រាជធានីភ្នំពេញ ៖ ក្រសួងការបទេស និងសហប្រតិបត្តិការអន្តរជាតិ បានធ្វើច្រានចោលការផ្សាយព័ត៌មាន និងការធ្វើអត្ថាធិប្បាយមិនបានលើកឡើងពីឧប្បត្តិហេតុយន្តហោះគ្មានមនុស្សបើកជាក់លាក់ណាមួយ ឬចំនួនយន្តហោះគ្មានមនុស្សបើកដូចដែលបានរាយការណ៍បំភាន់ពីសំណាក់ប្រព័ន្ធផ្សព្វផ្សាយ និងបទអត្ថាធិប្បាយមួយចំនួននោះឡើយ ។ យោងតាម…
រាជធានីភ្នំពេញ ៖ ក្រសួងការបទេស និងសហប្រតិបត្តិការអន្តរជាតិ បានធ្វើច្រានចោលការផ្សាយព័ត៌មាន និងការធ្វើអត្ថាធិប្បាយមិនបានលើកឡើងពីឧប្បត្តិហេតុយន្តហោះគ្មានមនុស្សបើកជាក់លាក់ណាមួយ ឬចំនួនយន្តហោះគ្មានមនុស្សបើកដូចដែលបានរាយការណ៍បំភាន់ពីសំណាក់ប្រព័ន្ធផ្សព្វផ្សាយ និងបទអត្ថាធិប្បាយមួយចំនួននោះឡើយ ។
យោងតាម សេចក្តីថ្លែងការណ៍របស់អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ នៅថ្ងៃទី៣០ ខែធ្នូ ឆ្នាំ២០២៥ បានលើកឡើងថា នៅថ្ងៃទី២៩ ខែធ្នូ ឆ្នាំ២០២៥ ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានផ្តល់បទសម្ភាសន៍ដល់ទូរទស្សន៍ជាតិកម្ពុជា (ទទក) ស្តីពីលទ្ធផលនៃកិច្ចប្រជុំត្រីភាគីកម្ពុជា-ថៃ-ចិន ស្តីពីស្ថានភាពបច្ចុប្បន្នរវាងកម្ពុជា និងថៃ ដែលធ្វើឡើងនាថ្ងៃដដែល នៅខេត្តយូណាន ប្រទេសចិន ។
ក្នុងបទសម្ភាសន៍ ការលើកឡើងរបស់ឯកឧត្តម ឧបនាយករដ្ឋមន្ត្រី អំពីការប្រើប្រាស់យន្តហោះគ្មានមនុស្សបើកក្នុងជម្លោះកម្ពុជា-ថៃ នាពេលថ្មីៗនេះ ត្រូវបានយកមកផ្សព្វផ្សាយខុសពីបរិបទដែលបណ្តាលឱ្យមានការយល់ច្រឡំចំពោះសេចក្តីថ្លែងការណ៍របស់ឯកឧត្តមឧបនាយករដ្ឋមន្ត្រី និងមានប្រព័ន្ធផ្សព្វផ្សាយជាច្រើនបានសុំការបំភ្លឺ ។
ថ្លែងការណ៍បានលើកឡើងថា ទាក់ទងនឹងការរក្សាបាននូវបទឈប់បាញ់ដ៏យូរអង្វែង ឯកឧត្តមឧបនាយករដ្ឋមន្ត្រី ប្រាក់ សុខុន បានគូសបញ្ជាក់ពីភាពចាំបាច់ក្នុងការបង្កើតបណ្តាញទំនាក់ទំនងជាប្រចាំនៅកម្រិតរដ្ឋមន្ត្រី ការបរទេស និងរវាងយោធាកម្ពុជា និងថៃ ដើម្បីទប់ស្កាត់ការកើនឡើងនៃភាពតានតឹង ដែលមិនចាំបាច់ ដោយសារឧប្បត្តិហេតុតូចតាច ដូចជាការរាយការណ៍អំពីការដាក់ពង្រាយយន្តហោះគ្មានមនុស្សបើក ឆ្លងព្រំដែន ដែលភាគីទាំងពីរអាចផ្ទៀងផ្ទាត់បានភ្លាមៗ ដើម្បីបញ្ចៀសការយល់ច្រឡំ ។
ប្រភពបានគូសបញ្ជាក់ថា ឯកឧត្តម ប្រាក់ សុខុន មិនបានលើកឡើងពីឧប្បត្តិហេតុយន្តហោះគ្មានមនុស្សបើក ជាក់លាក់ណាមួយ ឬចំនួនយន្តហោះគ្មានមនុស្សបើក ដូចដែលបានរាយការណ៍បំភាន់ពីសំណាក់ ប្រព័ន្ធផ្សព្វផ្សាយ និងបទអត្ថាធិប្បាយមួយចំនួននោះឡើយ៕
ចែករំលែកព័តមាននេះ