រាជធានីភ្នំពេញ ៖ នៅទីបំផុត អតីតតារាសម្តែងលោក ម៉េង ប៊ុនឡូ មានលទ្ធភាពចេញទៅព្យាបាលជំងឺនៅក្នុងប្រទេសវៀតណាមហើយ បន្ទាប់ពីលោកទទួលបានជំនួយពីថ្នាក់ដឹកនាំ និងសប្បុរសជននានាជាបន្តបន្ទាប់ ក្រោយទទួលដំណឹងថា…
រាជធានីភ្នំពេញ ៖ នៅទីបំផុត អតីតតារាសម្តែងលោក ម៉េង ប៊ុនឡូ មានលទ្ធភាពចេញទៅព្យាបាលជំងឺនៅក្នុងប្រទេសវៀតណាមហើយ បន្ទាប់ពីលោកទទួលបានជំនួយពីថ្នាក់ដឹកនាំ និងសប្បុរសជននានាជាបន្តបន្ទាប់ ក្រោយទទួលដំណឹងថា លោកបានផ្ទុកជំងឺមួយអស់ជាច្រើនឆ្នាំ ។
តាមដំណឹងលោក ម៉េង ប៊ុនឡូ នឹងធ្វើការវះកាត់មួយនៅក្នុងមន្ទីរពេទ្យប្រទេសវៀតណាម បន្ទាប់ពីលោកបានផ្ទុកជំងឺមួយអស់ពេលជាច្រើនឆ្នាំ ដោយសារតែអស់លទ្ធភាពព្យាបាល ខណៈពេលស្ថានភាពជំងឺរបស់លោក ទើបតែមិត្តភក្តិក្នុងសិល្បៈម្នាក់ទម្លាយឲ្យដឹងនាពេលថ្មីៗនេះប៉ុណ្ណោះ ។
យ៉ាងណា បន្ទាប់ពីទទួលដំណឹងខាងលើនេះ លោក ម៉េង ប៊ុនឡូ ក៏ទទួលបានជំនួយជាបន្តបន្ទាប់ ដោយនៅក្នុងនោះ មានទាំងជំនួយពីសម្តេចតេជោ និងសម្តេចកិត្តិព្រឹទ្ធបណ្ឌិត ឧកញ៉ា សិល្បៈករ និងសប្បុរសជននានាទាំងក្នុងស្រុក និងក្រៅស្រុកជាបន្តបន្ទាប់ ។
ជំនួយទាំងអស់នេះ បានធ្វើឲ្យលោក ម៉េង ប៊ុនឡូ អាចមានលទ្ធភាពគ្រប់គ្រាន់សម្រាប់ព្យាបាលជំងឺរបស់លោកដែលកំពុងប្រឈមខ្លាំង ក្រោយពេលលោកមកសម្រាកព្យាបាលនៅមន្ទីរពេទ្យកាល់ម៉ែតអស់រយៈពេលប៉ុន្មានថ្ងៃមកនេះ ។
អតីតតារាសម្តែងលោក ម៉េង ប៊ុនឡូ បានប្រកាសពីការចាកចេញទៅព្យាបាលជំងឺរបស់ខ្លួននៅក្នុងប្រទេសវៀតណាម ដោយក្តីរំពឹងថា ជំងឺរបស់លោកនឹងអាចបានធូស្បើយ ក្នុងពេលដែលលោកក៏បានអរគុណដល់សប្បុរសជននានាផងដែរ ។
លោក ម៉េង ប៊ុនឡូ បានបង្ហោះសំណេរលើបណ្តាញសង្គមថា ខ្ញុំជំរាបលាបងប្អូនទាំងអស់ខ្ញុំចេញទៅព្យាបាលជំងឺនៅវៀតណាមហើយបងប្អូន សូមអរគុណដល់បងប្អូនទាំងអស់ដែលបារម្ភនិងជួយជាថវិកាដល់ខ្ញុំ ខ្ញុំនិងបានធូស្បើយពីជំងឺ អរគុណនូវទឹកចិត្តបងប្អូនទាំងអស់ ។
យ៉ាងណា បន្ទាប់ពីបានឃើញការបង្ហោះខាងលើនេះពីសំណាក់លោក ម៉េង ប៊ុនឡូ នោះគេបានឃើញមហាជន ជាពិសេស មិត្តភក្តិនៅក្នុងសិល្បៈជាច្រើនបានចូលទៅធ្វើការខំមិន ដោយម្នាក់ៗបានជូនពរទៅដល់រូបលោកឆាប់បានជាសះស្បើយ ។
គួរបញ្ជាក់ថា តារាសម្ដែង ម៉េង ប៊ុនទ្បូ បានផ្ទុកជំងឺបែកសរសៃជើងខាងឆ្វេង(សរសៃវ៉ែនរត់ទៅបេះដូង)និងរលាកបំពង់កធ្ងន់ធ្ងរ ។
លោកបានលាក់ទុកជំងឺបែកសរសៃជើងខាងឆ្វេងនេះយូរមកហើយ ដោយសារគ្មានលុយធ្វើការវះកាត់ព្យាបាល ដោយសារត្រូវចំណាយថវិការាប់ពាន់ដុល្លារ ខណៈពេលដែលវេជ្ជបណ្ឌិតធ្លាប់ព្រមានថា បើលោកមិនព្រមធ្វើការព្យាបាលសរសៃជើងឆ្វេងនេះអោយទាន់ពេលទេ លោកអាចនឹងប្រឈមមុខនឹងជំងឺគាំងបេះដូងនៅថ្ងៃមុខ ។
ទោះជាយ៉ាងណា បើទោះបីជាផ្ទុកជំងឺនេះ និងបានព្យាយាមព្យាបាលស្ទើរអស់លទ្ធភាពក៏ដោយ ប៉ុន្តែលោក ម៉េង ប៊ុនឡូ មិនបានចេញមុខលើកដៃសុំជំនួយពីសប្បុរសជនណាម្នាក់ឡើយ ទើបតែថ្មីៗនេះ ប៉ុណ្ណោះដែលតារាសម្តែងលោក សាវីន ហ្វីលីព ជាមិត្តភក្តិបានទម្លាយរឿងរ៉ាវមួយនេះ បន្ទាប់ពីឃើញលោក ម៉េង ប៊ុនឡូ ចូលសម្រាកព្យាបាលនៅក្នុងមន្ទីរពេទ្យចំថ្ងៃជាមួយលោកដែរ ៕
ចែករំលែកព័តមាននេះ