ខេត្តបាត់ដំបង ៖ កម្លាំងចម្រុះដែលមានភារកិច្ចការពារបរិស្ថានប្រចាំស្រុកសំឡូត ដោយមានការចូលរួមពីកម្លាំងរបស់អង្គការ «MJP»ផង បានចុះរារាំងនិងបញ្ឈប់សកម្មភាពមិនស្របច្បាប់របស់មនុស្សមួយក្រុមមានគ្នាប្រមាណ១៥០នាក់ ដឹកនាំដោយលោក សេរី កុសល ជាមន្ត្រីជាន់ខ្ពស់នៃរាជរដ្ឋាភិបាលកម្ពុជាកាលពីវេលាម៉ោងប្រមាណ៧ព្រឹកថ្ងៃទី១៩ ខែឧសភា ខណៈក្រុមនេះកំពុងធ្វើចលនាដាំដើមឈើនៅលើដីមួយកន្លែងនៅចំណុច«វាលស្បូវ» ស្ថិតក្នុងភូមិឆករកា ឃុំសំឡូត ស្រុកសំឡូត ។ សកម្មភាពដាំដើមឈើនេះគ្មានការអនុញ្ញាត ហើយមិនបានសហការជាមួយអាជ្ញាធរដែនដី ព្រោះជាដីមានភាពចម្រូងចម្រាសក្តីក្តាំគ្នានៅតុលាការ ។
យោងតាមសេចក្ដីរាយការណ៍របស់មន្ត្រីស្រុកសំឡូតបានឲ្យដឹងថា ក្រុមមនុស្សដែលគេមិនស្គាល់ប្រវត្តិ និងមិនស្គាល់ផ្ទះសម្បែងទាំងនោះ មានគ្នាយ៉ាងតិច១៥០នាក់ ជិះរថយន្តក្រុងធំៗចំនួន៣គ្រឿង ដែលដឹកនាំដោយលោក សេរី កុសល មន្ត្រីជាន់ខ្ពស់នៃរាជរដ្ឋាភិបាលកម្ពុជា បានធ្វើដំណើរទៅស្នាក់នៅបណ្ដោះអាសន្នត្រង់ចំណុចទីតាំងដីដែលលោកសេរី កុសល គ្រប់គ្រង ។ ក្រុមពលរដ្ឋទាំងនេះ ត្រូវបានលោក សេរី កុសល ដឹកនាំដាំកូនឈើត្រង់ចំណុច«វាលស្បូវ» ក្នុងផែនទី UTM {០២៤៩៤៥០-១៣៨៦៦៦៤} ស្ថិតក្នុងភូមិឆករកា ឃុំសំឡូត ស្រុកសំឡូត ជាប់ព្រំដែនខ្មែរ-ថៃ ។
ប៉ុន្តែសកម្មភាពមិនស្របច្បាប់នេះ ត្រូវបានកម្លាំងរបស់មន្ត្រីការពារតំបន់ប្រើប្រាស់ច្រើនយ៉ាងសំឡូត សហការជាមួយមន្ត្រីដែនជម្រកសត្វព្រៃភ្នំសំកុស និងកម្លាំងចម្រុះរបស់អង្គការ«MJP» សរុបប្រមាណជិត២០នាក់ ចុះអន្តរាគមន៍ទប់ស្កាត់ និងបានបញ្ឈប់សកម្មភាពនេះទាំងស្រុង ។ ក្រុមមន្ត្រីបានចោទថា ចលនាដាំកូនឈើរបស់ក្រុមលោក សេរី កុសល នេះគ្មានការអនុញ្ញាត ហើយមិនបានសហការជាមួយមន្ត្រីជំនាញ និងអាជ្ញាធរដែនដីឡើយ ។
ម្យ៉ាងទៀត កន្លែងដាំដើមឈើនោះ ជាទីតាំងដីដែលកំពុងជាប់ក្ដីក្ដាំនៅតុលាការយ៉ាងចម្រូងចម្រាសទៀតផង ។ មន្ត្រីការពារបរិស្ថានស្រុកសំឡូតនិយាយថា លោក សេរី កុសល បានដឹកនាំមនុស្សប្រមាណ ១៥០នាក់ ជិះរថយន្តក្រុងចំនួន៣គ្រឿងដែលគាត់អះអាងថាមកពីរាជធានីភ្នំពេញ និងតាមបណ្ដាខេត្តនានាផង ឲ្យមកចូលរួមដាំដើមឈើនៅចំណុចខាងលើនេះ ដោយគ្មានការអនុញ្ញាតពីក្រសួងសាមី ឬអាជាធរស្រុក ខេត្ត ។
បើយោងតាមរបាយការណ៍ដែលមន្ត្រីបរិស្ថានដាក់ជូនថ្នាក់ដឹកនាំ លោកសេរី កុសល ត្រូវបានចោទប្រកាន់ថា លោកបាន«ឆបោក» ប្រជាពលរដ្ឋប្រហែល១៥០នាក់ មកពីតាមបណ្ដាខេត្តផ្សេងៗឲ្យចូលរួមចលនាដាំដើមឈើនេះ ។
