រាជធានីភ្នំពេញ ៖ ប្រិយមិត្តនៅតែចងចាំចំពោះតារា ល្បីៗមួយចំនួន ខណៈដែលបច្ចុប្បន្នជីវិតពួកគេអាប់រស្មីទៅហើយ ។ តារាដែលកសាងស្នាដៃល្បីឈ្មោះកាលពីអំឡុងឆ្នាំ២០០០ជាង មានដូចជាអ្នកនាងសំ ប៉ូលីដា តារាកំប្លែងនាងឃ្មឹប លោកទិត្យ វិច្ឆិកា ឡេង មុនីរចនា ស៊ិន ឧត្តមផល្លា ឡាយ លក្ខិណា លោកហេង សុវណ្ណារ៉ា ឌៀប ស្រីរត្ន័ លោកលាន សូនី លោកលាន អាព្រីលគីនីន ជាដើម ។ ចំពោះតារាចម្រៀងសំ ប៉ូលីដា គឺល្បីឈ្មោះតាមរយៈចម្រៀងផ្សាយបន្តផ្ទាល់ចុងសប្តាហ៍អំឡុងឆ្នាំ១៩៩៥ និងល្បីពេលច្រៀងនៅត្រើយម្ខាង ហើយក៏បន្ថែមអាជីពកំប្លែងជាមួយនាយក្រឹម នាយកុយ ក្នុងយុទ្ឋនាការមហាសប្បាយ ។
សំ ប៉ូលីដា ល្បីខ្លាំងនៅប៉ុស្តិ៍លេខ៣ គ្រាលោកហ្វៃ សំអាង គ្រប់គ្រងនាទីកម្សាន្ត ។ ក្រោយមកបានថតរឿង«ពស់កេងកង»ជាមួយពេជ្រ ច័ន្ទបរមី ។ តារារូបនេះប្រែអាប់រស្មីក្រោយពេលជួបស្នេហាច្រើនដងបែកបាក់បន្តគ្នា ហើយធ្លាក់កូដតាំងពីជំពប់ស្នេហ៍ចុងក្រោយជាមួយលោកខ្យ៉ា ជាប៉េអឹម។ រហូតមកទល់ពេលនេះសំ ប៉ូលីដា វិលមកច្រៀងតាមហាងមួយនាត្រើយម្ខាងឈ្មោះ«តន្ត្រីជ្រោយចង្វា»ដើម្បីរកលុយចិញ្ចឹមកូនក្នុងពេលស្ថានការណ៍ឡើងច្រៀងតាមប៉ុស្តិ៍លែងមានរូបនាងទៀត ។
ចំពោះអ្នកនាងឡាយ លក្ខិណា ល្បីឈ្មោះតាំងពីវ័យ១៨ឆ្នាំអំឡុងឆ្នាំ១៩៩៩ដល់២០០៣គឺទាញបានការងារច្រើនរហូតល្បី ហើយថតចម្រៀងខារ៉ាអូខេ និងខ្សែរឿងជាច្រើន ។
ក្រោយភ្ជាប់ពាក្យជាមួយពោះម៉ាយនៅអាមេរិកមក ឡាយ លក្ខិណា បាត់មុខ ហើយគ្រប់គ្នាគិតថាជីវិតសុខសាន្ត តែបែរជាឃើញនាងក្លាយជាអាជីវករលក់ខោអាវនាផ្សារអូរឫស្សី។ រយៈពេលជិត១០ឆ្នាំឡាយ លក្ខិណាបាត់មុខ ហើយបានប្រកាសខ្លួនចូលសិល្បៈវិញដោយបានងាកមកសម្តែងនៅតាមរឿងភាគខ្មែររបស់ទូរទស្សន៍ហង្សមាស បាយ័ន ប៉ុស្តិ៍លេខ៥ ។ យ៉ាងណាមិញទីផ្សាររបស់នាងគឺឃើញថាក៏មិនត្រដែតដូចមុនឡើយ ។
ស៊ិន ឧត្តមផល្លា តារាចម្រៀងអាចច្រៀងភាសាចិនបានយ៉ាងល្អ និងភាសាអង់គ្លេសពីរោះរណ្តំក៏វិលចូលសិល្បៈវិញមួយរយៈចុងក្រោយនេះ ។ នាងល្បីឈ្មោះអំឡុងឆ្នាំ១៩៩៩រហូត២០០៣ដោយបានលោកហ្វៃ សំអាងជួយឲ្យបានសម្តែង ។ អ្នកនាងបាត់មុខដោយសារមានបញ្ហាក្នុងជីវិតឯកជន ។ យ៉ាងណាការងាររកសុីរបស់នាងខាងលក់ឧបករណ៍បុណ្យកាក់កប។ នាងពេលនេះមមាញឹកច្រៀងតាមកម្មវិធីមង្គលការជាមួយក្រុមលោកយ៉ែម សំអូន និងបានងាកមកថតកុនឲ្យស្ថានីយទូរទស្សន៍ផងដែរ ។
ឡេង មុនីរចនា អ្នកណាក៏ស្គាល់នាងដែរពីអំឡុងឆ្នាំ១៩៩៩ដល់២០០៣ក្នុងកម្មវិធីប៉ុស្តិ៍លេខ៣ ។ រចនាបានជួបស្នេហ៍មិនសមប្រកប ដោយបែបបាក់២ដងរហូតពេលនេះក្លាយជានារីមេម៉ាយ ។ មានមុខមកអាជីពសិល្បៈវិញមែន តែនាងហាក់នៅទ្រឹងមិនដូចអតីតកាលទេ ។
ក្រៅពីនេះនៅមានតារាចម្រៀងចាន់ សម័យក៏ជីវិតសិល្បៈមិនលូតលាស់ដូចមុនដែរ ។ អតីតពិធីការិនីអាណូបានចេញមុខមកវិញមួយប្រាវក៏បាត់សូន្យឈឹងវិញ ។ ចំពោះគីង សូរិយា លែងនៅអាមេរិក មកច្រៀងរាំនៅស្រុកខ្មែរវិញ តែមិនល្បីដូចមុនទេ ៕
ចែករំលែកព័តមាននេះ