ខេត្តតាកែវ ៖ ជនសង្ស័យជាជនជាតិចិនទាំង២នាក់ ត្រូវបានកសាងសំណុំរឿងតាមនីតិវិធី ក្រោយកម្លាំងនគរបាលស្រុកត្រាំកក់ សហការជាមួយកម្លាំងនគរបាលខេត្ត បានឃាត់ខ្លួនកាលពីវេលាម៉ោង៧ និង៣០នាទីយប់ថ្ងៃទី៧ ឧសភា ស្ថិតនៅផ្លូវបំបែក ក្នុងភូមិអង្គតាសោម ឃុំអង្គតាសោម ស្រុកត្រាំកក់ បន្ទាប់ពីពួកគេបានធ្វើសកម្មភាពប្លន់រថយន្ត១គ្រឿង ។
បើតាមលោកវរសេនីយ៍ឯក សែម សុជាតិ ឲ្យដឹងថា ជនជាតិចិនទាំង២នាក់នេះ ម្នាក់ឈ្មោះ ចាង ជីនសុីន ភេទប្រុស អាយុ៣៣ឆ្នាំ និងម្នាក់ទៀតឈ្មោះ សែវ ជីន ភេទស្រី អាយុ៣៤ឆ្នាំ ។ ពួកគេទាំង២នាក់ បានជួលរថយន្តឡិចសុីសRX៣០០មួយគ្រឿង ពាក់ផ្លាកលេខភ្នំពេញ ២P-៨៩៥៩ ពណ៌ទឹកប្រាក់ ជិះចេញពីមុខព្រលានយន្តហោះភ្នំពេញ ដែលជាកន្លែងពួកគេស្នាក់នៅ ។ លុះទៅដល់ផ្សារគុម្ពឫស្សី ឃុំតាំងដូង ស្រុកបាទី ក៏បានធ្វើសកម្មភាពយកកាំបិតភ្ជង់ជនរងគ្រោះ គំរាមប្លន់យករថយន្តខណៈកំពុងបើកបរ ។ ក្រោយមក អ្នកបើកបរដែលជាម្ចាស់រថយន្ត ប្រើល្បិចធ្វើជាចង់បត់ជើងធំ ក៏មានការប្រវាយប្រតប់គ្នា និងត្រូវជនជាតិចិននោះចាក់ឲ្យរបួស ក៏បានចេញពីរថយន្ត ។
រីឯជនសង្ស័យជាជនជាតិចិនទាំង២នាក់ បានបើករថយន្តតាមផ្លូវជាតិលេខ៣ មកដល់ផ្លូវបំបែកចំណុចខាងលើ ក៏ត្រូវកម្លាំងនគរបាលស្រុកត្រាំកក់ សហការជាមួយកម្លាំងនគរបាលខេត្តចាប់ខ្លួនបានតែម្តង ។
ចែករំលែកព័តមាននេះ