រាជធានីភ្នំពេញ៖ អតីតម្ចាស់ពានរង្វាន់លំដាប់ពិភពលោក«ហ្គតថាលិន»យុវជនយឿន ពិសី មួយរយៈចុងក្រោយនេះបានចេញមុខច្រៀងវិញហើយ ។ ជាពិសេសមានបទចម្រៀងផ្ទាល់ខ្លួន ធ្វើឲ្យគេសប្បាយរីករាយ ។ យឿន ពិសី ច្រៀងពីរោះ និងចេះផ្លុំខ្លុយយ៉ាងចំណានទៀតផង ។ ទេពកោសល្យធម្មជាតិនេះគួរឲ្យសរសើរដ្បិតគេពិការភ្នែកពីកំណើត ។
កន្លងមកយឿន ពិសី ស្រមៃចង់បានបទចម្រៀងផ្ទាល់ខ្លួនព្រោះរូបគេជាម្ចាស់ពានរង្វាន់ម្នាក់ដែរ ។ បន្ទាប់ពីបានពានរង្វាន់ជាច្រើនឆ្នាំមក រូបគេមិនមានបទចម្រៀងផ្ទាល់ខ្លួនទេ ។ តាមរយៈការចង់បានរបស់ពិសីនេះ តារាចម្រៀងម្នាក់បានជួយរូបគេ ។ នោះគឺតារាចម្រៀងដួង វីរៈសិទ្ធ ។
តារាចម្រៀងដួង វីរៈសិទ្ធ បានធ្វើឲ្យអ្នកលេងហ្វេសប៊ុកជាច្រើនកោតសរសើរទឹកចិត្តរបស់លោក ក្រោយពេលលោកបានបញ្ជាក់សារមួយកាលពីពេល ថ្មីៗកន្លងមកថា «ប្អូន យឿន ពិសី ចង់មានបទចម្រៀងដែលជារបស់ខ្លួនឯងផ្ទាល់ ថ្ងៃនេះបងនឹងបំពេញបំណងប្អូន បងនឹងចំណាយពេលវេលា២ថ្ងៃពេញ ដើម្បីនិពន្ធបទថ្មី និងសម្រួលតន្ត្រីជូនប្អូនដោយក្តីស្រឡាញ់ ។ តស៊ូឡើងប្អូន…»។
បទចម្រៀងដែលលោកដួង វីរៈសិទ្ធិ បាន និពន្ធឲ្យយឿន ពិសី ដែលជាម្ចាស់ជ័យលាភីក្នុងកម្មវិធី Cambodia’s Got Talent រដូវកាលទី១ នេះ បានចេញផ្សាយកាលពីថ្ងៃទី១០ ខែឧសភា ឆ្នាំ២០១៩ ។ បទនេះមានចំណងជើងថា «ទន្សាយកំព្រា» និពន្ធទំនុកច្រៀង បទភ្លេង និង Mix And Master ដោយដួង វីរៈសិទ្ធិ។ បទនេះធ្វើឲ្យអ្នកគាំទ្រជាច្រើនពេញចិត្តខ្លាំង ព្រោះបទនេះពីរោះប៉ុណ្ណោះទេ បង្កប់ខ្លឹមសារដ៏កម្សត់ ។ បទនេះចេញផ្សាយមិនទាន់បាន១ថ្ងៃស្រួលបួលផង មានគេចែករំលែកជិត៤ពាន់ដងទៅហើយ ។
អ្នកនាងយុគ ចិន្តា ដែលបានរៀបចំឲ្យយឿន ពិសី ច្រៀងនៅលើកញ្ចក់ទូរទស្សន៍ដែរនោះបានអំពាវនាវឲ្យខាងអ្នកកាន់កម្មវិធីសិល្បៈទាំងនៅតាមទូរទស្សន៍ និងនៅតាមផេក ល្បីៗបន្តផ្តល់ឱកាសដល់យុវជនពិការភ្នែករូបនេះ ៕
ចែករំលែកព័តមាននេះ