សុខភាពមាត់ធ្មេញគឺជារឿងមួយដ៏សំខាន់ផងដែរសម្រាប់មនុស្សគ្រប់រូប គួរយកចិត្តទុកដាក់ថែរក្សាការពារឱ្យបានត្រឹមត្រូវ ដើម្បីចៀសវាងនូវបញ្ហាផ្សេងៗដែលកើតមាន ពិសេសគឺការគេងសង្កៀតធ្មេញនេះតែម្តង ។ ព្រោះនៅពេលដែលកើតមានបញ្ហានេះបណ្តាលឱ្យលោកអ្នកមានការឈឺចុកចាប់ និងគេងមិនបានគ្រប់គ្រាន់ ហើយរំខានដល់អ្នកដទៃដែលគេងនៅក្បែរយើង ។
លោកទន្តបណ្ឌិត ញាណ ភិរម្យ ប្រធានក្រុមគ្រូពេទ្យនៃមន្ទីរព្យាបាលធ្មេញបស្ចិមបានថ្លែងថា សង្កៀតធ្មេញជាការកកិតរវាងធ្មេញនិងធ្មេញ ហើយធ្វើឱ្យធ្មេញសឹករេចរឹលរហូតឈឺចាប់ទៅដល់បណ្តូលធ្មេញ និងបង្កឱ្យធ្មេញមានការប្រេះ ស្រាំឬបែកបាន ។ មូលហេតុដែលបណ្តាលឱ្យមានការគេងសង្កៀតធ្មេញនេះមាន២យ៉ាងគឺ ៖
១-បណ្តាលមកពីកំណើត ប៉ុន្តែអត្រានេះមានតិចតួចបំផុតដែលបណ្តាលឱ្យកើតមានការសង្កៀតធ្មេញ ។
២-បណ្តាលមកពីបាក់តេរី ឬប៉ារ៉ាស៊ីតម្យ៉ាងដែលមាននៅក្នុងឈាម ក្រពះ ពោះវៀន ហើយធ្វើចលនានៅពេលយប់ ។ ពេលដែលលោកអ្នកគេងនៅពេលយប់ បង្កឱ្យមានការសង្កៀតគ្នា ហើយអត្រានៃការសង្កៀតធ្មេញនេះរហូត៩៩ភាគរយ គេងរើបម្រះឬរមៀលខ្លួនបង្កឱ្យមានបញ្ហាឈឺធ្មេញ ហើយគេងមិនបានគ្រប់គ្រាន់ទេ និងបង្កការរំខានដល់អ្នកដទៃដែលគេងនៅក្បែរ។
ផលប៉ះពាល់ពិតជាមានច្រើនដូចជា បង្កឱ្យធ្មេញឆាប់ទ្រុឌទ្រោមមុនអាយុ ធ្មេញឆាប់រេចរឹល និងប្រេះបែក ។ ដោយសារតែធ្មេញសឹករេចរឹលដល់គល់ ធ្វើឱ្យធ្មេញមិនអាចស្ថិតនៅរយៈពេលយូរដោយធ្មេញមានសភាពពុកស្រួយ និងធ្វើឱ្យប្រេះបែក ឬក៏សឹកដាច់បន្តិចម្តងៗរហូតបែកជាផ្ទាំង ។ ប៉ុន្តែប្រសិនបើសឹករេចរឹលតិចនៅឡើយ លោកអ្នកគួរតែរកវិធីដើម្បីបញ្ឈប់ការគេងសង្កៀតធ្មេញតទៅទៀត ។ យកល្អគួរទៅពិគ្រោះយោបល់ជាមួយគ្រូពេទ្យដែលមានជំនាញ ។
ប្រសិនបើកើតមានបញ្ហាគេងសង្កៀតធ្មេញ លោកអ្នកអាចប្រើប្រាស់ស្បៃ night gate ការពារដើម្បីកុំឱ្យធ្មេញមានការប៉ះទង្គិចគ្នា ជួយការពារធ្មេញរបស់លោកអ្នកមិនឱ្យមានការសង្កៀត ប៉ុន្តែជាមធ្យោបាយមួយដែលមិនសូវជាល្អបុ៉ន្មានទេ ។ មធ្យោបាយដែលល្អបំផុតគឺនៅពេលដែលគេងសង្កៀតធ្មេញ លោកអ្នកគួរតែទៅពិនិត្យ ឬពិគ្រោះយោបល់ជាមួយគ្រូពេទ្យជំនាញដើម្បីធ្វើរោគវិនិច្ឆ័យរកមើលមេរោគប៉ារ៉ាស៊ីត ឬបាក់តេរីនៅក្នុងលាមក ឬឈាម ។ ការគេងសង្កៀតធ្មេញនេះមិនត្រឹមតែធ្វើឱ្យខូចធ្មេញដោយអន្លើនោះទេ ថែមទាំងអាចបង្កឱ្យធ្មេញទាំងអស់ងាយរងការបាក់បែកផងដែរ ៕
ចែករំលែកព័តមាននេះ