រាជធានីភ្នំពេញ ៖ ចេកអំបូងលឿងស្រស់របស់កម្ពុជាចំនួន១០០តោន ត្រូវបានរៀបចំនាំចេញទៅកាន់ប្រទេសចិនជាផ្លូវការលើកដំបូង កាលពីព្រឹកថ្ងៃទី០៩ ឧសភា ២០១៩នេះ ខណៈតម្រូវការទីផ្សារក្រៅប្រទេសក៏កំពុងមានខ្ពស់ជាពិសេសនៅប្រទេសចិនផ្ទាល់តែម្ដង ។
លោក ងិន ឆាយប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋានកសិកម្មបានអោយដឹងថា ចេកអំបូងលឿងកំពុងមានទីផ្សារខ្ពស់នៅអន្តរជាតិ ហើយកំពុងត្រៀមរៀបចំធ្វើការនាំចេញជាបន្តបន្ទាប់ ចាប់ពីពេលនេះតទៅ ។ ការនាំចេញចេកអំបូងលឿងទៅប្រទេសចិន ក៏ត្រូវមានការបំពេញបែបបទ និងឯកសារចាំបាច់សំខាន់ៗ ទាំងច្បាប់ និងបច្ចេកទេស ជាពិសេសឯកសារអនាម័យ និងភូតគាមអនាម័យ មុននឹងភាគីទាំងពីរសម្រេចចុះហត្ថលេខា ក្នុងការនាំចេកស្រស់ពីកម្ពុជា ទៅកាន់ប្រទេសចិនផងដែរ ។
លោក វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ បានមានប្រសាសន៍នៅក្នុងពិធីប្រកាសនាំចេកអំបូងចេញទៅប្រទេសចិន ថារដ្ឋាភិបាល ដែលមានក្រសួងកសិកកម្មរុក្ខប្រមាញ់និងនេសាទ ជាសេនាធិការ បានខិតខំប្រឹងប្រែង គឺធ្វើយ៉ាងណានាំកសិផល កម្ពុជាឲ្យបានចូលក្នុងទីផ្សារអន្តរជាតិ ហើយការខិតខំប្រឹងប្រែងរបស់ថ្នាក់ដឹកនាំក្រសួង អគ្គនាយកដ្ឋានកសិកម្ម និងគ្រប់ភាគីពាក់ព័ន្ធបានទទួលលទ្ធផលគួរជាទីមោទនៈ ជាក់ស្តែងគឺថ្ងៃនេះ ជាដើម ។ លោកបន្តថាពិតណាស់លទ្ធផលនេះមិនអាចកាត់ផ្តាច់បានពីកិច្ចសហប្រតិបត្តិការយ៉ាងល្អប្រសើររវាងភាគីទាំងពីរក្នុងការចរចារ ការឧបត្ថម្ភ គាំទ្រទាំងច្បាប់ និងបច្ចេកទេសពីភាគីចិនធ្វើយ៉ាងណាដើម្បីនាំផ្លែចេកស្រស់កម្ពុជាចូលទៅក្នុងទីផ្សារចិន ហើយទីបំផុតក្រសួងកសិកម្ម រុក្ខាប្រមាញ់ និងនេសាទ និងឯកឧត្តមអគ្គរដ្ឋទូត សាធារណរដ្ឋប្រជាមានិតចិន ប្រចាំនៅព្រះរាជាណាចក្រកម្ពុជា បានឈានដល់ការចុះ ពិធីសារស្តីពីការអនុញ្ញាតឲ្យកម្ពុជាអាចនាំចេកអំបូងលឿនទៅកាន់ប្រទេសចិន។
លោក វេង សាខុន បានបញ្ជាក់ឲ្យដឹងថា « ក្នុងចំណោម១០ ក្រុមហ៊ុនដែលបានដាក់ពាក្យស្នើសុំគោការណ៍អនុញ្ញាតនាំចេញផ្លែចេកអំបូងលឿងស្រស់ មានតែក្រុមហ៊ុនចំនួន០៥ មានក្រុមហ៊ុនសុវណ្ណរាជសី ឡុងស្រេងហ៊ុយជៀន ហ្គែនឡែន ហ្គ្រីនអាយឡែន និងក្រុមហ៊ុនឡងមេត ដែលគោរពបានតាមលក្ខខណ្ឌច្បាប់ និងបច្ចេកទេស ហើយអាចធ្វើការនាំចេញចេកស្រស់ទៅកាន់ទីផ្សារចិនលើកទី១ បានចំនួនជាង១០០តោននាថ្ងៃនេះ» ។ លោករដ្ឋមន្ត្រីបានបន្តឲ្យដឹងទៀតថា បើទោះបីជាមានប្រទេសមួយចំនួន បានដាក់សម្ពាធលើការនាំចេញរបស់កម្ពុជា ប៉ុន្តែសម្រាប់ការនាំចេញផលិតផលកសិកម្មរបស់កម្ពុជា នៅតែមានភាពល្អប្រសើរដដែល ជាក់ស្ដែងក្នុងត្រីមាសទី១ ឆ្នាំ ២០១៩ ការនាំចេញផលិតផលកសិកម្មជាផ្លូវការមានទំហំសរុបប្រមាណ១លាន៤សែនតោន ក្នុងរយៈពេលតែជាង២ខែ ។ នេះមិនទាន់បូកបញ្ចូលការនាំចេញក្រៅផ្លូវការទៅកាន់ប្រទេសជិតខាង ដូចជាវៀតណាម និងថៃជាដើមនៅឡើយផង ។
លោកបានបន្តថា « ការនាំចេញក្រៅផ្លូវការនៃកសិផលរបស់កម្ពុជាទៅវៀតណាម ជាពិសេសការនាំចេញស្រូវ គិតត្រឹមរយៈ២ខែ ២៣ថ្ងៃនៃដើមឆ្នាំ ២០១៩នេះ មានចំនួន ១លាន១សែន២ម៉ឺនតោន ដែលជាតួលេខមិនបានកត់ត្រាពីស្ថាប័នគយ » ។ លោកបន្តថា សម្រាប់ផលិតផលកសិកម្ម ដែលកម្ពុជាផលិតបានក្នុងឆ្នាំ ២០១៨ និង២០១៩នេះ សរុបប្រមាណ ២៧លានតោន ហើយជាក់ស្ដែងនៅតាមដងផ្លូវជាតិសំខាន់គេឃើញមានការដឹកជញ្ជូនផលិតផលកសិកម្មចេញទៅក្រៅប្រទេស និងពីបណ្ដាខេត្តមករាជធានីភ្នំពេញជាដើម ៕
ចែករំលែកព័តមាននេះ