ខេត្តព្រះសីហនុ ៖ សេចក្តីរាយការណ៍បឋមបានបន្តឱ្យដឹងថា សពជនរងគ្រោះត្រូវបានរកឃើញមានចំនួន២៤នាក់ ខណៈអ្នករងរបួសក៏មាន២៤នាក់ដែរ គិតមកទល់ម៉ោង០៨ជាងព្រឹកថ្ងៃទី២៤ មិថុនា នេះ ពីកម្លាំងក្រុមសង្គ្រោះ ដែលខិតខំប្រឹងរកទាំងយប់ទាំងថ្ងៃ…
ខេត្តព្រះសីហនុ ៖ សេចក្តីរាយការណ៍បឋមបានបន្តឱ្យដឹងថា សពជនរងគ្រោះត្រូវបានរកឃើញមានចំនួន២៤នាក់ ខណៈអ្នករងរបួសក៏មាន២៤នាក់ដែរ គិតមកទល់ម៉ោង០៨ជាងព្រឹកថ្ងៃទី២៤ មិថុនា នេះ ពីកម្លាំងក្រុមសង្គ្រោះ ដែលខិតខំប្រឹងរកទាំងយប់ទាំងថ្ងៃ ស្ថិតនៅអគារកម្ពស់៧ជាន់ដែលរលំបាក់ខ្ទេចទាំង ស្រុងនោះ ។ ទោះបីយ៉ាងណា នាព្រឹកថ្ងៃដដែល កម្លាំងនៅតែបន្តរកយ៉ាងសស្រាក់សស្រាំបំផុត ខណៈទីតាំងនៃអគាររលំបាក់នោះ បានជះក្ល្ិនមិនល្អខ្លាំងទៅហើយ ហើយក៏មិនទាន់ដឹងថា សាកសពនៅសល់ប៉ុន្មាននាក់ទៀត ដែលកប់ក្នុងគំនរបាក់នោះ។
គួររំលឹកថា កម្មករសំណង់ដែលស្លាប់បានកើនដល់១៨នាក់ ក្នុងនោះស្រី៤នាក់ និងអ្នករបួសធ្ងន់និងស្រាល២៤នាក់ (ស្រី២នាក់) ដែលនេះជាតួលេខចុងក្រោយគិតត្រឹមរសៀលថ្ងៃទី២៣ ខែមិថុនា ខណៈការកាយបំណែកបែកបាក់ក្នុងការដ្ឋានសំណង់នេះ កំពុងដំណើរការទើបតែបានប្រមាណ៣០%ប៉ុណ្ណោះ ។ អគារដែលរលំបាក់នេះ មានកម្ពស់៧ជាន់ ស្ថិតនៅជិតកន្លែងលាងរថយន្តយីហោអរុណរះ ក្នុងសង្កាត់លេខ៤ ក្រុងព្រះសីហនុ ហើយអាជ្ញាធរអះអាងថា អគារខាងលើជារបស់ជនជាតិចិន ដែលកំពុងសាងសង់ ។
សាធារណមតិយល់ថា អាជ្ញាធរខេត្តនិងម្ចាស់អគារគួរតែទទួលខុសត្រូវចំពោះមុខច្បាប់ក្នុងករណីនេះ ។ នេះជាសោកនាដកម្មដ៏រន្ធត់មួយ ដែលបានកើតឡើងជាលើកដំបូងបំផុតនៅក្នុងប្រទេសកម្ពុជាលើវិស័យសំណង់ ខណៈវិស័យនេះបានរីកលូតលាស់ហួសពីការស្មាន ។
មន្ត្រីអាជ្ញាធរអះអាងថា អ្នកស្លាប់និងអ្នករបួស គឺជាកម្មករសំណង់ ដែលស្នាក់នៅក្នុងការដ្ឋានសំណង់
អគារនោះ ។ សាកសពនិងអ្នករងរបួស ត្រូវបានក្រុមសង្គ្រោះទាញយកចេញពីគំនរសំណង់បាក់បែកជាបន្តបន្ទាប់ តាំងពីព្រឹកព្រលឹមរហូតដល់ល្ងាចថ្ងៃទី២២ ខែមិថុនា ។ ប្រតិបត្តិការនេះកំពុងបន្ត ដើម្បីជួយសង្គ្រោះជនរងគ្រោះបន្ថែមទៀត ដែលគេសង្ស័យថា កំពុងជាប់នៅក្នុងគំនរអគារបែកបាក់ ។
សេចក្តីប្រកាសព័ត៌មានរបស់រដ្ឋបាលសាលាខេត្តព្រះសីហនុឲ្យដឹងថា ករណីរលំបាក់អាគារនេះ កើតឡើងនៅម៉ោង៤ទៀបភ្លឺថ្ងៃទី២២ ខែមិថុនា បណ្តាលឲ្យសង្កត់លើកម្មករសំណង់ដែលកំពុងដេកសម្រាកនៅក្នុងអគារនោះ។ អគារនេះមានទទឹង១៥ម៉ែត្រ និងបណ្តោយ ៣០ម៉ែត្រ កំពុងដំណើរការសាងសង់ទើបបានប្រមាណ៧០ទៅ៨០ភាគរយ ។
សូមបញ្ជាក់ទៀតថាថា សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ក៏បានធ្វើដំណើរទាំងយប់ឆ្ពោះ ទៅកាន់ក្រុងព្រះសីហនុ ដើម្បីពិនិត្យមើលស្ថានភាពនៃការជួយសង្គ្រោះមនុស្សចេញពីគំនរអគារដែលបាក់រលំអគារផងដែរ ។ (សម្រួួលដោយ៖ ស្រីណា)
ព័ត៌មានបន្ថែមនឹងមានផ្សាយជូនបន្ត ។
ចែករំលែកព័តមាននេះ