រាជធានីភ្នំពេញ៖ លោកជំទាវយឹម ឆៃលីន ភរិយា របស់លោកហ៊ុន ម៉ានី បានក្លាយជាស្ត្រីខ្មែរទីមួយដែលមានឱកាសពិសេសអញ្ជើញ ចូលរួមជាកិត្តិយសនៅក្នុងមហោស្រពលំដាប់ពិភពលោក នៅទីក្រុងកាន ឆ្នាំ២០១៩ នេះ។ ការបង្ហាញវត្តមានដ៏គួរឲ្យភ្ញាក់ផ្អើលរបស់លោកជំទាវបានធ្វើមហាជន ជាពិសេសបណ្តាអ្នកលេងហ្វេសប៊ុកចាប់អារម្មណ៍យ៉ាងខ្លាំង និងបានចែកចាយរូបភាពតាមហ្វេសប៊ុក ។
វត្តមាននៃការចូលរួមដើរលើកម្រាលព្រំក្រហមរបស់លោកជំទាវ យឹម ឆៃលីន នេះគឺជាមោទនភាពមួយសម្រាប់ប្រទេសកម្ពុជាក្នុងនាមស្ត្រីខ្មែរទីមួយដែលទទួលបានកិត្តិយសនៅលើឆាកអន្តរជាតិ ។ មហាជនបាននាំគ្នាលើកសរសើរពីរូបសម្រស់របស់លោកជំទាវថា ពិតជាស្រស់ស្អាតមិនចាញ់តារាឡើយ បើទោះបីជាលោកជំទាវមានបុត្រ៣នាក់ហើយក៏ដោយ។ក្នុងឈុតពណ៌ក្រហមដ៏ស្រស់ឆើត លោកជំទាវបានដើរលើកម្រាលព្រំក្រហមបង្ហាញសម្រស់នៅចំពោះមុខកាមេរ៉ារាប់រយ ជាមួយនឹងតារា ល្បីៗជាច្រើនរូបពីជុំវិញពិភពលោក ។
បើយោងតាមការបង្ហោះរបស់អ្នកនាងចន ច័ន្ទលក្ខិណា ប្រធានសមាគមសិល្បករខ្មែរកាលពីពេល ថ្មីៗកន្លងមកឲ្យដឹងថា «លោកជំទាវ យឹម ឆៃលីន ឧត្តមភរិយារបស់លោកហ៊ុន ម៉ានី ស្ត្រីខ្មែរដំបូងបង្អស់ដែលត្រូវបានអញ្ជើញចូលរួមក្នុងមហោស្រពពិភពលោកនៅទីក្រុងកាន ប្រទេសបារាំង ឆ្នាំ២០១៩ ដែលប្រជុំទៅដោយ តារាភាពយន្ត តារាបង្ហាញម៉ូដ តារាចម្រៀង និងបុគ្គលដ៏ល្បីល្បាញលំដាប់ពិភពលោក ។ ប្អូនពិតជាមានមោទនភាពចំពោះលោកជំទាវណាស់ បងពិតជារាជិនីសម្រស់របស់ប្រទេសកម្ពុជាមែន »។
លោកជំទាវយឹម ឆៃលីន តែងតែមានការទាក់ទងល្អជាមួយក្រុមការងារ Hollywood ដែលបានមកជួយការងារមនុស្សធម៌ ទាក់ទងនឹងការជួយកុមារីដែលរងគ្រោះដោយការរំលោភបំពាន ។ ជារឿយៗលោកជំទាវ តែងតែជួយដល់ក្មេងស្រីទាំងនោះ ហើយលោកជំទាវតែងជួយដល់កុមារគថ្លង់ជាច្រើន ដូច្នេះលោកជំទាវត្រូវបានក្រុមហ៊ុន Hollywood អញ្ជើញលោកជំទាវចូលរួមជាកិត្តិយស ក្នុងមហោស្រពនៅទីក្រុងកាន នាប្រទេសបារាំង ៕
ចែករំលែកព័តមាននេះ