រាជធានីភ្នំពេញ៖ អតីតស្រីស្អាតចំណាត់ថ្នាក់លេខ១ប្រចាំទូរទស្សន៍ស៊ីធីអិនឆ្នាំ២០០៥អុិន វលក្ខណ៍ទេពី បាត់មុខពីពិភពសិល្បៈច្រើនឆ្នាំមកហើយ ។ ទោះជាយ៉ាងណាក្តី នាពេលថ្មីៗនេះនាងបានវិលមកចូលរួមសម្តែងក្នុងរឿងភាគទូរទស្សន៍ស៊ីធីអិន ។ ក្នុងពិធីសម្ពោធរឿងភាគនោះ ទេពី ធ្វើឲ្យមានការចាប់អារម្មណ៍ចំពោះវត្តមានរបស់នាង ។ បច្ចុប្បន្នរូបសម្បត្តិរបស់នាងនៅតែស្អាតផូរផង់មិនចាញ់កាលពីប៉ុន្មានឆ្នាំមុនទេ ។
អុិន វលក្ខ័ណ៍ទេពី ក្រោយពេលជាប់តំណែងជាស្រីស្អាតផុតគេមក មានឱកាសសម្តែងរឿងភាគជាបន្តបន្ទាប់ ភាគច្រើនរឿងភាគទូរទស្សន៍ស៊ីធីអិន ។ លើសពីនេះនាងក្លាយជាពិធីការិនីផងដែរ ។ បែកឆ្ងាយពីទស្សនិកជនអស់ពេលជាច្រើនឆ្នាំ តារាថ្ពាល់ខួចអុិន វល័ក្ខទេពី ឧស្សាហ៍ទៅកាន់ប្រទេសអូស្ត្រាលី ដោយសារតែមានសាច់ញាតិនៅទីនោះ ។ ដូច្នេះហើយទើបគេយល់ច្រឡំថានាងរស់នៅអូស្ត្រាលី តែការណ៍ពិតនាងមានមុខជំនួញនៅក្នុងស្រុកមិនអាចចោលបានទេ ។
កាលនៅប្រឡូកសិល្បៈ អុិន វល័ក្ខណ៍ទេពី ធ្លាប់លេចឮថាទាក់ទងស្នេហាជាមួយអ្នកជំនួញធំៗ និងអ្នកនៅក្រៅប្រទេសផងដែរ ប៉ុន្តែរហូតពេលនេះនាងមិនជាប់វាក់វិនជាមួយបុរសណាទេ សូម្បីតែការថតបង្ហោះលើហ្វេសបុ៊កក៏គ្មានឃើញបង្ហាញភាពផ្អែមល្ហែមជាមួយបុរសរូបណាដែរ។ ឬមួយក៏នាងលាក់បាំង ។
កាលពីពេល ថ្មីៗកន្លងមកមានប្រភពឲ្យដឹងថាស្រីស្អាតទេពី នៅតែចូលសិល្បៈ ដោយនាងធ្លាប់និយាយប្រាប់មិត្តជិតដិតថាមិនចោលសិល្បៈទេ គឺនៅតែទទួលសម្តែង។ លើសពីនេះបើអាចនាងចង់ប្រឡូកតួនាទីជាពិធីការិនីឡើងវិញ ព្រោះជាការងារនាងខំតស៊ូលំបាកតាំងពីមិនចេះរហូតអាចរលូនបាន ។
ដឹងថាអុិន វល័ក្ខណ៍ទេពី ត្រឡប់មកវិញ មានផលិតករមួយចំនួនទាក់ទងឲ្យនាងចូលរួមសម្តែង ៕ (កែសម្រួលដោយ ៖ បុប្ផា)
ចែករំលែកព័តមាននេះ