រាជធានីភ្នំពេញ ៖ កម្ពុជានឹងផ្លាស់ប្តូរប្រព័ន្ធផ្សព្វផ្សាយពីអាណាឡូកទៅជាប្រព័ន្ធផ្សាយបែបឌីជីថល នៅត្រឹមឆ្នាំ២០២៣ខាងមុខនេះ ។ នេះបើតាមប្រមុខរាជរដ្ឋាភិបាលកម្ពុជា ។ ក្នុងជំនួបពិភាក្សាទ្វេភាគីជាមួយលោក Fayyar Sheheryar ប្រធានវិទ្យាស្ថានអាស៊ីប៉ាស៊ីហ្វិក សម្រាប់អភិវឌ្ឍការផ្សព្វផ្សាយ (AIBD) នាព្រឹកថ្ងៃទី១២ មិថុនា ឆ្នាំ២០១៩ នៅសណ្ឋាគាសុខាសៀមរាប ។
សម្ដេចតេជោនាយករដ្ឋមន្ត្រីបានឲ្យដឹងថា កម្ពុជាកំពុងតែធ្វើការផ្លាស់ប្ដូរអំពីការផ្សព្វផ្សាយពីអាណាឡូក (Analog) ទៅជាឌីជីថល (Dig ital) ដោយនឹងត្រូវបញ្ចប់រួចរាល់នៅឆ្នាំ២០២៣ខាងមុខនេះ ។ ហើយទូរទស្សន៍ជាតិកម្ពុជាក៏មានការប្រើប្រាស់ពីអាណាឡូកទៅជាឌីជីថល ហើយផងដែរ ។
ទន្ទឹមនឹងនេះសម្ដេចតេជោនាយករដ្ឋមន្ត្រីក៏បានថា ការផ្លាស់ប្ដូរការវិវត្តខាងបច្ចេកវិទ្យានេះ គឺជារឿងមួយ ប៉ុន្តែការផ្លាស់ប្ដូរ និងការអភិវឌ្ឍខ្លឹមសារនៃការផ្សព្វផ្សាយ គឺជារឿងមួយទៀតជាពិសេសពាក់ព័ន្ធនឹងការផ្សព្វផ្សាយព័ត៌មានដែលមិនពិត ។ ទាក់ទិននឹងចំណុចនេះសម្ដេចតេជោនាយករដ្ឋមន្ត្រីបានផ្ដល់អនុសាសន៍ថា ទន្ទឹមនឹងការជឿនលឿនផ្នែកបច្ចេកវិទ្យាដ៏វិជ្ជមាននេះយើងគប្បីណាជំរុញ និងរៀបចំធ្វើយ៉ាងណាឲ្យមានការវិវត្តលើការផ្សព្វផ្សាយព័ត៌មានឲ្យមានភាពវិជ្ជមានផងដែរ ។
ក្នុងជំនួបនោះលោក Fayyar Sheheryar បានគោរពសម្តែងនូវការវាយតម្លៃខ្ពស់ចំពោះការវិវត្តនៃប្រព័ន្ធផ្សព្វផ្សាយរបស់កម្ពុជា ដែលកំពុងតែមានការរីកចម្រើនលូតលាស់ និងជាទីចាប់អារម្មណ៍ ។ លោកបន្តថា វត្តមានរបស់លោក និងសមាជិករបស់លោកក្នុងសន្និសីទនេះ គឺដើ ម្បីធ្វើការចែករំលែកនូវចំណេះដឹង និងរៀនសូត្រពីគ្នាទៅវិញទៅមកផង ដើម្បីបម្រើប្រជាជនទូទាំងពិភពលោក ជាពិសេសនៅក្នុងតំបន់ឲ្យបានទទួលនូវព័ត៌មានតាមវិជ្ជាជីវៈ ។
លោកក៏បានគោរពជម្រាបជូនសម្ដេចតេជោផងដែរថា ជាពិសេសនៅក្នុងបរិបទនៃការផ្លាស់ប្ដូរការវិវត្តនៃបច្ចេកវិទ្យានេះ យើងគប្បីណាសហការរួមគ្នាជំរុញវឌ្ឍនភាពលើការផ្សព្វផ្សាយនេះឲ្យស្របទៅតាមការវិវត្តរបស់បច្ចេកវិទ្យា ជាពិសេសធ្វើយ៉ាងណាឲ្យការផ្សព្វផ្សាយនេះមានភាពជាវិជ្ជមាន ៕ កែសម្រួលដោយ ៖ សុឃាក់
ចែករំលែកព័តមាននេះ