រាជធានីភ្នំពេញ៖ វិចិត្រករគំនូរ ដើមកំណើតពីប្រទេសសិង្ហបុរី លោក ចូស្វ័រ ឆាំង (Joshua Chiang) ប្រារព្ធខួប 10…
រាជធានីភ្នំពេញ៖ វិចិត្រករគំនូរ ដើមកំណើតពីប្រទេសសិង្ហបុរី លោក ចូស្វ័រ ឆាំង (Joshua Chiang) ប្រារព្ធខួប 10 ឆ្នាំ នៃការនិទានរឿងតាមលក្ខណៈរូបភាព តាមរយៈការតាំងពិព័រណ៍ទោលលើកដំបូងរបស់លោក ក្រោមចំណងជើង មករា និង ម៉ូតូឌុប៖ ដំណើរ 10ឆ្នាំ របស់ ចូស្វ័រ ឆាំង (Joshua Chiang) (Makaras and Motordops: Joshua Chiang’s 10-Year Journey) ដែលធ្វើឡើងនៅ Plantation Urban Resort and Spa នៅថ្ងៃទី29 ខែមីនា ឆ្នាំ2026 ក្រោមវត្តមាន ឯកឧត្តម ឯកអគ្គរដ្ឋទូតតែងតាំង ស្ទីវិន ផាំង និងភ្ញៀវកិត្តិយសជាច្រើននាក់ ។
ការតាំងពិព័រណ៍នេះនឹងបន្តរហូតដល់ថ្ងៃទី30 ខែឧសភា ឆ្នាំ2026 ដោយបង្ហាញនូវស្នាដៃសិល្បៈ “Pile Up” ដ៏មានលក្ខណៈពិសេសរបស់លោក ដែលទទួលបានការបំផុសគំនិតពីជីវិតរស់នៅក្នុងប្រទេសកម្ពុជា ព្រមទាំងមានគោលបំណងលើកកម្ពស់ការយល់ដឹងអំពីសារៈសំខាន់នៃការគោរពសិទ្ធិអ្នកនិពន្ធ និងកិច្ចការពារស្នាដៃបញ្ចេញមតិច្នៃប្រឌិត ។
ក្នុងនាមជាអ្នករស់នៅប្រទេសកម្ពុជាអស់រយៈពេលជាយូរមកហើយ លោក ចូស្វ័រ (Joshua) បានចាប់ផ្តើមការស្រាវជ្រាវផ្នែកសិល្បៈរបស់លោកនៅក្នុងប្រទេសនេះតាំងពីឆ្នាំ2016 តាមរយៈគំនូររូបម៉ូតូដែលដឹកទំនិញលើសទម្ងន់ប្រកបដោយភាពកំប្លុកកំប្លែង ។ រូបភាពនោះហើយគឺជាចំណុចចាប់ផ្តើមនៃការបង្កើតជាសិល្បៈដែលគេស្គាល់ជាទូទៅថា “Pile Up” ដែលជាការរួមបញ្ចូលគ្នាពោរពេញដោយថាមពលនូវរូបភាពមនុស្ស សត្វព្រៃ ស្ថាបត្យកម្ម និងវត្ថុប្រើប្រាស់ប្រចាំថ្ងៃ ក្នុងទម្រង់ជាការនិទានរឿងតាមរូបភាពដ៏រស់រវើក ។
តាមរយៈផ្ទាំងទស្សនីយភាពទាំងនេះ លោក ចូស្វ័រ (Joshua) បានផ្តិតយកទិដ្ឋភាពប្រទេស
កម្ពុជាដែលលោកបានស្គាល់ ដែលពោរពេញទៅដោយវប្បធម៌ ប្រវត្តិសាស្ត្រ និងភាពផ្ទុយគ្នា ដែលក្នុងនោះប្រពៃណីបុរាណ និងជីវិតសម័យទំនើបបានរស់នៅទន្ទឹមគ្នាតាមរបៀបដ៏គួរឱ្យភ្ញាក់ផ្អើល។ ស្នាដៃរបស់លោកនឹងផ្តល់ឱកាសឱ្យអ្នកទស្សនាស្វែងយល់ពីប្រទេសនេះដោយភាពទាក់ទាញ ការចង់ដឹងចង់ឃើញ ភាពរីករាយ និងភាពអស្ចារ្យ ។
