រាជធានីភ្នំពេញ ៖ រយៈពេលបីឆ្នាំទៅមុខទៀតកំណើនសេដ្ឋកិច្ចកម្ពុជាត្រូវបានព្យាករណ៍ថា នឹងនៅតែល្អប្រសើរនិងមានភាពរឹងមាំ ប៉ុន្តែក៏មានហានិភ័យមួយចំនួនផងដែរ ដែលទាមទារអោយមានការប្រុងប្រយ័ត្ន និងទប់ស្កាត់ចំពោះហានិភ័យទាំងនោះ ។ នេះបើយោងតាមការព្យាករណ៍របស់ធនាគារពិភពលោកប្រចាំកម្ពុជា (World…
រាជធានីភ្នំពេញ ៖ រយៈពេលបីឆ្នាំទៅមុខទៀតកំណើនសេដ្ឋកិច្ចកម្ពុជាត្រូវបានព្យាករណ៍ថា នឹងនៅតែល្អប្រសើរនិងមានភាពរឹងមាំ ប៉ុន្តែក៏មានហានិភ័យមួយចំនួនផងដែរ ដែលទាមទារអោយមានការប្រុងប្រយ័ត្ន និងទប់ស្កាត់ចំពោះហានិភ័យទាំងនោះ ។ នេះបើយោងតាមការព្យាករណ៍របស់ធនាគារពិភពលោកប្រចាំកម្ពុជា (World Bank)។
ការព្យាករណ៍របស់ធនាគារពិភពលោកប្រចាំកម្ពុជាបានឲ្យដឹងថា នៅឆ្នាំ ២០១៩ ឆ្នាំ ២០២០ និងឆ្នាំ ២០២១ កំណើនសេដ្ឋកិច្ចត្រូវបានព្យាករណ៍ថានឹងរឹងមាំក្នុងនោះឆ្នាំ២០១៩ មានរំពឹងមានកំណើន ៧ភាគរយ ឆ្នាំ ២០២០ រំពឹងថានឹងកើន ៦,៩ភាគរយ និងឆ្នាំ ២០២១ រំពឹងថានឹងកើនឡើង ៦,៨ភាគរយ ។ នេះជាតួលេខមួយល្អប្រសើរចំពោះកំណើនសេដ្ឋកិច្ច ដែលកម្រមានប្រទេសណាទទួលបានតួលេខនេះណាស់ ។ ការព្យាករណ៍នេះដែរ ត្រូវបានធ្វើឡើងនៅក្នុងអំឡុងខែ ឧសភា ឆ្នាំ ២០១៩នេះ ខណៈអំឡុងខែ តុលា ឆ្នាំ ២០១៨ កន្លងទៅ ធនាគារពិភពលោកបានព្យាករណ៍ថាកំណើនសេដ្ឋកិច្ច ឆ្នាំ ២០១៩ និងឆ្នា ២០២០ ប៉ាន់ស្មានត្រឹមតែ ៦,៨ភាគប៉ុណ្ណោះ ។
បើតាមលោកលី សូដេត សេដ្ឋវិទូជាន់ខ្ពស់នៃធនាគារពិភពលោកប្រចាំកម្ពុជា បានមានប្រសាសន៍ថា ការព្យាករណ៍កំណើនសេដ្ឋកិច្ចនេះ មិនទាន់គិតបញ្ចូលនូវការដកប្រព័ន្ធអនុគ្រោះពន្ធលើ «ទំនិញគ្រប់មុខ លើកលែងតែគ្រឿងសព្វាវុធ» Everything But Arms ឬហៅកាត់ថា EBA របស់សហភាពអឺរ៉ុបពីកម្ពុជានោះទេ តែយ៉ាងណាសម្រាប់ឆ្នាំ ២០១៩ នឹងមិនប្រែប្រួលទេ ដោយឡែកសម្រាប់ឆ្នាំបន្តបន្ទាប់ បើសិនជាមានការដកប្រព័ន្ធអនុគ្រោះពន្ធ នោះកំណើនសេដ្ឋកិច្ចកម្ពុជានឹងប៉ះពាល់ ហើយតួលេខក៏អាចនឹងថមថយមកវិញបន្តិចដែរ ។ លោកបន្តថា យ៉ាងណាក៏ដោយរដ្ឋាភិបាលក៏អាចទប់ស្កាត់ហានិភ័យទាំងនេះ បានមួយចំនួនផងដែរ និងអាចទប់ស្កាត់មិនអោយកំណើនសេដ្ឋកិច្ចកម្ពុជាថមថយខ្លាំង ដោយក្នុងនោះ គេឃើញរដ្ឋាភិបាលក៏បានមានវិធានការខ្លះរួចហើយ ដូចជាការកាត់បន្ថយថ្លៃដើម កាត់បន្ថយថ្លៃលើកដាក់ទំនិញ នៅកំពង់ផែស្វយ័តក្រុងព្រះសីហនុ និងកាត់បន្ថយថ្ងៃឈប់សម្រាកនៅឆ្នាំក្រោយនេះជាដើម ។ លោកថា៖« នេះជាវិធានការមួយដែលអាចធ្វើអោយថ្លៃដើមធ្លាក់ចុះ ហើយនៅពេលដែលថ្លៃដើមធ្លាក់ចុះនឹងធ្វើអោយតម្រូវការពីក្រៅប្រទេសនឹងកើនឡើងច្រើន នៅពេលនោះការនាំចេញរបស់កម្ពុជាអាចនឹងកើនឡើង បើទោះបីជា EBA ត្រូវបានដកក៏ដោយ »។
បើតាមលោក ម៉ី កល្យាណ ទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិ បានមានប្រសាសន៍ថា កម្ពុជាត្រូវធ្វើពិពិធកម្មសេដ្ឋកិច្ច ដើម្បីទប់ទល់នឹងហានិភ័យមួយចំនួនធំ ក្នុងករណីសហភាពអឺរ៉ុបដកប្រព័ន្ធអនុគ្រោះពន្ធ EBA ដោយកម្ពុជាត្រូវរកការផលិតណាដែលមានតម្លៃបន្ថែមខ្ពស់ ដើម្បីនាំចេញ និងបង្កើតឱកាសការងារដល់ប្រជាពលរដ្ឋ ។
យ៉ាងណាមិញ រដ្ឋាភិបាលកម្ពុជាក៏បានប្រកាសស្វាគមន៍វិនិយោគិនមកពីគ្រប់ទិសទី ក្នុងការបណ្ដាក់ទុនវិនិយោគនៅក្នុងប្រទេសកម្ពុជា ដើម្បីបង្កើតឱកាសការងារ និងផលិតទំនិញ សម្រាប់នាំចេញ ហើយរដ្ឋាភិបាលក៏បានប្រកាសកែប្រែនូវទម្រង់មួយចំនួន សម្រួលដល់ការបណ្ដាវិនិយោគិនទាំងនោះ ។
គួរបញ្ជាក់ថា ការប៉ាន់ស្មានរបស់ធនា គារពិភពលោកលើកំណើនសេដ្ឋកិច្ចកម្ពុជា រយៈពេលបីឆ្នាំខាងមុខនេះដោយផ្អែកថា កំណើននាំចេញនឹងកើន ៩ភាគរយក្នុងឆ្នាំ ២០១៩ កើន៨,៦ភាគរយនៅឆ្នាំ ២០២០ និង ៨,១នៅឆ្នាំ ២០២១ ។ ក្នុងនោះដែរ ធនាគារពិភពលោកក៏បានព្យាករណ៍ថា ការវិនិយោគផ្ទាល់ពីបរទេស ( FDI ) រំពឹងថានឹងកើន ១០,៤ភាគ នៅឆ្នាំ ២០១៩ ឆ្នាំ ២០២០រំពឹងថាកើន ៩,៣ភាគរយ និងកើន ៩,២ភាគរយ នៅឆ្នាំ ២០២១៕
ចែករំលែកព័តមាននេះ