ខេត្តព្រះសីហនុ ៖ សម្ដេចតេជោស្នើរឱ្យរៀបចំពង្រឹងកម្លាំងសមត្ថភាពជំនាញបន្ថែមទៀត ដើម្បីត្រៀមធ្វើប្រតិបត្តិការសង្គ្រោះក្នុងករណីដែលកើតឡើងជាយថាហេតុថ្ងៃទី២៤ ខែមិថុនា ឆ្នាំ២០១៩ ប្រមុខរាជរដ្ឋាភិបាលកម្ពុជាសម្ដេចអគ្គមហាសេនាបតីតេជោ ហ៊ុន សែនថ្លែងថា នៅពេលខាងមុខគណៈកម្មាធិការជាតិគ្រប់គ្រងគ្រោះមហន្តរាយត្រូវពង្រឹងសមត្ថភាពជំនាញបន្ថែមទៀត ដល់កងអន្តរាគមន៍សង្គ្រោះបន្ទាន់ ហើយត្រូវពង្រាយនៅតាមអង្គភាពកងទ័ព កងរាជអាវុធហត្ថ និងកងនគរបាលជាតិ ដើម្បីត្រៀមធ្វើប្រតិបត្តិការសង្គ្រោះក្នុងករណីដែលកើតឡើងជាយថាហេតុ ។
សម្តេចអគ្គមហាសេនាបតីតេជោហ៊ុន សែន មានប្រសាសន៍ជូនដល់អ្នកសារព័ត៌មាននៅខេត្តព្រះសីហនុកាលពីល្ងាចថ្ងៃទី២៤ ខែមិថុនា ឆ្នាំ២០១៩ សម្ដេចតេជោមានប្រសាសន៍បញ្ជាក់ថា ទៅថ្ងៃខាងមុខយើងក៏ត្រូវរៀបចំកម្លាំងបន្ថែមទៀតឱ្យមានតាមអង្គភាពដែលមានកម្លាំងជំនាញ ដើម្បីត្រៀមធ្វើប្រតិបត្តិការសង្គ្រោះទៅលើករណីដែលកើតឡើងជាយថាហេតុ ។ សម្តេចមានប្រសាសន៍សង្កត់ធ្ងន់ថា មិនមែនគ្រាន់តែបញ្ហារលំបាក់អគារនោះទេ គឺបញ្ហាទាក់ទងទៅនឹងការធ្លាក់យន្តហោះការលិចនាវាជាដើម ។ ថា តើត្រូវសង្គ្រោះរបៀបម៉េច..? យើងត្រូវពង្រឹងសមត្ថភាពបន្ថែមទៀតនៃកងអន្តរាគមន៍សង្គ្រោះបន្ទាន់ ហើយដែលពង្រាយនៅតាមអង្គភាពកងទ័ព កងរាជអាវុធហត្ថ និងកងនគរបាលជាតិនេះជាកម្លាំងដែលយើងត្រៀមរៀបចំនាពេលខាមុខ ។
ពាក់ព័ន្ធនឹងសំណួរពីការវិនិយោគរបស់ចិននៅខេត្តព្រះសីហនុសម្តេចតេជោនាយករដ្ឋមន្ត្រី មានប្រសាសន៍ថា បញ្ហានេះវាបានក្លាយទៅជាបញ្ហានយោបាយរបស់ពួកប្រឆាំងអស់លោកគិតមើល…? ចិន ឬអាមេរិក ឬអង់គ្លេស ឬបារាំងមកវិនិយោគ បើសិនជាមានឧបទ្ទវហេតុវាដូចតែគ្នាទេ ដូច្នេះសុំកុំចោទជាតិណាឬ ជាតិណាគឺ បញ្ហាធំ យើងត្រូវប្រមូលអ្នកវិនិយោគទាំងអស់ចូលក្នុងប្រទេសកម្ពុជា ប៉ុន្តែត្រូវអនុវត្តតាមច្បាប់របស់កម្ពុជាតែប៉ុណ្ណឹងទេ ។ អីចឹងទេខ្ញុំ បានស្តាប់ ឮច្រើនពេកហើយដែលថា ចិនមកដាក់អាណានិគមតាមរយៈការដាក់វិនិយោគក៏ប៉ុន្តែសូមបញ្ជាក់អ្នកទាំងអស់គ្នាថា ឥឡូវពិភពលោកកំពុងត្រូវការអ្នកវិនិយោគចិនចូលទៅវិនិយោគនៅក្នុងប្រទេសរបស់គេ តែយើងមានភព្វសំណាង ដែលយើងបានទាញអ្នកវិនិយោគចិនចូលក្នុងប្រទេសរបស់យើង ។ ប៉ុន្តែអ្នកដែលមិនចង់ឱ្យយើងមានការរីកចម្រើនគេថា នេះ គឺជាអន្ទាក់បំណុលរបស់ចិននេះជាអាណានិគមរបស់ចិននេះជាកន្លែងលក់ដីឱ្យចិន ។ ប៉ុន្តែខ្ញុំសូមគូសបញ្ជាក់ថា អ្នកដែលនៅក្រុងព្រះសីហនុបានទទួលផលប្រយោជន៍ប៉ុណ្ណាពីការវិនិយោគ ។