លោក ចូស្វ័រ (Joshua) បានពន្យល់ថា៖ “សិល្បករភាគច្រើនតែងតែផ្តោតលើប្រធានបទមួយ ឬពីរដែលពួកគេគូរដដែលៗ។ ផ្ទុយទៅវិញ ខ្ញុំចូលចិត្តស្វែងយល់ពីប្រធានបទដ៏សម្បូរបែប និងប្រើប្រាស់បច្ចេកទេសសិល្បៈផ្សេងៗគ្នាក្នុងពេលតែមួយ។ “Pile Up” គឺជាការសាកល្បងរបស់ខ្ញុំក្នុងការបញ្ចូលធាតុផ្សំទាំងនេះឱ្យបានច្រើនតាមដែលខ្ញុំចង់បាននៅក្នុងគំនូរតែមួយ ប៉ុន្តែនៅតែរក្សានូវភាពស៊ីចង្វាក់គ្នា និងភាពជាធ្លុងមួយ ។”
ក្រៅពីការអបអរសាទរដំណើរលើវិថីសិល្បៈរបស់គាត់ លោក ចូស្វ័រ (Joshua) ក៏កំពុងប្រើប្រាស់ការតាំងពិព័រណ៍នេះដើម្បីលើកឡើងអំពីបញ្ហាមួយដែលលោកជឿថាមានសារៈសំខាន់ខ្លាំងសម្រាប់ការរីកចម្រើននៃសហគមន៍ច្នៃប្រឌិតនៅកម្ពុជា គឺការគោរពសិទ្ធិអ្នកនិពន្ធ ។
កម្ពុជាជារដ្ឋហត្ថលេខីនៃអនុសញ្ញាទីក្រុងប៊ែន (Berne Convention) ស្តីពីកិច្ចការពារស្នាដៃអក្សរសាស្ត្រ និងសិល្បៈ ដែលផ្តល់កិច្ចការពារសិទ្ធិអ្នកនិពន្ធដោយស្វ័យប្រវត្តិចំពោះស្នាដៃច្នៃប្រឌិតដើម។ សម្រាប់លោក ចូស្វ័រ (Joshua) ការគោរពច្បាប់ទាំងនេះគឺចាំបាច់ណាស់ក្នុងការជួយជ្រោមជ្រែងដល់សិល្បករជំនាន់ក្រោយរបស់កម្ពុជា ។
លោកបាននិយាយថា៖ “ក្នុងរយៈពេលប៉ុន្មានឆ្នាំចុងក្រោយនេះ ខ្ញុំបានឃើញរលកថ្មីនៃសិល្បករកម្ពុជាដែលមានគំនិតច្នៃប្រឌិត និងការស្រមើស្រមៃខ្ពស់។ ខ្ញុំសង្ឃឹមយ៉ាងមុតមាំថា វានឹងក្លាយជាយុគសម័យរីកចំរើនថ្មីសម្រាប់សិល្បៈកម្ពុជា ប៉ុន្តែការរំលោភសិទ្ធិអ្នកនិពន្ធអាចនឹងបង្ក
ហានិភ័យដល់សន្ទុះនេះ ។”
លោក ចូស្វ័រ (Joshua) បានលើកឡើងថា ការចម្លង និងការលក់ស្នាដៃសិល្បៈដោយគ្មានការអនុញ្ញាត មិនត្រឹមតែធ្វើឱ្យប៉ះពាល់ដល់សិល្បករម្នាក់ៗប៉ុណ្ណោះទេ ប៉ុន្តែថែមទាំងប៉ះពាល់ដល់ប្រព័ន្ធសិល្បៈនៃការច្នៃប្រឌិតទាំងមូលផងដែរ ។
លោកបានបន្ថែមថា៖ “នៅពេលដែលនរណាម្នាក់ចម្លងស្នាដៃសិល្បៈ ហើយបន្លំហត្ថលេខា ពួកគេមិនត្រឹមតែលួចរូបភាពប៉ុណ្ណោះទេ ប៉ុន្តែពួកគេលួចទាំងពេលវេលានៃការស្រាវជ្រាវ ការគិត និងបទពិសោធន៍ផ្ទាល់ខ្លួនជាច្រើនដែលបានបញ្ចូលទៅក្នុងការបង្កើតស្នាដៃនោះ ។”
ការតាំងពិព័រណ៍នេះត្រូវបានរៀបចំឡើងដោយ Plantation Urban Resort and Spa ដែលជាទីតាំងដែលតែងតែគាំទ្រដល់វិស័យសិល្បៈនៅកម្ពុជា និងសហការជាមួយសិល្បករជាប្រចាំ ។
លោក អាឡិចសាន់ឌឺ ឆៃប្លេ (Alexander Scheible) នាយកគ្រប់គ្រងទូទៅនៃ Plantation Urban Resort and Spa បាននិយាយថា៖ “ការរៀបចំការតាំងពិព័រណ៍ និងការគាំទ្រសិល្បករចម្រុះតែងតែជាចំណុចស្នូលនៃកិច្ចខិតខំប្រឹងប្រែងរបស់យើងក្នុងការជួយដល់សហគមន៍សិល្បៈក្នុងស្រុក។ យើងផ្តល់កន្លែងដែលសិល្បករអាចបង្ហាញស្នាដៃរបស់ពួកគេ និងគាំទ្រដល់ភាពច្នៃប្រឌិតរបស់ពួកគេ។”