សកម្មភាពនេះ លោកសេរី កុសល បានដឹកនាំពលរដ្ឋឲ្យងើបលួចដាំដើមឈើតាំងពីវេលាម៉ោង៤និង៥០នាទីទៀបភ្លឺ ហើយរហូតដល់ម៉ោង៧ព្រឹកថ្ងៃ ទី១៩ ខែឧសភា ទើបមន្ត្រីបរិស្ថានចុះទៅទប់ទប់ស្កាត់ គឺក្រោយពីទទួលបានព័ត៌មាននេះ ខណៈដែលក្រុមអ្នកលួចដាំកូនឈើនៅតំបន់ដីហាមឃាត់នេះ ទើបដាំបានចំនួន២០០ដើម ក្នុងចំណោមកូនឈើដែលគ្រោងដាំសរុបចំនួន៦៥០ដើម ។ គេមិនទាន់ដឹងពីគោលបំណងនៃការលួចដាំកូនឈើរបស់លោក សេរី កុសល ដែលប្រឹងប្រែងដឹកពលរដ្ឋមកពីខេត្តផ្សេងៗនេះនៅឡើយទេ ។
កោះសន្តិភាព មិនអាចស្វែងរកសុំការបំភ្លឺពីប្រភពណាមួយនៃភាគីលោក សេរី កុសល ឬពីរូបលោកផ្ទាល់បាននៅឡើយទេ នារសៀលថ្ងៃទី១៩ ខែឧសភា ។ ប៉ុន្តែលោក សើ សាម៉េត អភិបាលស្រុកសំឡូត បានប្រាប់កោះសន្តិភាព នៅរសៀលថ្ងៃដដែលនោះថា លោក សេរី កុសល ពិតជាបាននាំមនុស្សមួយក្រុមធំមកដាំកូនឈើនៅលើដី«វាលស្បូវ» ក្នុងស្រុកសំឡូតមែន តែលោកមិនបានដឹងជាក់លាក់ពីគោលបំណង នៃការដាំកូនឈើរបស់មនុស្សមួយក្រុមនោះទេ ។
លោកអភិបាលស្រុកប្រាប់ថា លោក សេរី កុសលមន្ត្រីជាន់ខ្ពស់នៃរាជរដ្ឋាភិបាលកម្ពុជា និងជាតំណាងរាស្ត្រមណ្ឌលបន្ទាយមានជ័យផង បានដឹកនាំមនុស្សប្រហែល១៥០នាក់ ចូលមកកាន់ស្រុកសំឡូត ដើម្បីចូលរួមដាំកូនឈើជាមួយគាត់ តាមរយៈរថយន្តក្រុងធំៗចំនួន៣គ្រឿង តែលោកមិនធ្លាប់ស្គាល់មនុស្សទាំងនោះទេ ។
លោក សើ សាម៉េត បានថ្លែងថា ការធ្វើចលនាដាំកូនឈើនោះគឺគ្មានច្បាប់អនុញ្ញាត ឬមានការចូលរួមពីអាជ្ញាធររបស់លោកទេ ប៉ុន្តែក្រោយពីផ្ទុះនូវសកម្មភាពនេះ ក្រុមមន្ត្រីការពារបរិស្ថានក៏បានទៅអន្តរាគមន៍រារាំងបញ្ឈប់សកម្មភាពល្មើសច្បាប់នេះទាំងព្រឹកភ្លាមៗដែរ ។
លោកអភិបាលស្រុក ក៏បានបញ្ជាក់អំពីមូល ហេតុដែលមន្ត្រីបរិស្ថានរារាំងមិនឲ្យលោក សេរី កុសល នាំមនុស្សដាំកូនឈើនៅលើដីចំណុច«វាលស្បូវ» នោះយ៉ាងដូច្នេះថា «បើតាមខ្ញុំដឹងខ្លះៗ មូលហេតុដែលមន្ត្រីបរិស្ថានហាមឃាត់មិនឲ្យក្រុមលោក សេរី កុសល ដាំកូនឈើនៅលើដីចំណុចខាងលើនេះ គឺដោយសារតែដីតំបន់នោះកំពុងជាប់ក្ដីក្ដាំនៅក្នុងតុលាការ ។ ពេលនេះ លោក សាយ សំអាល់ រដ្ឋមន្ត្រីក្រសួងបរិស្ថាន បានបញ្ជាឲ្យមន្ទីរបរិស្ថានខេត្ត ចុះហាមដាច់ខាត មិនឲ្យលោក សេរី កុសល នាំមនុស្សដាំឈើបន្តទៀតឡើយ» ។
