ហូរឈាមតាមរន្ធច្រមុះគឺជាជំងឺមួយប្រភេទតែងតែកើតមានញឹកញាប់ចំពោះកុមារ និងមនុស្សចាស់ ។ ជាទូទៅនៅពេលមានឈាមហូរតាមច្រមុះ មនុស្សយើងច្រើនហៅថា អន្ទង់ចាក់ច្រមុះ ហើយគេយកទឹកមកដាក់លើបាតដៃរួចទះលើថ្ងាសតិចៗ និងងើយមុខឡើងលើដើម្បីឱ្យបាត់ហូរឈាម ។ ប៉ុន្តែក្នុងករណីធ្ងន់ធ្ងរ ឈាមនៅតែបន្តហូរ ហើយមិនព្រមមកជួបគ្រូពេទ្យនោះ អ្នកជំងឺអាចប្រឈមនឹងសេចក្តីស្លាប់ ។
លោកវេជ្ជបណ្ឌិត ស្រូយ អាដុល្លារ អនុប្រធានផ្នែកជំងឺត្រចៀក ច្រមុះ និងបំពង់កនៃមន្ទីរពេទ្យព្រះកេតុមាលា ហើយក៏ជាអគ្គលេខាធិការរងនៃសមាគមត្រចៀក ច្រមុះ បំពង់ក និងក្បាល បានប្រាប់កោះសន្តិភាពឱ្យដឹងថា មូលហេតុដែលបណ្តាលឱ្យហូរឈាមតាមរន្ធច្រមុះនេះមានមូលហេតុច្រើនយ៉ាងដូចជា ៖
បណ្តាលមកពីការរលាកច្រមុះរ៉ាំរៃ ពេលកុមារចាប់កាន់វត្ថុមិនស្អាត រួចយកដៃលូកចូលក្នុងរន្ធច្រមុះ ។ ការប៉ះពាល់ជាមួយវត្ថុផ្សេងៗដោយផ្ទាល់នៅខ្ទង់ច្រមុះ ឬរន្ធច្រមុះ ។ មានជំងឺអាលែហ្ស៊ី (Allergy) ច្រមុះ។
ចំពោះមនុស្សចាស់ដែលមានប្រវត្តិកើតជំងឺលើសឈាម ហើយហូរឈាមតាមច្រមុះនោះដោយសារទទួលទានគ្រឿងស្រវឹង ឬទទួលទានបារីច្រើន ។ ប្រើប្រាស់ឱសថប្រភេទ Aspirin ច្រើន ។ បញ្ហាបន្ទាប់បន្សំផ្សេងមួយចំនួនទៀតដូចជា ជំងឺឫសដូងច្រមុះ រលាកប្រហោងឆ្អឹងច្រមុះរ៉ាំរៃ វៀចឆ្អឹងច្រមុះ ដុះដុំសាច់ក្នុងច្រមុះ ឈាមកកក្នុងច្រមុះជាដើម ។ មកពីការផ្លាស់ប្តូរអ័រម៉ូនចំពោះស្រី្ត ជាពិសេសនៅពេលមានផ្ទៃពោះ ។
លោកវេជ្ជបណ្ឌិតបានបញ្ជាក់ថា ចំពោះវិធានការបង្ការ និងព្យាបាលជំងឺហូរឈាមតាមច្រមុះមាន ៖
១-ត្រូវមានអនាម័យចំពោះកុមារ ។
២-ក្នុងករណីហូរឈាមច្រមុះ ត្រូវយកដៃច្របាច់ច្រមុះទាំងសងខាងឱ្យណែន ។
៣-មិនត្រូវគ្រវីច្រមុះ ឬដាក់វត្ថុអ្វីផ្សេងចូលទៅក្នុងច្រមុះឡើយ ។
៤-ដេកដាក់ក្បាលឱ្យខ្ពស់ជាងបេះដូង រួចយកទឹកកកមកស្អំនៅលើច្រមុះ ។
៥-បន្ថយ ឬបញ្ឈប់ការទទួលទានគ្រឿងស្រវឹង និងបារី ។
៦-តមទឹកកក និងទឹកក្តៅឱ្យបានយ៉ាងតិច២៤ម៉ោង ។
ក្នុងករណីហូរឈាមច្រមុះខ្លាំងមិនព្រមបាត់ធ្វើឱ្យអ្នកជំងឺមានអាការៈល្ហិតល្ហៃដៃជើងខ្សោះអស់កម្លាំង
-បាត់បង់សតិ ឬសន្លប់
-ស្រវាំងភ្នែកមើលមិនច្បាស់
-មានហូរឈាមតាមច្រមុះលាយឡំជាមួយគ្រុនក្តៅ ឈឺក្បាល ។
ក្នុងករណីអ្នកជំងឺមានលក្ខណៈបែបនេះ ត្រូវប្រញាប់នាំទៅជួបជាមួយគ្រូពេទ្យឯកទេសជាបន្ទាន់ដើម្បីទប់ស្កាត់ និងព្យាបាលឱ្យបានទាន់ពេលវេលា ព្រោះបើសិនជាការហូរឈាមច្រមុះនេះលើសពី៤ម៉ោងឡើងទៅអាចបណ្តាលឱ្យអ្នកជំងឺស្លាប់បាន ៕
ចែករំលែកព័តមាននេះ