្សជិត២០នាក់ រួមទាំងរថយន្តរបស់ជនជាតិចិនមួយគ្រឿងផង មានគ្នាជិត១០នាក់ ។
មកដល់ព្រឹកថ្ងៃ២៤ ខែមិថុនា គេនៅមិនទាន់រកឃើញមនុស្សទាំងនោះនៅឡើយទេ ដែលគេជឿថា អ្នកទាំងនោះ អាចជាប់ក្នុងទូកុងតឺន័រដែលជាបន្ទប់ស្នាក់នៅពិសេសជាងកម្មករដទៃទៀត ដែលបានរកឃើញកន្លងមក ។ នេះបើតាមលោក សេង រាជ បុគ្គលិកមជ្ឈមណ្ឌលសម្ព័ន្ធភាពការងារនិងសិទ្ធិមនុស្សហៅកាត់ថាសង់ត្រាល់ ដែលកំពុងស្ថិតក្បែរកន្លែងកើតហេតុ ។ នេះបើយោងប្រភពពីវិទ្យុបារាំងអន្តរជាតិដែលបាននិយាយពីករណីទាំងនេះ ។
ចំណែកសាក្សីមួយរូបទៀត ក៏បានឲ្យដឹងប្រហាក់ប្រហែលគ្នាថា កម្មកររៀបឥដ្ឋការ៉ូមួយក្រុម មានគ្នាជាង១០នាក់ដែលទើបដឹកចូលមុនកើតហេតុនោះ ក៏នៅមិនទាន់រកសពឃើញ ឬចេញមកក្រៅនៅឡើយ ខណៈក្លិនស្អុយបានចាប់ផ្តើមភាយចេញពីគំនរអគារបាក់បែកកម្ពស់៧ជាន់នោះ ។
បើតាមសាក្សីថា គេពិបាកនឹងដឹងពីចំនួនមនុស្សដែលស្នាក់នៅក្នុងអគារសំណង់ដែលបាក់នេះ ដោយសារតែមេការម្នាក់ដែលកាន់បញ្ជីឈ្មោះកម្មករ ក៏បានស្លាប់ភ្លាមៗ កាលពីព្រឹកថ្ងៃទី២២ មិថុនា ។ មានប្រភពខ្លះថា មានកម្មករស្នាក់នៅក្នុងអគារនេះចន្លោះពី៤០ ទៅ៦០នាក់ និងបានដឹងថា សំណង់នេះគេប្រើកម្មករសរុបប្រមាណ១៣០នាក់ ។
អភិបាលក្រុងព្រះសីហនុលោក អុី សុខឡេង បានប្រាប់វិទ្យុបារាំងអន្តរជាតិ(RFI)នៅថ្ងៃទី២៤ ខែមិថុនាថា អាជ្ញាធរជឿថា នៅមានមនុស្សជាប់ក្នុងអគារបាក់រលំនោះពី៦ ទៅ៨នាក់ទៀតជាជនជាតិចិន តែលោកមិនច្បាស់ពីចំនួនកម្មករជនជាតិខ្មែរ ដែលកំពុងជាប់នៅក្នុងនោះនៅឡើយទេ ។
ចែករំលែកព័តមាននេះ