រាជធានីភ្នំពេញ ៖ ក្រៅពីតំបន់ទេស ចរណ៍វប្បធម៌និងអេកូទេសចរណ៍ធម្មជាតិ ប្រទេសកម្ពុជាគឺនៅមានតំបន់កសិ-ទេសចរណ៍ ដែលកំពុងត្រូវបានយកចិត្តទុកដាក់ដើម្បីប្រើប្រាស់ក្នុងការទាក់ទាញភ្ញៀវទេសចរណ៍ជាតិនិងអន្តរជាតិ ថែមទៀត។ នេះបើយោងតាមការអះអាងរបស់មន្ត្រីជំនាញនៃក្រសួងទេសចរណ៍។
លោក ជុក ជំនោរ ប្រធាននាយកដ្ឋានអភិវឌ្ឍន៍នៃក្រសួងទេសចរណ៍បានថ្លែងឲ្យដឹងថាតំបន់កសិ-ទេសចរណ៍ កំពុងក្លាយជាផលិតផលទេសចរណ៍ថ្មីហើយទាក់ទាញភ្ញៀវទេសចរណ៍ជាតិនិងអន្តរជាតិយ៉ាងច្រើនគួរអោយកត់ សម្គាល់ដូចជា ចម្ការម្រេច ស្រែអំបិល និងចម្ការទុរេននៅខេត្តកំពត, ចម្ការកាហ្វេនៅតំបន់ភូមិភាគឥសាន្ត។ ក្រៅពីនោះ គឺនៅមានតំបន់ចម្ការទំពាំងបាយជូរ នៅស្រុកបាណន ស្រុករតនៈមណ្ឌល ខេត្តបាត់ដំបង ជាដើម។
លោក ជុក ជំនោរ បានថ្លែងបន្តទៀតថា បច្ចុប្បន្ននេះតំបន់កសិ-ទេសចរណ៍ខាងលើនេះកំពុងបង្ហាញសក្ដានុពលយ៉ាងខ្លាំងក្នុងការទាក់ទាញភ្ញៀវទេសចរណ៍អោយទៅកាន់តំបន់នោះ ករណីដូចជា ភ្ញៀវទេសចរណ៍ដែលទៅកាន់ខេត្តបាត់ដំបង ភាគច្រើនតែងតែទៅមើលនិងកំសាន្តលេងនៅចម្ការទំពាំងបាយជូរនៅស្រុកបាណន និងស្រុករតនៈមណ្ឌល ខណៈដែលភ្ញៀវទៅលេងខេត្តកំពត ក៏តែងតែទៅទស្សនាចម្ការម្រេច និងស្រែអំបិល ដូចគ្នា ។
ប្រធាននាយកដ្ឋានអភិវឌ្ឍន៍នៃក្រសួង ទេសចរណ៍ បានឲ្យដឹងថាដោយសារតំបន់កសិទេសចរណ៍កំពុងតែមានសក្ដានុពលក្នុងការទាក់ទាញភ្ញៀវទេសចរណ៍ ដូច្នេះហើយទើបក្រសួងទេសចរណ៍បាននឹងកំពុងជំរុញអោយម្ចាស់កសិដ្ឋានទាំងអស់នោះរៀបចំអោយមានជាហេដ្ឋារចនាសម្ព័នបន្ថែមទៀត ដើម្បីបម្រើឲ្យវិស័យទេសចរណ៍។ លោកបន្តថា ប្រសិនបើម្ចាស់កសិដ្ឋានទាំងនោះរៀបចំហេដ្ឋារចនាសម្ព័នបានត្រឹមត្រូវនោះ ភ្ញៀវទេសចរណ៍នឹងទៅកាន់កសិដ្ឋានរបស់ពួកគេកាន់តែច្រើន ហើយពួកគេនឹងប្រមូលបានផលប្រយោជន៍បន្ដែមទៀតក្រៅពីកសិផលរបស់ពួកគេ។
លោកប្រធាននាយកដ្ឋាន បានបន្ថែមថា «កន្លងមកនេះភ្ញៀវទេសចរសំខាន់ៗទាំងទេសអន្តរជាតិ បានទៅកាន់តំបន់កសិទេសចរណ៍កាន់តែច្រើនឡើងៗ ដោយបង្ហាញថាពួកគេពេញចិត្ត ឬចូលចិត្តការកំសាន្តនៅតាមតំបន់កសិទេសចរណ៍នៅកម្ពុជា។ ដូច្នេះយើងអាចនឹងទស្សន៍ទាយថា អនាគតខាងមុខតំបន់កសិទេសចរណ៍នឹងក្លាយជាតំបន់ទាក់ទាញភ្ញៀវទេសចរណ៍ដ៏មានសក្ដានុពលមិនចាញ់តំបន់អេកូរទេសចរណ៍ធម្មជាតិនោះឡើយ» ។
លោក ជុក ជំនោរ បានអះអាងថានៅពេលខាងមុខក្រសួងនឹងជំរុញនោតាមបណ្ដាខេត្តទាំងអស់រៀបចំអោយមានតំបន់កសិទេសចរណ៍ ព្រោះថាស្ទើរតែគ្រប់ខេត្តនៅកម្ពុជាយើងមានលទ្ធភាពគ្រប់គ្រាន់ក្នុងការបង្កើតតំបន់កសិទេសចរណ៍នឹងរៀបចំអោយក្លាយទៅជាផលិតផលទេសចរណ៍ថ្មី ដើម្បីទាក់ទាញភ្ញៀវទេសចរណ៍ជាតិ និងអន្តរជាតិ បង្កើតមុខរបរ បង្កើនចំណូលសម្រាប់ប្រជាពលរដ្ឋបន្ថែមទៀត។
