ខេត្តព្រៃវែង ៖ កម្លាំងអន្តរាគមន៍បង្ក្រាបបទល្មើសចល័តរបស់រដ្ឋបាលព្រៃឈើ និងកម្លាំងកងរាជអាវុធហត្ថលើផ្ទៃប្រទេសបានសហការគ្នាចាប់ឃាត់ម៉ូតូមួយគ្រឿងដែលលួចដឹកជញ្ជូនសត្វលលកប្រមាណជាង២០០ក្បាល បម្រុងយកទៅលក់ នៅលើទីផ្សារក្នុងភូមិសាស្ត្រទឹកដីនៃខេត្តព្រៃវែង ។
សកម្មភាពស្ទាក់ចាប់បង្ក្រាបបទល្មើសជួញដូរសត្វស្លាបខាងលើនេះធ្វើឡើង កាលពីវេលាម៉ោង៧និង៣៥នាទីព្រឹក ថ្ងៃទី២៣ ខែឧសភា នៅចំណុចភូមិត្រពាំងស្វាយ ឃុំស្ដៅកោង ស្រុកបាភ្នំ ខេត្តព្រៃវែង ។ ចំណែកសត្វលលកដែលដកហូតបានត្រូវបានគេដឹកតាមម៉ូតូ១គ្រឿងម៉ាកហុងដាវ៉េវ បើកបរដោយឈ្មោះ ដាង អ៊ុកឡឺយ ភេទប្រុស អាយុ៣០ឆ្នាំ ជនជាតិវៀតណាម ប៉ុន្តែគេពុំបានបញ្ជាក់ថា សត្វលលកទាំងនោះគេដឹកយកមកពីទីតាំងណា ហើយគោលដៅយកទៅលក់នៅកន្លែងណានោះទេ ដោយគ្រាន់តែបញ្ជាក់ថា យកទៅអោយម៉ូយនៅក្នុងភូមិសាស្ត្រខេត្តព្រៃវែង ។
មន្ត្រីរដ្ឋបាលព្រៃឈើខេត្តព្រៃវែងលោកយូ វៃ បានអោយដឹងថា សត្វលលកទាំងអស់នោះសុទ្ធតែនៅរស់ និងមានចំនួនសរុប២១៨ក្បាល ក្រោយពីត្រូវបានចាប់ និងដកហូតបានមន្ត្រីជំនាញបានប្រគល់ទៅអោយអង្គការវ៉ាយអេតនាំយកទៅព្រលែងនៅតំបន់សួនសត្វភ្នំតាម៉ៅ ចំណែកវត្ថុតាងម៉ូតូដឹកជញ្ជូន រួមទាំងអ្នកដឹកជញ្ជូនមន្ត្រីជំនាញ គ្រាន់តែធ្វើការផាកពិន័យជាទឹកប្រាក់ និងធ្វើកិច្ចសន្យាជាលាយលក្ខណ៍អក្សរប៉ុណ្ណោះ៕ (កែសម្រួលដោយ ៖ សុឃាក់)
ចែករំលែកព័តមាននេះ