ខេត្តរតនគិរី ៖ តាមប្រភពព័ត៌មានថា កូនដែលបានបង្កើតនៅតាមផ្លូវនោះ ជាទារិកាមានទម្ងន់២,៩គីឡូក្រាម និងមានសុខភាពល្អ និងមានសុវត្ថិភាពល្អទាំងម្តាយនិងទាំងទារិកានេះ ។ គួរបញ្ជាក់ថា ស្ត្រីជាម្តាយម្នាក់បានឈឺពោះឆ្លងទន្លេ…
ខេត្តរតនគិរី ៖ តាមប្រភពព័ត៌មានថា កូនដែលបានបង្កើតនៅតាមផ្លូវនោះ ជាទារិកាមានទម្ងន់២,៩គីឡូក្រាម និងមានសុខភាពល្អ និងមានសុវត្ថិភាពល្អទាំងម្តាយនិងទាំងទារិកានេះ ។ គួរបញ្ជាក់ថា ស្ត្រីជាម្តាយម្នាក់បានឈឺពោះឆ្លងទន្លេ ខណៈកំពុងធ្វើដំណើរទៅកាន់មណ្ឌលសុខភាពអណ្តូងមាស ដោយបុរសជាប្តីបានដឹកតាមម៉ូតូ ប៉ុន្តែមិនទាន់ដល់ផង ស្រាប់តែគាត់បែកទឹកភ្លោះរួចក៏សម្រាលតាមផ្លូវតែម្តងទៅ ។ ករណីនេះ បានកើតឡើងកាលពីថ្ងៃ២១ ឧសភា វេលាម៉ោង៧និង៣៥នាទីព្រឹក ។
តាមរបាយការណ៍របស់សមត្ថកិច្ចមូលដ្ឋានបានឱ្យដឹងថា ស្ត្រីជាម្តាយឈ្មោះ ដា សុភ័ណ្ឌ អាយុ៣៤ឆ្នាំ រស់នៅភូមិដាល ឃុំញ៉ាង ស្រុកអណ្តូងមាស បានឱ្យប្តីឌុបម៉ូតូមករង់ចាំសម្រាលកូននៅមណ្ឌលសុខភាពអណ្តូងមាស ។ ប្តីបានឌុបតាមម៉ូតូបានប្រហែលជាង២គីឡូម៉ែត្រពីផ្ទះ ស្ត្រីដែលមានផ្ទៃពោះ បានឱ្យប្តីឈប់ដើម្បីបត់ជើងតូច ។ ពេលចុះពីលើម៉ូតូដើរចូលកៀនផ្លូវបន្តិច ដើម្បីអង្គុយបត់ជើងតូច ស្ត្រីនោះក៏បែកទឹកភ្លោះក្រោកមិនរួច ។
ចាត់ទុកថា ជាសំណាងល្អមួយ គាប់ជួនបុគ្គលិកពេទ្យមណ្ឌលសុខភាពចុះទៅចាក់ថ្នាំបង្ការដល់កុមារនៅមូលដ្ឋានបានឃើញទាន់ ក៏ទូរស័ព្ទមកប្រធានមណ្ឌលសុខភាពអណ្តូងមាសឱ្យជួយអន្តរាគមន៍ ។ ប្រធានមណ្ឌលសុខភាព ក៏បានបញ្ជាឱ្យចេញរថយន្តសង្គ្រោះ និងឆ្មបមណ្ឌលសុខភាពម្នាក់គឺអ្នកស្រី រឹទ្ធិ សេរីរ័ត្ន ដើម្បីទៅជួយសង្គ្រោះស្ត្រីដែលកំពុងតែសម្រាលកូនទៅហើយ ។ ដោយឆ្មបបានទៅដល់ក៏បានជួយសម្រាលរួចរាល់ ទើបដឹកគាត់មកឱ្យសម្រាកបន្តនៅមណ្ឌលសុខភាព ។ (សម្រួលដោយ៖ ស្រីណា)
ចែករំលែកព័តមាននេះ