ខេត្តសៀមរាប ៖ បុរសម្នាក់ដើរទិញអេតចាយសុខៗបែកគំនិតបានធ្វើសកម្មភាពយកកន្ត្រៃកាត់ដែកកាត់មេសោគាស់បូរតិច (មិនទាន់ធ្វើរួច) មួយកន្លែងយកទ្រព្យសម្បត្តិ នៅក្នុងក្រុងសៀមរាប ប៉ុន្តែត្រូវបានសមត្ថកិច្ចឃើញទាន់ ចាប់ឃាត់ខ្លួនបានភ្លាមៗបញ្ជូនទៅតុលាការខេត្ត ដើម្បីចាត់ការតាមនីតិវិធីច្បាប់ ដែលហេតុការណ៍ឃាត់ខ្លួនបានជនសង្ស័យធ្វើឡើងនៅថ្ងៃទី០៨ ខែមិថុនានេះ ស្ថិតនៅក្នុងភូមិចុងកៅស៊ូ សង្កាត់ស្លក្រាម ក្រុង-ខេត្តសៀមរាប ។
លោកឧត្តមសេនីយ៍ត្រី ភឹង ចិន្តារ៉េត ស្នងការរងទទួលផែនការងារនគរបាលព្រហ្មទណ្ឌនៃស្នងការនគរបាលខេត្តបានប្រាប់ថា ជនសង្ស័យមានឈ្មោះ អុន រ៉ាម៉ាញ ហៅត្រេន ភេទប្រុស អាយុ២៤ឆ្នាំ មុខរបរដើរទិញអេតចាយ រស់នៅភូមិមណ្ឌល៣ សង្កាត់ស្លក្រាម ក្រុង-ខេត្តសៀមរាប ។ ចំណែកជនរងគ្រោះឈ្មោះ ហែម ពិសី ភេទប្រុស អាយុ៣៥ឆ្នាំ មុខរបរវិស្វករ មានទីលំនៅភូមិទ្រាមួយ សង្កាត់ស្ទឹងមានជ័យទី១ រាជធានីភ្នំពេញ បច្ចុប្បន្នស្នាក់នៅភូមិចុងកៅស៊ូ សង្កាត់ស្លក្រាម ក្រុង-ខេត្តសៀមរាប ។
លោកបានបញ្ជាក់ថា កាលពីវេលាម៉ោង០១និង០០នាទីយប់ ឈានចូលថ្ងៃទី០៨ ខែមិថុនានេះ មានករណីអំពើលួចមានស្ថានទម្ងន់ទោសគាស់ទម្លុះទម្លាយបង្កឡើងដោយជនសង្ស័យ ឈ្មោះ អុន រ៉ាម៉ាញ ហៅត្រេន ភេទប្រុស បានធ្វើសកម្មភាពយកកន្ត្រៃកាត់ដែក កាត់មេសោបូរតិច (សណ្ឋាគារខ្នាតតូច) ដែលមិនទាន់ធ្វើរួចមួយកន្លែង មានទីតាំងស្ថិតក្នុងភូមិចុងកៅស៊ូ សង្កាត់ស្លក្រាម ក្រុងសៀមរាប ទៅលើជនរងគ្រោះឈ្មោះ ហែម ពិសី ភេទប្រុស អាយុ៣៥ឆ្នាំ មុខរបរវិស្វករ មានទីលំនៅភូមិទ្រាមួយ សង្កាត់ស្ទឹងមានជ័យទី១ រាជធានីភ្នំពេញ ។ បច្ចុប្បន្នរស់នៅភូមិ ចុងកៅស៊ូ សង្កាត់ស្លក្រាម ក្រុងសៀមរាប ដែលបានចាក់សោផ្ទះទុកចោលក្នុងពេលធ្វើសកម្មភាពនោះជនសង្ស័យត្រូវបានកម្លាំងយើងធ្វើការឃាត់ខ្លួនយកមកធ្វើការសាកសួរនៅការិយាល័យជំនាញតែម្តង ។
ក្រោយសួរនាំរួចជនសង្ស័យឈ្មោះ អុន រ៉ាម៉ាញ ហៅត្រេន បានឆ្លើយសារភាពថា រូបខ្លួនពិតជាបានធ្វើសកម្មភាព ដូចករណីខាងលើនេះពិតប្រាកដមែន ។ បច្ចុប្បន្នជនសង្ស័យត្រូវបានកម្លាំងជំនាញរៀបចំកសាងសំណុំរឿងបញ្ជូនបន្តទៅតុលាការខេត្តសៀមរាប ដើម្បីចាត់ការតាមផ្លូវច្បាប់៕ កែសម្រួលដោយ ៖ សុឃាក់
ចែករំលែកព័តមាននេះ