ខេត្តក្រចេះ ៖ មនុស្ស៣នាក់ក្នុងនោះមានម្តាយ និងកូនស្រីវ័យ២នាក់ រស់នៅភូមិកែងប្រាសាទ ឃុំសំបូរ ស្រុកសំបូរ បានរងគ្រោះដោយសារន្ទះបាញ់ បណ្តាលអោយឆេះខ្លោចលើរាងកាយ តែមិនគ្រោះថ្នាក់ដល់អាយុជីវិត…
ខេត្តក្រចេះ ៖ មនុស្ស៣នាក់ក្នុងនោះមានម្តាយ និងកូនស្រីវ័យ២នាក់ រស់នៅភូមិកែងប្រាសាទ ឃុំសំបូរ ស្រុកសំបូរ បានរងគ្រោះដោយសារន្ទះបាញ់ បណ្តាលអោយឆេះខ្លោចលើរាងកាយ តែមិនគ្រោះថ្នាក់ដល់អាយុជីវិត នៅពេលដែលពួកគេកំពុងតែដេកនៅខាងក្រោមផ្ទះ ខណៈមេឃកំពុងតែមានភ្លៀងខ្លាំង ។ នគរបាលមូលដ្ឋានស្រុកសំបូរនិយាយថា ពួកគេទាំងបីនាក់ម្តាយ និងកូនត្រូវបានចាត់បញ្ជូនទៅសង្គ្រោះនៅមណ្ឌលសុខភាពស្រុកភ្លាមៗ កាលពីថ្ងៃទី៦ មិថុនានេះ ។
ស្ត្រីរងគ្រោះឈ្មោះ ប៉ិច ចន្ធូ អាយុ៣៣ឆ្នាំ ជាម្តាយ បានរងរបួសធ្ងន់ធ្ងរ ដោយត្រូវសន្លប់ស្តូក និងមានស្នាមឆេះរោលរាលលើរាងកាយ ប្រៀបដូចជា ត្រូវភ្លើងឆេះ ។ ចំណែកឯកូនស្រី២នាក់ទៀតក៏រងរបួសដូចគ្នា ដោយខ្លះឆេះខ្លួន ឆេះជើង និងឆេះដៃជាដើម ។
អ្នកភូមិដែលឃើញហេតុការណ៍នោះនិយាយថា រសៀលថ្ងៃកើតហេតុ មេឃមានភ្លៀង និងខ្យល់ ហើយមានរន្ទះខ្លាំងៗ ។ ចំណែកឯស្ត្រីរងគ្រោះ៣នាក់ម្តាយ និងកូនកំពុងតែដេកលេងនៅក្រោមផ្ទះ ហើយរន្ទះបានបាញ់អង់តែនទូរទស្សន៍ដែលចង់ភ្ជាប់ និងសសរផ្ទះ តែក៏ត្រូវចំស្ត្រីជាម្តាយ និងកូនៗ ។ ក្នុងស្ថានភាពរន្ទះដែលបានបាញ់លាន់សូរកក្រើកដី ស្ត្រីជាម្តាយបានរងគ្រោះថ្នាក់ធ្ងន់ធ្ងរជាងគេ រហូតសន្លប់មិនដឹងខ្លួន ។
ស្រុកសំបូរជាស្រុកមួយដែលគេកត់សម្គាល់ឃើញថា ឧស្សាហ៍កើតមានគ្រោះរន្ទះបាញ់ញឹកញាប់ជាងគេដូចជា រន្ទះបាញ់សម្លាប់មនុស្ស ពិសេសសត្វពាហនៈ បណ្តាលអោយងាប់អស់ទាំងក្រោលៗជាដើម ។ ដោយមានប្រភពខ្លះលើកឡើងថា មូលហេតុដែលឧស្សាហ៍កើតមានរន្ទះបាញ់ ដោយសារតែស្រុកនេះសំបូរទៅដោយដើមឈើធំៗនៅក្នុងភូមិ ៕ កែសម្រួលដោយ ៖សុឃាក់
ចែករំលែកព័តមាននេះ