លោក ឆៃប្លេ (Scheible) ក៏បានសម្តែងការគាំទ្រចំពោះការអំពាវនាវរបស់លោក ចូស្វ័រ (Joshua) សម្រាប់កិច្ចការពារសិទ្ធិអ្នកនិពន្ធឱ្យកាន់តែខ្លាំងផងដែរ ។
លោកបាននិយាយថា “យើងបានឃើញករណីជាច្រើនដែលស្នាដៃដើមមិនត្រូវបានគោរព ហើយមានការចម្លងកើតឡើងបានយ៉ាងឆាប់រហ័ស ដោយធ្វើឱ្យអ្នកបង្កើតស្នាដៃទាំងនោះពុំទទួលបានការទទួលស្គាល់ និងអត្ថប្រយោជន៍ដែលពួកគេសមនឹងទទួលបាន ។”
អ្នកចូលរួមទស្សនានឹងបានឃើញស្នាដៃផ្ទាំងគំនូរ ដែលជាការសម្រិតសម្រាំងរបស់លោក ចូស្វ័រ (Joshua) ដោយដាក់តាំងបង្ហាញតាមខ្នាតទំហំដើម ដែលនឹងផ្តល់ឱកាសឱ្យអ្នកទស្សនាបានគយគន់ការនិទានរឿងដ៏ស្មុគស្មាញ និងព័ត៌មានលម្អិតនៅក្នុងស្នាដៃនីមួយៗ។ ពិព័រណ៍នេះក៏នឹងមានការដាក់បង្ហាញនូវគំនូរព្រាង គំនូរទឹកខ្មៅដើម និងការសិក្សាអំពីពណ៌ដែលមិនធ្លាប់បានបង្ហាញពីមុនមក ដើម្បីផ្តល់ជូននូវការស្វែងយល់នៃដំណើរការច្នៃប្រឌិតរបស់លោក ។
ការតាំងពិព័រណ៍នេះក៏ជាការគូសបង្ហាញពីការឈាន ចូលជំពូកថ្មីក្នុងអាជីពសិល្បៈរបស់លោក ចូស្វ័រ (Joshua) ផងដែរ ។ ខណៈដែលស្នាដៃមុនៗភាគច្រើនរបស់លោកត្រូវបានបង្កើតឡើងតាមបែបឌីជីថល ដោយបច្ចុប្បន្ននេះលោកបានចាប់ផ្តើមត្រឡប់មកប្រើប្រាស់ឧបករណ៍បុរាណវិញ ដូចជាជក់ទឹកខ្មៅ និងកូល័រទឹក ដែលនាំមកនូវសិល្បៈបែប “ភាពចៃដន្យដ៏រីករាយ” (Happy accidents) ដែលកើតចេញពីការគូរដោយដៃ ។
លោក ចូស្វ័រ (Joshua) បាននិយាយថា៖ “ស្នាដៃសិល្បៈដ៏ល្អបំផុតគឺជាការរួមបញ្ចូលគ្នាយ៉ាងផ្ចិតផ្ចង់រវាងជំនាញ និងភាពចៃដន្យដ៏រីករាយ ។ ការច្នៃប្រឌិតពិតប្រាកដគឺទាមទារឱ្យមានការប្រថុយប្រថាន។”
ពិព័រណ៍នេះនឹងបើកសម្ពោធរួមជាមួយពិធីទទួលស្វាគមន៍នៅថ្ងៃអាទិត្យ ទី29 ខែមីនា ឆ្នាំ2026 ចាប់ពីម៉ោង 4 រសៀល ដល់ម៉ោង 7 យប់ ដែលមានការថ្លែងសុន្ទរកថាបើកដោយសិល្បករ ការលេងតន្ត្រីដោយក្រុម The Dropping Shoes និងការសម្តែងតន្ត្រីពិសេសដោយ លោក ចូស្វ័រ (Joshua) ផ្ទាល់ ។ ភ្ញៀវកិត្តិយសនឹងមានឱកាសជួបជាមួយសិល្បករ និងពិសារអាហារសម្រន់ផងដែរ ។
ព័ត៌មានលម្អិតអំពីព្រឹត្តិការណ៍ការតាំងពិព័រណ៍៖ មករា និង ម៉ូតូឌុប៖ ដំណើរ 10ឆ្នាំ របស់ ចូស្វ័រ ឆាំង (Joshua Chiang) (Makaras and Motordops: Joshua Chiang’s 10-Year Journey)
សិល្បករ៖ ចូស្វ័រ ឆាំង (Joshua Chiang)
