ប្រទេសហ្វ៊ីលីពីន ៖ ប្រទេសហ្វ៊ីលីពីនបានហៅឯកអគ្គរដ្ឋទូត និងបណ្ដាកុងស៊ុលរបស់ខ្លួនដែលមានវត្តមាននៅកាកាណាដា ឲ្យត្រឡប់មកស្រុកវិញ ដោយសារតែវិបត្តិកាកសំណល់ បន្ទាប់ពីក្រុងអូតាវ៉ាពុំបានធ្វើសកម្មភាពណាមួយសោះ ដើម្បីប្រមូលយកចេញកាកសំណល់ជាច្រើនតោន ដែលបន្សល់ទុកចោលនៅហ្វ៊ីលីពីនចាប់តាំងពីច្រើនឆ្នាំមកហើយ។ ការសម្រេចចិត្តនោះកើតមានបន្ទាប់ពីការគំរាមកំហែងធ្វើសង្គ្រាម…
ប្រទេសហ្វ៊ីលីពីន ៖ ប្រទេសហ្វ៊ីលីពីនបានហៅឯកអគ្គរដ្ឋទូត និងបណ្ដាកុងស៊ុលរបស់ខ្លួនដែលមានវត្តមាននៅកាកាណាដា ឲ្យត្រឡប់មកស្រុកវិញ ដោយសារតែវិបត្តិកាកសំណល់ បន្ទាប់ពីក្រុងអូតាវ៉ាពុំបានធ្វើសកម្មភាពណាមួយសោះ ដើម្បីប្រមូលយកចេញកាកសំណល់ជាច្រើនតោន ដែលបន្សល់ទុកចោលនៅហ្វ៊ីលីពីនចាប់តាំងពីច្រើនឆ្នាំមកហើយ។
ការសម្រេចចិត្តនោះកើតមានបន្ទាប់ពីការគំរាមកំហែងធ្វើសង្គ្រាម ប្រឆាំងកាណាដាពីសំណាក់ប្រធានាធិបតីលោកRODRIGO DUTERTE ប្រសិនបើគ្មានអ្វីផ្លាស់ប្ដូរទេនោះ។ រដ្ឋមន្ត្រីការបរទេសហ្វ៊ីលីពីន លោកTEODORO LOCSIN JR.កាលពីថ្ងៃទី១៦ឧសភាបានសរសេរតាមTWITTERថា ហ្វ៊ីលីពីននឹងរក្សាទុកវត្តមានការទូត ក្នុងកម្រិតតិចរហូតដល់កាកសំណល់របស់កាណាដា ត្រូវបានបញ្ជូនចេញ។
កាលពីខែមេសាប្រធានាធិបតីហ្វ៊ីលីពីនបានគំរាមបញ្ជូនដោយកម្លាំង បណ្ដាកុងតឺន័រកាកសំណល់ទៅកាណាដា ឬនឹងយកទៅដាក់ក្នុងស្ថានទូតប្រទេសនេះប្រចាំក្រុងម៉ានីល ប្រសិនបើអាជ្ញាធរកាណាដា មិនប្រមូលយកចេញទេនោះ។ កាលបរិច្ឆេទកំណត់ត្រឹមថ្ងៃទី១៥ឧសភា។
កាលពីដើមខែឧសភាកាណាដា ធ្លាប់ប្រកាសពីការបញ្ជូនទៅប្រទេសខ្លូនវិញបណ្ដាកាកសំណល់ដែលនាំមកកាន់ហ្វ៊ីលីពីន ប៉ុន្តែបណ្ដាអ្នកទទួលខុសត្រូវកាណាដា រហូតមកទល់ពេលនេះនៅពុំទាន់ចាត់វិធានការណាមួយនៅឡើយ។ ម្យ៉ាងវិញទៀតប្រធានាធិបតីបានគំរាមប្រកាសសង្គ្រាម ប្រសិនបើកាណាដាពុំដោះស្រាយជាបន្ទាន់នូវសភាពការណ៍នេះទេ។
រវាងពីឆ្នាំ២០១៣ទៅ២០១៤ កាកសំណល់តាមផ្ទះយ៉ាងតិច១០៣កុងតឺន័រ ក្នុងនោះមានសម្បកដបព្រមទាំងថង់ប្លាស្ទិកនានា ក្រដាសកាសែតនិងកាកសំណល់ឯទៀតៗ ត្រូវបានបញ្ជូនពីកាណាដាមកហ្វ៊ីលីពីន។ កុងតឺន័រទាំងនេះភាគច្រើនស្ថិតនៅកំពង់ផែ២នៃក្រុងម៉ានីល ដែលនាំឲ្យមានបាតុកម្មនានា របស់ពួកសកម្មជនការពារបរិស្ថាន។ បណ្ដាអ្នកទទួលខុសត្រូវហ្វ៊ីលីពីនអះអាងថា កុងតឺន័រទាំងនោះបានក្លែងការប្រកាសដោយសហគ្រាសឯកជនមួយ ថាជាកាកសំណល់ប្លាស្ទិកដែលយកមកកែច្នៃ។ អ្នកទទួលខុសត្រូវទាំងនេះបានស្នើដល់កាណាដាឲ្យនាំកាកសំណល់ទាំងនេះចេញទៅវិញ។
ក្នុងឱកាសមកបំពេញទស្សនកិច្ចនៅហ្វ៊ីលីពីនកាលពីខែវិច្ឆិកាឆ្នាំ២០១៧ នាយករដ្ឋមន្ត្រីកាណាដា លោកJUSTIN TRUDEAUធ្លាប់សន្យាថា នឹងយកចិត្តទុកដាក់ដើម្បីដោះស្រាយកាកសំណល់ផ្សេងៗ ព្រមទាំងកាកសំណល់ប្លាស្ទិកចំនួន២០០០តោនដែលស្តុកទុកនៅក្រុងម៉ានីល៕
ចែករំលែកព័តមាននេះ