រដ្ឋមន្ត្រីទេសចរណ៍ហាមអ្នកដឹកនាំទេស ចរណ៍ កុំជូនលុយ…
- ភ្នំពេញ
រាជធានីភ្នំពេញ ៖ រដ្ឋមន្ត្រីក្រសួងទេសចរណ៍ លោក ថោង ខុន បានហាមយ៉ាងដាច់ណាត់ មិនឲ្យអ្នកដឹកនាំក្រុមទេសចរ (Tour Leaders)…
រាជធានីភ្នំពេញ ៖ រដ្ឋមន្ត្រីក្រសួងទេសចរណ៍ លោក ថោង ខុន បានហាមយ៉ាងដាច់ណាត់ មិនឲ្យអ្នកដឹកនាំក្រុមទេសចរ (Tour Leaders)…
រាជធានីភ្នំពេញ ៖ រដ្ឋមន្ត្រីក្រសួងទេសចរណ៍ លោក ថោង ខុន បានហាមយ៉ាងដាច់ណាត់ មិនឲ្យអ្នកដឹកនាំក្រុមទេសចរ (Tour Leaders) ទាំងឡាយ ជូនលុយក្រៅផ្លូវការទៅមន្ត្រីនគរបាល នៅពេលបោះត្រាលើលិខិតឆ្លងដែន នៅតាមច្រកទ្វារព្រំដែនអន្តរជាតិ ឬព្រលានយន្តហោះអន្តរជាតិ ហើយក៏មិនត្រូវណែនាំឱ្យភ្ញៀវទេសចរបរទេស ប្រព្រឹត្តទង្វើមិនគប្បីបែបនេះឡើយ ព្រោះគ្មានច្បាប់ណាតម្រូវឲ្យធ្វើបែបនេះ
ទេ ។
ការហាមប្រាមនេះ ត្រូវបានធ្វើឡើងក្នុងកិច្ចប្រជុំពេញអង្គលើកទី១ អាណត្តិទី៦ របស់គណៈកម្មការអន្តរក្រសួង ដើម្បីសម្របសម្រួលការធ្វើដំណើរ និងដឹកជញ្ជូនភ្ញៀវទេសចរ និងអ្នកដំណើរនៅតំបន់ច្រកទ្វារព្រំដែនអន្តរជាតិ និងច្រកទ្វារអន្តរជាតិទូទាំងប្រទេស នៅទីស្ដីការក្រសួងទេសចរណ៍ កាលពីពេលថ្មីៗ
នេះ ។
ជាចំណុចដ៏រសើបនេះ ត្រូវបានបង្ហើបដោយនាយឧត្តមសេនីយ៍ គៀត ច័ន្ទថារិទ្ធ អគ្គនាយកនៃអគ្គនាយកដ្ឋានអន្តោប្រវេសន៍ ដោយបញ្ជាក់ឲ្យដឹងថា តាមការរាយការណ៍របស់មន្ត្រីនគរបាលមូលដ្ឋាន មានការឲ្យលុយនៅពេលបោះត្រាលើលិខិតឆ្លងដែន របស់ភ្ញៀវជនជាតិចិនខ្លះ នៅពេលដែលភ្ញៀវយកលិខិតឆ្លងដែននោះ ទៅឲ្យមន្ត្រីនគរបាលបោះត្រា តែមិនច្រើនទេត្រឹម ២០០០រៀល, ៥០០០រៀល ឬ៥យ័នតែប៉ុណ្ណោះ ។
លោកថា «ក៏សូមរាយការណ៍ជូនដែរ បងប្អូនចិននៅខេត្តសៀមរាប ពិសេស Tour Leaders ហ្នឹងហ្មង គាត់រៀបឡើងឡានចេញហើយ គាត់ថាដាក់លុយឱ្យគេក្នុង Passport ទៅ ដើម្បីគេវ៉ៃត្រាឱ្យស្រួលខ្លះ, ខ្ញុំបានតាមដានមើលឃើញដាក់លុយខ្មែរ ២០០០, ៥០០០រៀល បើមិនអ៊ីចឹងទេ៥យ័ន» ។
នាយឧត្តមសេនីយ៍ គៀត ច័ន្ទថារិទ្ធ បានបញ្ជាក់ថា ទោះបីមានបញ្ហានេះកើតឡើងក៏ដោយ លោកនៅតែព្យាយាមឱ្យមន្ត្រីនគរបាលពាក់ព័ន្ធ ដាច់ខាតមិនត្រូវធ្វើយ៉ាងដូច្នោះទេ ព្រោះមិនមែនជាចំណុចល្អ ហើយជាអំពើខុសច្បាប់ ។ លោកឧត្តមសេនីយ៍បានសំណូមពរដល់ក្រសួងទេសចរណ៍ ជួយផ្សព្វផ្សាយដល់អ្នកដឹកនាំក្រុមទេសចរ ឬប្រតិបត្តិករទេសចរណ៍ទាំងអស់ កុំឱ្យបន្តប្រព្រឹត្តនូវចំណុចខាងលើនោះតទៅទៀត ។
ឆ្លើយតបនឹងបញ្ហានេះ លោករដ្ឋមន្ត្រីក្រសួងទេសចរណ៍ បានបញ្ជាទៅមន្ត្រីពាក់ព័ន្ធភ្លាមៗ ពិសេសមន្ទីរទេសចរណ៍គ្រប់រាជធានី-ខេត្ត ដែលបានមកចូលរួមប្រជុំផងដែរ ត្រូវផ្សព្វផ្សាយបញ្ជ្រាបបញ្ហានេះជាបន្ទាន់ ទៅដល់ក្រុមមគ្គុទ្ទេសក៍ទេសចរណ៍ ប្រតិបត្តិករទេសចរណ៍ទាំងអស់ ដាច់ខាតមិនឱ្យប្រព្រឹត្តទង្វើបែបនេះតទៅទៀតឡើយ ។
លោករដ្ឋមន្ត្រីបានព្រមានថា បើមគ្គុទ្ទេសក៍ទេសចរណ៍ ប្រតិបត្តិករទេសចរណ៍ទាំងនោះ នៅតែប្រព្រឹត្តបែបនេះទៀត ត្រូវចាត់វិធានការតាមផ្លូវច្បាប់ ពោលគឺត្រូវរួមគ្នាទប់ស្កាត់ និងលុបបំបាត់បញ្ហានេះ ឱ្យបានចាប់ពីពេលនេះតទៅ ។
នាយឧត្តមសេនីយ៍ គៀត ច័ន្ទថារិទ្ធ បញ្ជាក់បន្ថែមថា ក្រោយពីបានពិគ្រោះយោបល់ ជាមួយលោករដ្ឋមន្ត្រីក្រសួងទេសចរណ៍ អំពីការរិះរកគ្រប់វិធី ក្នុងការកាត់បន្ថយនូវរបាំងមិនចាំបាច់ នៅតាមច្រកទ្វារអន្តរជាតិ និងដោយបានទទួលការឯកភាពពីសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃរួចហើយ នៅថ្ងៃទី១ ខែមិថុនា ឆ្នាំ២០១៩ ខាងមុខនេះ ក្រសួងនឹងប្រកាសដាក់ឱ្យប្រើប្រាស់ នូវសាលកបត្រចេញចូលថ្មី ដែលមានភាពងាយស្រួល ក្នុងការបំពេញបែបបទសុំទិដ្ឋាការ ពេលភ្ញៀវទេសចរមកដល់កម្ពុជា ៕
ចែករំលែកព័តមាននេះ