រថយន្ត៣គ្រឿងពន្លះគ្នាយ៉ាងសាហា.វលើផ្លូវជាតិលេខ៦
- សៀមរាប
ខេត្តសៀមរាប ៖ កាលពីវេលាម៉ោង១១យប់ថ្ងៃទី៣១ ខែឧសភា ឆ្នាំ២០១៩ នៅលើកំណាត់ផ្លូវជាតិលេខ៦ ស្ថិតនៅចំណុចភូមិជ្រៃ ឃុំកណ្ដែក ស្រុកប្រាសាទបាគង ខេត្តសៀមរាប…
ខេត្តសៀមរាប ៖ កាលពីវេលាម៉ោង១១យប់ថ្ងៃទី៣១ ខែឧសភា ឆ្នាំ២០១៩ នៅលើកំណាត់ផ្លូវជាតិលេខ៦ ស្ថិតនៅចំណុចភូមិជ្រៃ ឃុំកណ្ដែក ស្រុកប្រាសាទបាគង ខេត្តសៀមរាប មានករណីគ្រោះថ្នាក់ចរាចរណ៍គួរឱ្យរន្ធត់មួយបានកើតឡើង រវាងរថយន្ដចំនួន៣គ្រឿងបុកគ្នាយ៉ាងពេញទំហឹងក្នុងទិសដៅបញ្ជ្រាសគ្នា បណ្តាលឱ្យកៀបស្លាប់អ្នកបើកបររថយន្តរបស់ក្រុមហ៊ុនវីរៈប៊ុនថាំង ចំណែកអ្នកបើកបររថយន្ត២គ្រឿងទៀតបានរត់គេចខ្លួនបាត់ បន្សល់ទុកតែរថយន្តគ្រឿងនៅកន្លែងកើតហេតុ ។
លោកវរសេនីយ៍ឯក មិន ចន្ថា អធិការស្រុកប្រាសាទបាគង បានប្រាប់ភ្នាក់ងារកោះសន្តិភាពនៅរសៀលថ្ងៃទី១ ខែមិថុនា ឆ្នាំ២០១៩នេះថា រថយនុ្តទាំង៣គ្រឿងខាងលើ រួមមាន ១-រថយន្ដមួយគ្រឿងម៉ាកកាមរីបាឡែន ពណ៌ស្ករ ពាក់ផ្លាកលេខ ភ្នំពេញ ២AE-៨៩១៤ បើកបរដោយបុរសម្នាក់មិនស្គាល់អត្តសញ្ញាណ បានរត់គេចខ្លួនបាត់ ២-រថយន្ដមួយគ្រឿងម៉ាកសាំងយ៉ុង ពណ៌ស្លែ ពាក់ផ្លាកលេខ ភ្នំពេញ ២AD-៤៩២១ បើកបរដោយបុរសម្នាក់មិនស្គាល់អត្តសញ្ញាណ បានរត់គេចខ្លួនបាត់ និង៣-រថយន្ដមួយគ្រឿងប្រភេទ២៥កៅអី ពណ៌ស ពាក់ផ្លាកលេខ ភ្នំពេញ ២AD-៣៥៥១ ជារបស់ក្រុមហ៊ុនវីរៈប៊ុនថាំ មានដឹកភ្ញៀវ បើកបរដោយឈ្មោះ សុខ វីរៈ ភេទប្រុស អាយុ៣១ឆ្នាំ មានស្រុកកំណើត នៅភូមិអង្គសង្កែ ឃុំពោធិ៍រំចាក ស្រុកព្រៃកប្បាស ខេត្ដតាកែវ បានស្លាប់នៅនឹងកន្លែងកើតហេតុ ។
លោកអធិការស្រុកប្រាសាទបាគងបានបន្តថា មុនពេលកើតហេតុ មានបងប្អូនប្រជាការពាររាយការណ៍មកអធិការស្រុកថា មានរថយន្ដមួយគ្រឿងម៉ាកកាមរីបាឡែន ពណ៌ស្ករ ធ្វើដំណើរក្នុងទិសដៅ ពីត្បូងទៅជើង ឆ្លងផ្លូវបានទៅបុកនឹងរថយន្ដមួយគ្រឿងម៉ាកសាំងយ៉ុង ពណ៌ស្លែ បើកបរក្នុងទិសដៅពីលិចទៅកើត លុះពេលរថយន្តទាំងគ្រឿងនេះបុកគ្នារួចហើយ រថយន្ដម៉ាកសាំងយ៉ុង បានទៅបុកជាមួយរថយន្ដមួយទៀតគ្រឿងប្រភេទ២៥កៅអីជារបស់ក្រុមហ៊ុនវីរៈប៊ុនថាំង ដែលមានដឹកភ្ញៀវពេញ បើកបរក្នុងទិសដៅពីកើតទៅលិច បណ្ដាលឱ្យអ្នកបើកបររថយន្តរបស់ក្រុមហ៊ុនវីរៈប៊ុនថាំ ស្លាប់កៀបជាប់ក្នុងកាប៊ីន បន្ទាប់ពីកើតហេតុ អ្នករួមដំណើរក្នុងរថយន្តបានចុះនាំគ្នារករថយន្តផ្សេងជិះរៀងៗខ្លួនចេញពីកន្លែងកើតហេតុទាំងយប់បាត់អស់ ។
ចំណែកអ្នកបើកបររថយន្តម៉ាកកាមរីបាឡែន និងរថយន្ដម៉ាកសាំងយ៉ុង បានរត់គេចខ្លួនបាត់អស់ បន្សល់រថយន្តទុកនៅកន្លែងកើតហេតុ។
ក្រោយពេលកើតហេតុ កម្លាំងជំនាញបានចុះទៅដល់កន្លែងកើតហេតុ និងធ្វើការវាស់វែងទាំងយប់ រួចអូសយករថយន្តទាំង៣គ្រឿងដែលរងការខូចខាតធ្ងន់ធ្ងរយកមករក្សាទុកនៅអធិការដ្ឋាននគរបាលស្រុកប្រាសាទបាគង ដើម្បីរង់ចាំំដោះស្រាយទៅតាមនីតិវិធីច្បាប់ ។ បច្ចុប្បន្ន សពជនរងគ្រោះត្រូវបានកម្លាំងជំនាញរបស់អធិការស្រុក បានរៀបចំប្រគល់ឱ្យក្រុមគ្រួសារដើម្បីយកទៅធ្វើបុណ្យតាមប្រពៃណី ៕
ចែករំលែកព័តមាននេះ