ខេត្តកណ្តាល ៖ ជនសង្ស័យប្រុសស្រីចំនួន៣នាក់ បានត្រូវសមត្ថកិច្ចតាមចាប់វាយខ្នោះ ខណៈបន្លំធ្វើជាអ្នកទិញខោអាវ លុះពេលឃើញជនរងគ្រោះរវល់ ឆ្លៀតឱកាសលួចរូតកាបូបយកលុយអស់ជាង១ពាន់ដុល្លារ ហើយនាំគ្នារត់គេចខ្លួន។ ហេតុការណ៍ខាងលើនេះបានកើតឡើងកាលពីវេលាម៉ោង៧និង៣៥នាទីថ្ងៃទី១៨ ខែឧសភា…
ខេត្តកណ្តាល ៖ ជនសង្ស័យប្រុសស្រីចំនួន៣នាក់ បានត្រូវសមត្ថកិច្ចតាមចាប់វាយខ្នោះ ខណៈបន្លំធ្វើជាអ្នកទិញខោអាវ លុះពេលឃើញជនរងគ្រោះរវល់ ឆ្លៀតឱកាសលួចរូតកាបូបយកលុយអស់ជាង១ពាន់ដុល្លារ ហើយនាំគ្នារត់គេចខ្លួន។
ហេតុការណ៍ខាងលើនេះបានកើតឡើងកាលពីវេលាម៉ោង៧និង៣៥នាទីថ្ងៃទី១៨ ខែឧសភា ឆ្នាំ២០១៩ នៅចំណុចតូបលក់ដូរក្នុងភូមិកំពង់ស្វាយ២ ឃុំកំពង់ស្វាយ ស្រុកកៀនស្វាយ ខេត្តកណ្តាល ។
ជនរងគ្រោះឈ្មោះគា ស្រីមុំ ភេទស្រី អាយុ២៨ឆ្នាំ មុខរបរលក់ខោអាវ មានទីលំនៅភូមិព្រែកតានប់ ឃុំកំពង់ស្វាយស្រុកកៀនស្វាយ ខេត្តកណ្តាល ។
ចំណែកជនសង្ស័យទាំង៣នាក់ខាងលើរួមមាន ១-ឈ្មោះទិត្យ អេះ ភេទប្រុស អាយុ៣១ឆ្នាំ មានទីលំនៅភូមិពាមមន្ទា ឃុំពាមមន្ទា ស្រុកកំពង់ត្របែក ខេត្តព្រៃវែង ស្នាក់នៅផ្ទះជួល ក្នុងសង្កាត់ចាក់អង្រែ ខណ្ឌមានជ័យ រាជធានីភ្នំពេញ ជាអ្នកបើកបរម៉ូតូ ២-ឈ្មោះ ពិន ភីរ៉ាត់ ភេទស្រី អាយុ៦៥ឆ្នាំ មុខរបរមិនពិតប្រាកដ មានទីលំនៅភូមិភ្នំតូច ស្រុកបាទីខេត្តតាកែវ ៣-ឈ្មោះឡឹង គន្ធា ភេទស្រី អាយុ៦៩ឆ្នាំ មុខរបរមិនពិតប្រាកដ មានទីលំនៅភូមិ ឃុំ ស្រុកកោះធំខេត្តកណ្តាល ។ រីឯវត្ថុតាងចាប់យកមានម៉ូតូហុងដាឌ្រីម ធុន១២៥ ស៊េរីឆ្នាំ២០១២ ពាក់ស្លាកលេខ ភ្នំពេញ ១BJ-៥៤៥២ ពណ៌ខ្មៅ ជារបស់ជនសង្ស័យទិត្យ អេះ ។
តាមប្រភពពីសាក្សីបានប្រាប់អោយដឹងថា នៅវេលាកើតហេតុ ជនរងគ្រោះកំពុងបញ្ចុកបាយកូននៅក្នុងតូបលក់ដូរ ពេលនោះជនសង្ស័យជាស្ត្រី២នាក់បានចូលមកសួររកទិញខោអាវ ឆ្លៀតពេលនោះជនសង្ស័យឈ្មោះពិន ភីរ៉ាត់ បានចូលរួតកាបូបដាក់លុយរបស់ជនរងគ្រោះយលុយចំនួន១.១៩៥ដុល្លារ រួចនាំគ្នាឡើងជិះម៉ូតូគេចខ្លួនទៅភ្នំពេញ ។
តាមប្រភពដដែលបានបន្តថា ពេលនោះជនរងគ្រោះបានឃើញក្រដាសប្រាក់១០០ដុល្លារជ្រុះនៅក្បែរកាបូបលុយ ក៏សួរទៅប្តីថា «មានរូតកាបូបលុយអត់?» ពេលនោះប្តីបានឆ្លើយថា មិនបានរូតកាបូបទេ រួចក៏នាំគ្នាបើកកាបូបមើលទើបដឹងថាបាត់លុយចំនួន១.១៩៥ដុល្លារ បន្ទាប់មកប្តីរបស់ជនរងគ្រោះក៏ជិះម៉ូតូដេញតាមជនសង្ស័យ រហូតដល់ចំណុចវត្តព្រែកដូង ហើយជនសង្ស័យក៏ដកលុយបាចតាមផ្លូវ ពេលនោះប្តីរបស់ជនរងគ្រោះក៏ឈប់រើសបានចំនួន៨៨៥ដុល្លារ និងទាក់ទងឲ្យកម្លាំងប៉ុស្តិ៍នគរបាលរដ្ឋបាលឈើទាលជួយស្ទាក់ចាប់ និងឃាត់ខ្លួនជនសង្ស័យនាំមកប៉ុស្តិ៍នគរបាលរដ្ឋបាលកំពង់ស្វាយដើម្បីសួរនាំតែម្តង ។
នៅចំពោះមុខសមត្ថកិច្ច ជនសង្ស័យទាំង៣នាក់បានឆ្លើយសារភាពថា ខ្លួនពិតជាបានធ្វើសកម្មភាពខាងលើប្រាកដមែន ។ បច្ចុប្បន្ន ជនសង្ស័យទាំង៣នាក់ត្រូវបានសមត្ថកិច្ចបញ្ជូនមកអធិការដ្ឋាននគរបាលស្រុកដើម្បីកសាងសំណុំរឿងចាត់ការតាមនីតិវិធី៕
ចែករំលែកព័តមាននេះ