សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) បានចេញឱសានវាទរយៈពេល៤៨ម៉ោង ដោយគំរាមកំហែងកម្ទេចចោលនូវបណ្តារោងចក្រថាមពលអ៊ីរ៉ង់…
សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) បានចេញឱសានវាទរយៈពេល៤៨ម៉ោង ដោយគំរាមកំហែងកម្ទេចចោលនូវបណ្តារោងចក្រថាមពលអ៊ីរ៉ង់ ប្រសិនបើប្រទេសនេះ មិនព្រមបើកច្រកសមុទ្រហ័រមូស (Hormuz)។ នេះបើតាមប្រភពពី Reuters, BBC និង The Guardian បានចេញផ្សាយនៅថ្ងៃទី២២ ខែមីនា ឆ្នាំ២០២៦។
លោក ត្រាំ បានបង្ហោះសារលើបណ្តាញសង្គម Truth Social កាលពីយប់នៅថ្ងៃទី ២១ ខែមីនា ឆ្នាំ២០២៦ (ម៉ោងនៅសហរដ្ឋអាមេរិក) ថា «ប្រសិនបើអ៊ីរ៉ង់មិនព្រមបើកច្រកហ័រមូសទាំងស្រុងដោយគ្មានការគំរាមកំហែងណាមួយក្នុងរយៈពេល៤៨ម៉ោងទេ នោះសហរដ្ឋអាមេរិកនឹងវាយប្រហារ និងកម្ទេចរោងចក្រថាមពលផ្សេងៗរបស់ពួកគេ ដោយចាប់ផ្តើមពីរោងចក្រធំបំផុតមុន»។
ការគំរាមកំហែងនៃការវាយប្រហាររបស់អ៊ីរ៉ង់បានរារាំងកប៉ាល់ដឹកជញ្ជូនភាគច្រើនពីការឆ្លងកាត់ច្រកហ័រមូស ដែលជាច្រកទឹកដ៏តូចចង្អៀតមួយបម្រើជាផ្លូវដឹកជញ្ជូនសម្រាប់ការផ្គត់ផ្គង់ប្រេង និងឧស្ម័នធម្មជាតិរាវ (LNG) ប្រហែល១ភាគ៥របស់ពិភពលោក ដែលបង្កឱ្យតម្លៃប្រេងឆៅកើនឡើងលើសពី ១០០ ដុល្លារក្នុង១បារ៉ែល (ធុង) និងបានឃើញតម្លៃហ្គាសនៅអឺរ៉ុបកើនឡើងរហូតដល់ ៣៥% កាលពីសប្តាហ៍មុន។
ទីបញ្ជាការយោធាអ៊ីរ៉ង់ Khatam al-Anbiya នៅថ្ងៃទី២២ ខែមីនា ឆ្នាំ២០២៦ បានគំរាមបកវិញថា ប្រសិនបើសហរដ្ឋអាមេរិកវាយប្រហារហេដ្ឋារចនាសម្ព័ន្ធប្រេងឥន្ទនៈ និងថាមពលអ៊ីរ៉ង់ នោះអ៊ីរ៉ង់នឹងកំណត់គោលដៅលើហេដ្ឋារចនាសម្ព័ន្ធថាមពល បច្ចេកវិទ្យាព័ត៌មាន និងប្រព័ន្ធបំលែងទឹកប្រៃទៅជាទឹកសាបទាំងអស់របស់អាមេរិកនៅក្នុងតំបន់។
តម្លៃប្រេង និងឧស្ម័នបានកើនឡើងខ្ពស់កាលពីសប្តាហ៍មុន បន្ទាប់ពីអ៊ីរ៉ង់បានវាយប្រហារសងសឹកនឹងការវាយប្រហាររបស់អ៊ីស្រាអែលលើវាលឧស្ម័នដ៏សំខាន់របស់ខ្លួន តាមរយៈការវាយប្រហារមជ្ឈមណ្ឌលឧស្សាហកម្ម Ras Laffan របស់ប្រទេសកាតា ដែលដំណើរការឧស្ម័នធម្មជាតិរាវប្រហែល១ភាគ៥របស់ពិភពលោក ដែលបណ្តាលឱ្យខូចខាតធ្ងន់ធ្ងរដោយនឹងចំណាយពេលច្រើនឆ្នាំ ដើម្បីជួសជុលស្តារឡើងវិញ៕
ចែករំលែកព័តមាននេះ