មន្ត្រីជំនាញក្រសួងទេសចរណ៍ក៏បានថ្លែងអោយដឹងដែរថានៅចុងឆ្នាំនេះ ឬដើមឆ្នាំក្រោយក្រសួងនឹងជំរុញការផ្សព្វផ្សាយអំពីគំរោង និងសក្ដានុពលកសិទេសចរណ៍អោយបានទូលំទូលាយរួមទាំងការជួយសហការជាមួយម្ចាស់កសិដ្ឋានដើម្បីរៀបចំហេដ្ឋារចនាសម្ព័ននៅតាមកសិដ្ឋាននីមួយៗអោយមានលក្ខណៈស្តង់ដាដើម្បីទទួលភ្ញៀវទេសចរណ៍ និងបង្កើនបរិមាណភ្ញៀវទេសចរណ៍អោយកាន់តែច្រើនជាបន្តរបន្ទាប់ទៀត។
ថ្មីៗនេះលោក ថោង ខុន រដ្ឋមន្ត្រីក្រសួងទេសចរណ៍ ក៏បានទៅមើលការគ្រប់គ្រងរបស់រមណីយដ្ឋានកសិ-ទេសចរណ៍ ចំការម្រេច La Plantation នៅខេត្តកំពត និងបានទទួលស្គាល់ថាមិនទាន់មានលក្ខណៈគ្រប់ជ្រុងជ្រោយនៃស្តង់ដាររមណីយដ្ឋានកសិទេចរណ៍នោះទេ តែវាអាចយកជាមូលដ្ឋានរៀនសូត្របាន ។
លោករដ្ឋមន្ត្រីបញ្ចាក់ថាតាមការរាយ ការណ៍របស់មន្ទីរទេសចរណ៍ខេត្តកំពតឃើញថា៖១) – លើផ្នែកបច្ចេកទេសកសិកម្ម ពួកគាត់បានយកចិត្តទុកដាក់ដោយហ្មត់ចត់ នៅលើបច្ចេកទេសដាំដុះដើម្បីឆ្លើយតបទៅនឹងតម្រូវការនៃស្តង់ដារ GI -Geographical Identification ពោលគីចាប់តាំងពីគុណភាពទឹក ស្រោចស្រព ការប្រមូលផល ការវេចខ្ចប់។ល។ ២) – លើផ្នែកគ្រប់គ្រង ទេសចរណ៍ពួកគាត់ ធ្វើការគ្រប់គ្រងបានល្អ មានអ្នកគ្រប់គ្រង ខាងផ្នែកលក់ មានបដិសណ្ឋារកិច្ចល្អ មានមគ្គុទេស្ទក៍ ដែលចេះជំនាញកសិកម្ម យល់ដឹងពីដំណាំម្រេច និងមានជំនាញវិជ្ជាជីវៈមគ្គុទេស្ទក៏ច្បាស់លាស់។
្ញៀវចូល ទស្សនាចំការត្រូវបានរៀបចំជាក្រុម។មានអ្នកគ្រប់គ្រងភ្ញៀវចេញ-ចូល កត់ត្រា បានត្រឹមត្រូវ មិនចាំបាច់លក់សំបុត្រចូល ដែលនាំរំខានដល់ភ្ញៀវ។ការដាក់តាំងលក់ផលិតផល និងសេវាភេសជ្ជៈបានល្អ ប្រកបដោយវិជ្ជាជីវះ។ ៣) -ការផ្សព្វផ្សាយបានល្អ តាមរយះ website ផ្ទាល់។ ៤) – ភ្ញៀវភាគច្រើនជាភ្ញៀវអឺរ៉ុប ៦០% ជាបារាំង។ នៅខេត្តកំពត មានរមណីយដ្ឋាន កសិ-ទេសចរណ៍ចំការម្រេច មួយទៀត ក្នុងឃុំកូនសត្វ ស្រុកទឹកឈូ ដែលមានការគ្រប់គ្រងល្អស្រដៀងគ្នា។
៥) – ចំណុច ដែលនៅសេសសល់ របស់យើង គីផ្លូវទៅកាន់ទីនោះមិនទាន់បានអភិវឌ្ឍន៏ល្អ។ ក្រសួងអភិវឌ្ឍន៏ជនបទនឹងធ្វើផ្លូវក្រាលកៅស៊ូជូននៅឆ្នាំ២០២០។រីឯផ្លាកសញ្ញាចង្អុលបង្ហាញតាមដងផ្លូវក៏នៅខ្វះខាត។ នាយកដ្ឋានអភិវឌ្ឍន៍ផលិតផល ទេសចរណ៍ គួររៀចំ Farm Trip នៃមន្ទីរទេសចរណ៍ ទាំង២៥ និងផ្នែកពាក់ព័ន្ធ ទាំងផែ្នកសាធារណៈ និងផ្នែក ឯកជនទៅស្វែងយល់ និងសិក្សារៀនសូត្រនៅទីនោះ៕
ចែករំលែកព័តមាននេះ