នៅក្នុងពិធីបើកបវេសនកាល នៃសាលាពុទ្ធិកមឋមសិក្សាកម្ពុជរដ្ឋ វត្តវារិន្ទព្រែកលៀប នៅថ្ងៃទី២៤ ខែឧសភា ឆ្នាំ២០១៩ នេះ លោកជំទាវ ខៀវ ស៊ីណា ជា ចាន់តូ បានលើកឡើងថា ការបណ្តុះបណ្តាលផ្នែកធនធានព្រះសង្ឃ ជាសមណសិស្ស គឺជាការលើកកម្ពស់ផ្នែកអប់រំ បង្កើនសីលធម៌ គុណធម៌ក្នុងសង្គម បច្ចុប្បន្នវិស័យនេះ បានកំពុងចាក់ឫសយ៉ាងជ្រៅទៅក្នុងផ្នត់គំនិត និងទំនៀមទំលាប់ប្រពៃណីខ្មែរយើង។
លោកជំទាវ បានបន្តទៀតថា÷ ការប្រតិបត្តិប្រពៃណីទំនៀបទម្លាប់ និងការចូលរួមកសាងសមិទ្ធផល ទ្រទ្រងក្នុងវិស័យព្រះពុទ្ធសាសនា គឺជាការបង្ហាញនូវឆន្ទៈដ៏មុះមុត ល្អប្រសើរ ក្នុងការបង្កើនសីលធម៌ គុណធម៌ក្នុងសង្គម ស្របតាមរដ្ឋធម្មនុញ្ញដែលបានកំណត់ថា ព្រះពុទ្ធសាសនាជាសាសនារបស់រដ្ឋ ក្នុងនោះការរីកចម្រើននៃវិស័យពុទ្ធចក្រ ក៏ជាកញ្ចក់ឆ្លុះបញ្ចំងនូវការរីកចម្រើន ក្នុងវិស័យអាណាចក្រផងដែរ ដែលវិស័យទាំងពីរនេះកំពុងដើរទន្ទឹមគ្នា ។
លោកជំទាវ ខៀវ ស៊ី ណា ជាចាន់តូ បានបញ្ជាក់ដែរថា ÷ បច្ចុប្បន្នក្រោមការដឹកនាំរបស់រាជរដ្ឋាភិបាល ដែលមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីសម្តេច តែងយកចិត្តទុកដាក់ខ្ពស់ក្នុងការអភិវឌ្ឍសង្គម និងសេដ្ឋកិច្ច ជាពិសេសហេដ្ឋារចនាសម្ព័ន្ធនានា ទាំងក្នុងវិស័យពុទ្ធចក្រ និងអាណាចក្រ មានជាអាទិ៍វត្តអារាម ព្រះវិហារ កុដិ សាលារៀន មន្ទីរពេទ្យ ប្រព័ន្ធទឹកស្អាត ប្រព័ន្ធអគ្គិសនី ផ្លូវ ស្ពានជាដើម ។ ជាក់ស្តែងនៅក្នុងទីវត្តវារិន្ទព្រែកលៀបនេះ មានសប្បុរសជន ពុទ្ធបរិស័ទ្ធជិតឆ្ងាយ រួមជាមួយលោកជំទាវផ្ទាល់ផងដែរ បានចូលរួមចំណែកកសាងកុដិ អគារសាលាពុទ្ធិកមឋមសិក្សា ការជួសជុលហោត្រ័យ និងព្រះវិហាបុរាណ ដែលជាកេរដំណែលប្រវត្តិសាស្ត្រទុកឲ្យកូនចៅជំនាន់ក្រោយ។
នៅក្នុងឱកាសនោះដែរ សម្តេចព្រះពុទ្ធជ័យមុនី ឃឹម សន សមាជិកថេរសភាព្រះពុទ្ធសាសនា នៃព្រះរាជណាចក្រកម្ពុជា និងជាព្រះមេគណរាជធានីភ្នំពេញ មានសង្ឃដីកាថា ÷ ការសិក្សាបណ្តុះបណ្តាលក្នុងវិស័យព្រះពុទ្ធសាសនា មានសារៈសំខាន់ណាស់ ក្នុងការបង្កើនចំណេះដឹងដល់សមណសិស្សគ្រប់អង្គ ព្រោះវិស័យសាសនា បានកំពុងបានកំពុងចាក់ឫសយ៉ាងជ្រៅទៅក្នុងផ្នត់គំនិត និងទំនៀមទំលាប់ប្រពៃណីខ្មែរ ក្នុងការគោរពប្រតិបត្តិ និងបានដើរតួនាទីយ៉ាងសំខាន់ សំរាប់ការឯកភាពជាតិ ការសិក្សាអប់រំផ្លូវចិត្ត ឲ្យបុគ្គលគ្រប់រូបដើរតាមផ្លូវល្អជាដើម ។
ជាក់ស្តែងនៅសាលាពុទ្ធិកមឋមសិក្សាកម្ពុជរដ្ឋ ព្រែកលៀប បានខិតខំប្រឹងប្រែងនិងគ្រប់គ្រងសមណសិស្ស ក៏ដូចជាឧទ្ទេសាចារ្យ ប្រព្រឹត្តទៅបានល្អប្រសើរ និងហ្មត់ចត់ចំពោះការបង្រៀនស្របតាមកម្មវិធីសិក្សា ដែលអគ្គធិការដ្ឋានពុទ្ធិកសិក្សាជាតិ និងក្រសួងធម្មការ និងសាសនា បានដាក់ចេញប្រកដោយគុណភាព និងប្រសិទ្ធភាពនៅលើការសិក្សានេះ ៕ ដោយសហការ (កែសម្រួលដោយ ៖ បុប្ផា)
ចែករំលែកព័តមាននេះ