កើតមកជាមនុស្សបានទាន់ព្រះពុទ្ធសាសនាគឺជាការសំណាងណាស់ ត្រូវខិតខំធ្វើអំពើល្អ បរិច្ចាកទាន រក្សាសីល ព្យាយាមចម្រើនផ្លូវចិត្តឱ្យស្ងប់រម្ងាប់ចាកគ្រឿងសៅហ្មងផងទាំងឡាយ មិនត្រូវគិតតែពីការសប្បាយក្អាក់ក្អាយ ភ្លើតភ្លើនភ្លេចទុក្ខលំបាក ហើយបណ្តោយខ្លួនឱ្យនៅតែល្ងង់អាប់ឥតប្រាជ្ញានោះឡើយ វានាំឱ្យជីវិតប្រឈមនឹងគ្រោះថ្នាក់ណាស់ ។
នៅពេលបុគ្គលធ្វើអ្វីៗទៅតាមតែចិត្តចង់ តាមតែចំណង់តណ្ហារបស់ខ្លួនឯងដែលមិនបានសិក្សាអប់រំផ្លូវចិត្ត គឺជាមូលហេតុដ៏ចម្បងនៃការគ្រោះថ្នាក់ដោយសារតែការចាញ់បោកខ្លួនឯងព្រោះបម្រើតណ្ហាងើបមុខលែងរួចនោះឯង ។
បើបុគ្គលចង់ឈ្នះខ្លួនឯងពិតប្រាកដ គប្បីជម្នះប្រឆាំងនឹងចិត្តរបស់ខ្លួនដែលចេះតែចង់បានគ្មានទីបំផុត ដើម្បីឲ្យដំណើរជីវិតឋិតនៅក្នុងផ្លូវព្រះធម៌ដែលមានទ្រឹស្តីអប់រំច្បាស់លាស់ និងមានទិសដៅជាក់លាក់សម្រាប់កសាងជីវិតដើរតាមគន្លងដ៏ត្រឹមត្រូវ។ នេះឯងជាមូលហេតុដ៏សំខាន់នៃការឈ្នះខ្លួនឯង ។
ពិតណាស់ធម្មជាតិតែងប្រព្រឹត្តទៅតាមច្បាប់របស់ធម្មជាតិ មិនប្រព្រឹត្តទៅតាមអំណាចនៃតណ្ហាឡើយ បុគ្គលលុះតាមអំណាចនៃតណ្ហា រមែងរស់នៅជាទុក្ខ ជីវិតជួបនឹងការខកចិត្តរាល់ថ្ងៃ ។
គួរចងចាំថា ខ្សែនៃតណ្ហាគឺមិនព្រមស្ថិតទៅតាមការពិតរបស់ធម្មជាតិទេ គឺតណ្ហាចេះតែចង់បានយ៉ាងនេះ ចង់បានយ៉ាងនោះ ចង់បានគ្មានទីបំផុតឡើយ គឺគ្មានទេសេចក្តីស្ងប់ជាមួយនឹងធម្មជាតិនោះ ។
ចែករំលែកព័តមាននេះ