ពិតមែនហើយនៅពេលដែលចាប់ផ្តើមការសាងសង់មានការខូចផ្លូវ ប៉ុន្តែនៅពេលដែលមានការសាងសង់រួចហើយទីក្រុងព្រះសីហនុវានឹងក្លាយទៅទីក្រុងដ៏ធំដែលមិនដូចការគិត ។ ជាមួយគ្នានេះ សម្តេចអគ្គមហាសេនាបតីតេជោ ហ៊ុន សែន ក៏បានថ្កោលទោសជាសាធារណៈ ទៅលើបញ្ហាទាក់ទងនឹងការយកបញ្ហាវិនិយោគរបស់ចិនមកធ្វើការចោទប្រកាន់រាជរដ្ឋាភិបាលថា ជាអាយ៉ងរបស់ចិនលក់ដីឱ្យចិន ។ សម្តេចតេជោក៏បានឱ្យដឹងដែរថា តុល្យការអ្នកស្លាប់ដោយសារការបាក់អគារចំនួន២៨នាក់ និងរបួស២៦នាក់ ដោយក្នុងនោះមនុស្សប្រាំមួយនាក់ត្រូវបានសង្គ្រោះចេញពីគំនររលំបាក់បែក ។
សម្តេចតេជោ បានបញ្ជាក់ទៀតថា សាកសពមួយទទួលបានប្រាក់ឧបត្ថម្ភមិនតិចជាង៦ម៉ឺនដុល្លារនោះទេ ។ សម្តេចតេជោបានលើកឡើងថា លោកយន្ត មីន បានទទួលស្គាល់កំហុសសុំលាលែងពីតំណែងបង្ហាញពីការទទួលខុសត្រូវ ។ សម្តេចបានបញ្ជាក់ឲ្យដឹងទៀតថា ការរុករកមនុស្សបានបញ្ចប់នៅតែការសម្អាតការដ្ឋានការរុករកបានបញ្ចប់តែត្រូវស្រាវជ្រាវ ដើម្បីរកឱ្យឃើញការទទួលខុសត្រូវសំណង់មានច្បាប់ ឬមិនមានច្បាប់អនុញ្ញាត ។ សម្តេចចង់ឱ្យអ្នកនៅពីក្រោយខ្នងការដ្ឋានសំណង់ខុសច្បាប់ចេញមក ដើម្បីទទួលខុសត្រូវចំពោះមុខច្បាប់ ។
សម្ដេចតេជោក៏បានមានប្រសាសន៍ថ្លែងនូវការអរគុណចំពោះការចូលរួមរបស់គ្រប់កម្លាំង ទាំងសប្បុរសជន និងប្រជាពលរដ្ឋគ្រប់ស្រទាប់ជាន់ថ្នាក់ និងបណ្ដាបក្សនយោបាយដែលបានចូលរួមចំណែកក្នុងប្រតិបត្តិការសង្គ្រោះប្រជាពលរដ្ឋដែលរងគ្រោះដោយសារការរលំបាក់អគារនេះដែលប្រតិបត្តិការសង្គ្រោះបែបនេះបានកើតជាលើកដំបូងនៅក្នុងប្រទេសរបស់យើងដែលជារឿងគួរឱ្យសោកស្ដាយ ហើយសោកនាដកម្មលើកនេះបានផ្ដល់មេរៀន និងបទពិសោធន៍ សម្រាប់យើងផងដែរ ។
គួរបញ្ជាក់ដែរថា អគារដែលបានបាក់រលំ កាលពីទៀបភ្លឺថ្ងៃទី២២ ខែមិថុនា ឆ្នាំ២០១៩ មានកម្ពស់៧ជាន់ កំពុងសាងសង់ ស្ថិតនៅក្រុម១១ ភូមិ៣ សង្កាត់៤ ក្រុងព្រះសីហនុ ខេត្តព្រះសីហនុ ៕ កែសម្រួលដោយ ៖ សុឃាក់
ចែករំលែកព័តមាននេះ