រាជធានីភ្នំពេញ ៖ នៅក្នុងទំព័រហ្វេសប៊ុករបស់ស្ថានទូតនៃសាធារណរដ្ឋប្រជាមានិតចិនប្រចាំកម្ពុជា កាលពីយប់ថ្ងៃទី១២ ខែឧសភា បានបង្ហោះការប្រកាសរបស់ខ្លួនថា សមត្ថកិច្ចចិននឹងសហការជាមួយសមត្ថកិច្ចកម្ពុជា ដើម្បីបើកការស៊ើបអង្កេតតាមចាប់ខ្លួនបុរសមួយក្រុម ដែលសង្ស័យជាក្រុមសង្គមងងឹតចិន ដែលប្រកាសបង្កភាពវឹកវរនៅក្នុងខេត្តព្រះសីហនុ ។
ការប្រកាសរបស់ស្ថានទូតចិននេះ គឺបន្ទាប់ពីមានការបង្ហោះវីដេអូឃ្លីបមួយបង្ហាញពីបុរសចិនម្នាក់ដែលទំនងជាមេខ្លោង និងបក្សពួកសុទ្ធតែដោះអាវ និងខ្លះមានស្នាមសាក់ពេញខ្លួនផងដែរ បានស្រែកគំរាមថានឹងបង្កភាពវឹកវរនៅក្រុងកំពង់សោម(ក្រុងព្រះសីហនុ) ។ ស្ថានទូតចិនបានសុំឱ្យសមត្ថកិច្ចប្រទេសទាំងពីរ តាមចាប់ខ្លួនក្រុមពាលជនជាតិចិននេះ ។
តាមរយៈវីដេអូឃ្លីបដែលពួកគេបង្ហោះ បានស្រែកប្រកាសជាភាសាចិននិងមានបរិវារប្រមាណ១៨នាក់ លើកដៃប្តេជ្ញាបង្កបញ្ហាអសន្តិសុខនៅក្នុងខេត្តព្រះសីហនុ ។ស្ថានទូតចិន បានប្រកាសជាភាសាខ្មែរនិងភាសាចិននៅលើទំព័រហ្វេសប៊ុកផ្លូវការរបស់ខ្លួនថា ស្ថានទូតសាធារណរដ្ឋប្រជាមានិតចិនប្រចាំកម្ពុជា បង្ហាញការយកចិត្តទុកដាក់ខ្ពស់ចំពោះវីដេអូជនជាតិចិនសង្ស័យពាក់ព័ន្ធនឹងក្រុមសង្គមងងឹត ដែលត្រូវបានផ្សព្វផ្សាយតាមបណ្ដាញសង្គមក្នុងពេលថ្មីៗនេះ បុរសជាង១០នាក់ដែលហៅខ្លួនឯងជាជនជាតិចិនមកពីទីក្រុងចុងឈីង ប្រទេសចិន បានបង្ហោះវីដេអូខ្លីមួយពាក់ព័ន្ធនឹងសកមភាពក្រុមសង្គមងងឹត និយាយយ៉ាងក្អេងក្អាងថា នឹងបំពុលដល់សន្តិសុខនៅខេត្តព្រះសីហនុ។
ស្ថានទូតចិនបញ្ជាក់ថា «ស្ថានទូតចិនប្រចាំកម្ពុជា មានការយកចិត្តទុកដាក់ខ្ពស់ចំពោះបញ្ហានេះ និងបានជួយសម្របសម្រួលដល់សមត្ថកិច្ចនៃប្រទេសចិននិងកម្ពុជា ដើម្បីបើកការស៊ើបអង្កេតឲ្យបានគ្រប់ជ្រុងជ្រោយលើបញ្ហាមួយនេះ»។ ក្រោយពីបែកធ្លាយវីដេអូឃ្លីបនេះភ្លាម កាលព្រឹកថ្ងៃទី១២ ខែឧសភា ឆ្នាំ២០១៩ លោកនាយឧត្តមសេនីយ៍ នេត សាវឿន អគ្គស្នងការនគរបាលជាតិ បានបញ្ជាដាច់ខាតឲ្យតាមចាប់ខ្លួនបុរសជនជាតិចិនមួយក្រុមនេះ ដែលបានស្រែកប្រកាសខ្លាំងៗជាភាសាចិនថា «កំពង់សោម ៣ឆ្នាំក្រោយ ចង់ឲ្យវឹកវរគឺវឹកវរ ចង់ឲ្យសុវត្ថិភាព គឺសុវត្ថិភាព» ។
គេមិនទាន់អាចយល់បានទេថា តើពួកគេមានបំណងអ្វីឱ្យច្បាស់ទៅ ទើបបានជាហ៊ានប្រកាសជាចំហបែបនេះ ៕
ចែករំលែកព័តមាននេះ