រាជធានីភ្នំពេញ ៖ ស្ថានទូតចិនប្រចាំកម្ពុជា បានធ្វើការបំភ្លឺជុំវិញករណីអ្នកលេងជនជាតិចិនមួយក្រុម ដែលថតវីដេអូឃ្លីបគំរាមបង្កអសន្តិសុខនៅខេត្តព្រះសីហនុ លើទំព័រហ្វេសប៊ុកផ្លូវការកាលពីយប់ថ្ងៃទី១៧ ខែឧសភាដោយគូសបញ្ជាក់ថា ការថតវីដេអូឃ្លីបក្នុងខ្លឹមសារមិនល្អប៉ះពាល់ដល់សន្តិសុខប្រទេសកម្ពុជា ពីសំណាក់ជនជាតិចិនមួយក្រុមនាពេលកន្លងមក គឺធ្វើឡើងបន្ទាប់ពីពួកគេស្រវឹងស្រា…
រាជធានីភ្នំពេញ ៖ ស្ថានទូតចិនប្រចាំកម្ពុជា បានធ្វើការបំភ្លឺជុំវិញករណីអ្នកលេងជនជាតិចិនមួយក្រុម ដែលថតវីដេអូឃ្លីបគំរាមបង្កអសន្តិសុខនៅខេត្តព្រះសីហនុ លើទំព័រហ្វេសប៊ុកផ្លូវការកាលពីយប់ថ្ងៃទី១៧ ខែឧសភាដោយគូសបញ្ជាក់ថា ការថតវីដេអូឃ្លីបក្នុងខ្លឹមសារមិនល្អប៉ះពាល់ដល់សន្តិសុខប្រទេសកម្ពុជា ពីសំណាក់ជនជាតិចិនមួយក្រុមនាពេលកន្លងមក គឺធ្វើឡើងបន្ទាប់ពីពួកគេស្រវឹងស្រា និងថាវាជាការថតវីដេអូលេងសើចប៉ុណ្ណោះ។ ក្នុងការប្រកាសជាភាសាខ្មែរ ស្ថានទូតចិនប្រចាំនៅកម្ពុជាបានសង្កត់ធ្ងន់ថា ជនជាតិចិនដែលថតវីដេអូឃ្លីបគំរាមបង្កអសន្តិសុខនៅខេត្តព្រះសីហនុនោះ ធ្លាប់បានមកធ្វើការនៅប្រទេសកម្ពុជា កាលពីខែមីនា ឆ្នាំ២០១៩ ។
សមត្ថកិច្ចចិនស្រាវជ្រាវរកឃើញថា ជនជាតិចិនទាំងជាង១០នាក់ដែលមានវត្តមាននៅក្នុងវីដេអូឃ្លីបនោះ មិនមានជាប់ពាក់ព័ន្ធនឹងក្រុមសង្គមងងឹតណាមួយឡើយ បើទោះបីជាពួកគេបានថតវីដេអូឃ្លីប មានខ្លឹមសារមិនល្អ ប៉ះពាល់ដល់សន្តិសុខប្រទេសកម្ពុជាក៏ដោយ។ បើតាមការគូសបញ្ជាក់របស់ស្ថានទូតចិន ការថតវីដេអូឃ្លីបក្នុងខ្លឹមសារមិនល្អរបស់ពួកគេ ធ្វើឡើងបន្ទាប់ពីស្រវឹងស្រា និងជាការលេងសើចប៉ុណ្ណោះ ។
ការបំភ្លឺរបស់ស្ថានទូតចិននេះ គឺធ្វើឡើងបន្ទាប់ពីមានការប្រកាសថ្កោលទោសធ្ងន់ៗទៅលើពួកអ្នកលេងជនជាតិចិន១ក្រុមនោះ ដោយបានរួមសហការជាមួយសមត្ថកិច្ចកម្ពុជា ក្រោយពេលដែលវីដេអូឃ្លីបមួយរបស់ជនជាតិចិនមួយក្រុមដែលអះអាងថាពួកគេមកពីទីក្រុងឆុងឆឹង ។ ពួកគេបាននិយាយជាភាសាចិន ក្នុងន័យគំរាមបង្កភាពវឹកវរ អសន្តិសុខនៅលើទឹកដីខេត្តព្រះសីហនុ៣ឆ្នាំក្រោយ បើចង់ឱ្យវឹកវរគឺវឹកវរ ។
ភ្លាមៗក្រោយពីបានឃើញវីដេអូឃ្លីបនេះ សមត្ថកិច្ចកម្ពុជានិងចិន បានសហការគ្នាស្រាវជ្រាវរកវែកមុខជនជាតិចិនមួយក្រុមនេះ ដើម្បីយកមកផ្តន្ទាទោសតាមច្បាប់ជាធរមាន ។ តាមរយៈការស្រាវជ្រាវរបស់សមត្ថកិច្ចកម្ពុជា បានអះអាងថា ជនជាតិចិនមួយក្រុមនេះមិនមានវត្តមាននៅក្នុងប្រទេសកម្ពុជាទេ និងក្រោយមកស្ថានទូតចិនក៏បានប្រកាសពីការស្រាវជ្រាវរបស់ខ្លួនលើក្រុមជនជាតិចិនទាំងនោះដែរ តែភាគីចិនមិនបានបញ្ជាក់អំពីការចាប់ខ្លួនឬចាត់វិធានការយ៉ាងណាចំពោះជនជាតិចិនមួយក្រុមនេះឡើយ។
ស្ថានទូតចិនគ្រាន់តែសង្កត់ធ្ងន់ថា ឆ្នាំនេះគឺជាឆ្នាំសហប្រតិបត្តិការអនុវត្តច្បាប់រវាងចិននិងកម្ពុជា ហើយភាគីទាំងពីរនឹងចាត់វិធានការជាក់ស្ដែង ធ្វើឲ្យកាន់តែស៊ីជម្រៅលើកិច្ចសហប្រតិបត្តិការផ្នែកសន្តិសុខ និងការអនុវត្តច្បាប់ ដែលនឹងនាំមកនូវភាពសុខដុមរមនា និងអត្ថប្រយោជន៍ជូនដល់ប្រជាជននៃប្រទេសទាំងពីរ ៕
ចែករំលែកព័តមាននេះ