ពាក់ព័ន្ធនឹងករណីនេះ កោះសន្តិភាពនៅមិនទាន់ស្នើសុំការបំភ្លឺពីលោក កត បូរាណ ប្រធានមន្ទីរបរិស្ថានខេត្តបានភ្លាមៗនៅឡើយទេនារសៀលថ្ងៃដដែលនោះ ដោយសារទូរស័ព្ទរបស់លោកមិនអាចទំនាក់ទំនងបាន ។ ប៉ុន្តែបើតាមមន្ត្រីការពារបរិស្ថានមួយរូប ប្រាប់តាមទូរស័ព្ទថា ក្រោយពីទទួលបានរបាយការណ៍នេះ លោក
រដ្ឋមន្ត្រីក្រសួងបរិស្ថាន បានបញ្ជាឲ្យមន្ត្រីមន្ទីរបរិស្ថានស្នើសុំកិច្ចអន្តរាគមន៍ជាបន្ទាន់ពីលោក ងួន រតនៈ អភិបាលខេត្ត ។
ប៉ុន្តែលោកអភិបាល ខេត្ត ហាក់រារែកមិនហ៊ានអន្តរាគមន៍ក្នុងរឿងនេះភ្លាមៗឡើយ រហូតទាល់តែមានទូរស័ព្ទស្នើអន្តរាគមន៍ពីលោករដ្ឋមន្ត្រីក្រសួងបរិស្ថានផ្ទាល់ ទើបលោកអភិបាលខេត្តបញ្ជាឲ្យមន្ត្រីបរិស្ថានចុះទៅបង្អើលក្រុមអ្នកចូលរួមដាំកូនឈើទាំងនោះ ។ ពេលនេះមន្ត្រីជំនាញបានបញ្ឈប់សកម្មភាពទាំងស្រុងរបស់ក្រុមលោក សេរី កុសល ហើយមន្ត្រីជំនាញក៏កំពុងធ្វើកំណត់ស្ដីពី«សកម្មភាពនេះ ។
គួររំឭកថា លោក សេរី កុសល ត្រូវបានពលរដ្ឋនៅស្រុកសំឡូតចំនួន៤នាក់ ប្ដឹងចោទប្រកាន់លោកថាបានប្រើប្រាស់កាំភ្លើងអាកា៤៧ គំរាមបាញ់សម្លាប់ពួកគាត់ កាលពីព្រឹកថ្ងៃទី២០ ខែមេសាកន្លងទៅថ្មីៗនេះ ខណៈពួកគាត់កំពុងនាំគ្នាអង្គុយរើសផ្លែសំរងភ្នំ នៅចំណុច«ភ្នំរទេះសេះ» ក្បែរព្រំដែនខ្មែរ-ថៃ ស្ថិតក្នុងភូមិឆករកា ឃុំសំឡូត ស្រុកសំឡូត ដោយចោទពួកគាត់ថា ជាអ្នកកាប់រានព្រៃអភិរក្ស ។
បណ្ដឹងនេះ បានស្ថិតក្នុងដៃកងរាជអាវុធហត្ថស្រុកសំឡូត តែក៏ត្រូវបានគេបិទបាំងស្ងាត់ឈឹង ។ ប៉ុន្តែជាងមួយសប្ដាហ៍ក្រោយមក សំណុំរឿងនេះបានបែកធ្លាយ ធ្វើឲ្យមានប្រតិកម្មពីតំណាងអយ្យការអមសាលាដំបូងខេត្ត ចំពោះការបិទបាំងរបស់សមត្ថកិច្ច ដែលមិនព្រមរាយការណ៍ អំពីករណីផ្ទុះអាវុធដែលបង្កឡើងដោយមន្ត្រីជាន់ខ្ពស់រូបនេះ ។ បើតាមប្រភពព័ត៌មានដែលកោះ សន្តិភាពទើបទទូលបានថ្មីៗនេះ បានឲ្យដឹងថា សំណុំរឿងគំរាមបាញ់សម្លាប់ពលរដ្ឋនៅស្រុកសំឡូតនេះ ត្រូវបានមន្ត្រីកងរាជអាវុធហត្ថស្រុកសំឡូតបញ្ជូនមកដល់ដៃតំណាងអយ្យការអមសាលាដំបូងខេត្តហើយ ។
ជុំវិញសំណុំរឿងនេះ លោក នួន សាន ព្រះរាជអាជ្ញាអមសាលាដំបូងខេត្ត ធ្លាប់បានបញ្ជាក់ប្រាប់កោះសន្តិភាពថា លោកមិនបានដឹងរឿងនេះទេ ព្រោះសមត្ថកិច្ចដែលទទួលចាត់ការលើករណី នេះមិនបានរាយការណ៍ ។ ប៉ុន្តែលោកបានដឹងនិងភ្ញាក់ផ្អើល បន្ទាប់ពីកោះសន្តិភាពចុះផ្សាយ ហើយលោកបានបញ្ជាឲ្យមន្ត្រីទទួលរឿងនេះបញ្ជូនសំណុំរឿងមកតុលាការហើយ ៕ (សម្រួលដោយ ៖ ស្រីណា)
ចែករំលែកព័តមាននេះ