កម្ពុជា-វៀតណាមសន្យាបន្តទំនាក់ទំនង និងកិច្ចសហប្រតិបត្តិការលើវិស័យកងទ័ព
មេទ័ពជើងគោកកម្ពុជាឧត្តមសេនីយឯក ហ៊ុន ម៉ាណែត អគ្គមេបញ្ជាការរងកងយោធពល ខេមរភូមិន្ទ និងលោកឧត្តមសេនីយ ផាន់ វ៉ាន់ហ្សាង ( Phan…
មេទ័ពជើងគោកកម្ពុជាឧត្តមសេនីយឯក ហ៊ុន ម៉ាណែត អគ្គមេបញ្ជាការរងកងយោធពល ខេមរភូមិន្ទ និងលោកឧត្តមសេនីយ ផាន់ វ៉ាន់ហ្សាង ( Phan…
មេទ័ពជើងគោកកម្ពុជាឧត្តមសេនីយឯក ហ៊ុន ម៉ាណែត អគ្គមេបញ្ជាការរងកងយោធពល ខេមរភូមិន្ទ និងលោកឧត្តមសេនីយ ផាន់ វ៉ាន់ហ្សាង ( Phan Van Giang ) អនុរដ្ឋមន្ត្រីទី១ ក្រសួង ការពារប្រទេស និងជាប្រធានអគ្គសេនាធិការកងទ័ពប្រជាជនវៀតណាមបានសន្យារួមគ្នាថា នឹងបន្តពង្រឹងពង្រីកទំនាក់ទំនងកិច្ចសហប្រតិបត្តិការលើវិស័យកងទ័ពនៃប្រទេសទាំងពីរឲ្យកាន់តែរឹងមាំបន្ថែមទៀត ។
ការសន្យារួមគ្នានោះត្រូវបានធ្វើឡើងក្នុងឱកាសដែលឧត្តមសេនីយឯក ហ៊ុន ម៉ាណែត ដឹកនាំ គណប្រតិភូកងទ័ពជើងគោកកម្ពុជាទៅបំពេញបេសសកម្មផ្លូវការនៅប្រទេសវៀតណាមកាលពីថ្ងៃទី១៥ ខែឧសភា ឆ្នាំ២០១៩ ហើយបានចូលជួបសម្តែងការគួរសម និងពិភាក្សាការងារជាមួយឧត្តមសេនីយ ផាន់ វ៉ាន់ហ្សាង អនុរដ្ឋមន្ត្រីទី១ ក្រសួងការពារប្រទេសវៀតណាម ។ នាឱកាសនោះលោក ផាន់ វ៉ាន់ហ្សាង ( Phan Van Giang ) បានទទួលស្វាគមន៍យ៉ាងកក់ក្តៅបំផុតចំពោះវត្តមានរបស់ឧត្តមសេនីយ៍ឯក ហ៊ុន ម៉ាណែត និងគណៈប្រតិភូនៃកងទ័ពជើងគោកកម្ពុជា ខណៈដែលឧត្តមសេនីយ៍ឯក និងគណៈប្រតិភូបានមកបំពេញបេសកកម្មផ្លូវការនៅ ក្នុងប្រទេសវៀតណាមនាពេលនេះ ។
លោកក៏បានលើកឡើងថា ប្រទេសវៀតណាម និងប្រទេសកម្ពុជាជាប្រទេសជិតខាង និងមានប្រវត្តិសាស្ត្ររួមគ្នាក្នុងការប្រយុទ្ធ ដើម្បីឯករាជ្យអធិបតេយ្យភាពសម្រាប់ប្រទេសរៀងៗខ្លួន ។ លោកបន្តថា កងទ័ពប្រជាជនវៀតណាមនៅតែបន្តពង្រឹង និងពង្រីកទំនាក់ទំនងល្អជាមួយកង យោធពល ខេមរភូមិន្ទ និងបន្តគាំទ្រកងយោធពលខេមរភូមិន្ទក្នុងការអភិវឌ្ឍសមត្ថភាពយោធិន ។
ឧត្តមសេនីយ៍ឯក ហ៊ុន ម៉ាណែត ក៏បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាល និងកងទ័ពប្រជាជនវៀតណាមដែលបាន និងបន្តគាំទ្រដល់កងយោធពលខេមរភូមិន្ទទាំងក្នុងសម័យសង្គ្រាម និងពេលបច្ចុប្បន្ន ហើយនឹងបន្តទៅពេលអនាគតទៀត ។ លោកឧត្តមសេនីយ មានជំនឿថា ដំណើរទស្សនកិច្ចនេះនឹងបន្តពង្រឹង និងពង្រីកទំនាក់ទំនងដ៏រឹងមាំរវាងកងទ័ពនៃប្រទេសទាំងពីរឆ្ពោះទៅការអភិវឌ្ឍន៍វិស័យកងទ័ពកាន់តែខ្លាំងពូកែ ដើម្បីការពារបូរណភាពទឹកដីរៀងៗខ្លួន ៕
ចែករំលែកព័តមាននេះ