ពិធីបើក៖ ថ្ងៃអាទិត្យ ទី29 ខែមីនា ឆ្នាំ2026 ម៉ោង 4 រសៀល – 7 យប់
កាលបរិច្ឆេទតាំងពិព័រណ៍៖ ថ្ងៃទី29 ខែមីនា ដល់ថ្ងៃទី30 ខែឧសភា ឆ្នាំ2026
ទីតាំង៖ Plantation Urban Resort and Spa
ការចូលទស្សនា៖ ឥតគិតថ្លៃ
ព័ត៌មានទំនាក់ទំនង៖
សម្រាប់ការស្នើសុំសម្ភាសន៍ ឬការសាកសួរព័ត៌មាន។
ឈ្មោះ៖ ចូស្វ័រ ឆាំង (Joshua Chiang)
ទូរសព្ទ/តេលេក្រាម៖ +855 95 424 565
អ៊ីមែល៖ joshuachiangsl@gmail.com ។
ឬលោកអ្នកអាចមកកាន់ទីតាំងលក់ផ្ទាល់ នៅខេត្តសៀមរាប ជិត Pub Street – CamCam by Joshua Chiang https://www.CamCamCambodia.com ។
សារពីសិល្បករ
ក្នុងរយៈពេល 13 ឆ្នាំ នៃការរស់នៅ និងធ្វើការនៅក្នុងប្រទេសកម្ពុជារបស់ខ្ញុំ រឿងមួយដែលធ្វើឱ្យខ្ញុំមានក្តីរំភើបបំផុត គឺបានឃើញនូវការលេចរូបរាងឡើងនៃសិល្បករក្នុងស្រុកជំនាន់ថ្មីជាច្រើន ដែលពោរពេញទៅដោយការស្រមៃដ៏អស្ចារ្យ និងមានឆន្ទៈខ្ពស់។
នៅពេលដែលរូបភាពដ៏ទាក់ទាញអាចត្រូវបានបង្កើតឡើងត្រឹមតែរយៈពេលប៉ុន្មានវិនាទីតាម រយៈបញ្ញាសិប្បនិម្មិតការសម្រេចចិត្តបង្កើតស្នាដៃគំនូរដើមដោយដៃហាក់ដូចជារឿងមួយដែលហួសសម័យ។ ទោះជាយ៉ាងណាក៏ដោយ វាអាចបង្ហាញពីឥទ្ធិពលខ្លាំងក្លាមួយ ភាពក្លាហាន ភាពស្មោះត្រង់ និងការប្តេជ្ញាចិត្តចំពោះភាពជាម្ចាស់នៃស្នាដៃគំនូរ។
ការបង្កើតស្នាដៃគំនូរដើម គឺជៀសមិនផុតពីហានិភ័យនៃការចម្លងស្នាដៃគំនូរនោះដោយគ្មានការអនុញ្ញាត។ ខ្ញុំធ្លាប់បានជួបប្រទះបញ្ហានេះចំនួនពីរដងរួចមកហើយ។ ក្នុងករណីមួយ អ្នកទិញមួយរូបបានគិតថា ការកាន់កាប់ស្នាដៃគំនូរអោយសិទ្ធិពួកគេក្នុងការថតស្កេន ពង្រីក និងផលិតឡើងវិញសម្រាប់គោលបំណងពាណិជ្ជកម្ម។ករណីមួយទៀត មានស្នាដៃគំនូរដោយដៃដែលចម្លងពីរូបភាពដើមរបស់ខ្ញុំ ត្រូវបានផ្សព្វផ្សាយលក់តាមអ៊ីនធឺណិត ដោយលុបហត្ថលេខារបស់ខ្ញុំចេញ ហើយជំនួសដោយហត្ថលេខាផ្សេង។
ក្នុងនាមខ្ញុំជាសិល្បករ និងក្នុងនាមអ្នកទាំងអស់គ្នាដែលជាអ្នកគាំទ្រសិល្បៈ ខ្ញុំជឿថា យើងសុទ្ធតែមានតួនាទីរួមគ្នាមួយក្នុងការជួយជ្រោមជ្រែងដល់សិល្បករជំនាន់ក្រោយនេះ។ ដើម្បីឱ្យ សហគមន៍ច្នៃប្រឌិតអាចរីកចម្រើនទៅមុខបាន ស្នាដៃគំនូរដើម ត្រូវតែទទួលបាននូវការគោរព និងការការពារ។
ក្នុងករណីទាំងពីរនេះ ខ្ញុំអាចដោះស្រាយបញ្ហាបានយ៉ាងឆាប់រហ័ស មុនពេលការរំលោភនេះរីករាលដាល។ ប៉ុន្តែពួកគេជាបទពិសោធន៍ដែលតានតឹងខ្លាំង។ ៕ អត្ថបទសហការ
ចែករំលែកព័តមាននេះ