ខេត្តកណ្ដាល ៖ កម្លាំងនគរបាលព្រហ្មទណ្ឌស្រុកអង្គស្នួលបានសហការជាមួយកម្លាំងនគរបាលប៉ុស្តិ៍ពើកប៉ុស្តិ៍ក្រាំងម្កាក់ និងប៉ុស្តិ៍សំរោងលើ បានធ្វើការចុះបង្ក្រាបសង្វៀនជល់មាន់មួយកន្លែង ដោយចាប់ខ្លួនបុរសអ្នកជល់មាន់បានចំនួន៤នាក់ ព្រមទាំងមាន់២ក្បាល និងដកហូតវត្ថុតាងពាក់ព័ន្ធមួយចំនួនទៀតផងដែរ ។ ប្រតិបត្តិការនោះបានធ្វើឡើង កាលពីវេលាម៉ោង១២និង៣០នាទីថ្ងៃត្រង់ថ្ងៃទី៥ ខែឧសភា ឆ្នាំ២០១៩ នៅក្នុងព្រៃឫស្សីខាងក្រោយភូមិស្វាយឧត្តម ឃុំសំរោងលើ ស្រុកអង្គស្នួល ខេត្តកណ្តាល ។
បុរសដែលជាអ្នកជល់មាន់ និងជាអ្នកទៅឈរមើលគេលេងទាំង៤នាក់នោះរួមមាន១-ឈ្មោះអឿន សំអ៊ុន អាយុ៣៤ឆ្នាំ ជនជាតិខ្មែរមុខរបរជាអ្នកជល់មាន់កម្មកររោងចក្រ ២-ឈ្មោះឈាង ភ័ក្រទ្រី អាយុ១៦ឆ្នាំ មុខរបរកសិករ ជាអ្នកជល់មាន់ ៣-ឈ្មោះមិត សំបូ អាយុ១៦ឆ្នាំ ជនជាតិខ្មែរ មុខរបរកសិករ ជាអ្នកឈរមើលគេជល់មាន់ ហើយអ្នកទាំង៣ រស់នៅក្នុងភូមិត្រពាំងឈើនាងឃុំពើក ស្រុកអង្គស្នួល ខេត្តកណ្តាល ជាអ្នកឈរមើល ។ ៤-ឈ្មោះម៉ូត ថន អាយុ៣០ឆ្នាំជនជាតិខ្មែរមុខរបរគ្រូបង្រៀននៅភូមិប្រិយបូរី ឃុំសំរោងលើ ស្រុកអង្គស្នួលខេត្តកណ្តាលជាអ្នកឈរមើល ។
នគរបាលបានឲ្យដឹងថា ការចុះបង្ក្រាប និងចាប់ខ្លួននោះ គឺជាក់ស្ដែងក្នុងខណៈពេលដែលបុរសទាំងនោះកំពុងតែជួបជុំគ្នាជល់មាន់ ដោយមានបុរសម្នាក់ទៀតឈ្មោះ ជិន ជន ជាអ្នករៀបចំឡើង និងយកតុងពីអ្នកដែលយកមាន់ទៅជល់នៅសង្វៀនខាងលើ ។ ពេលនោះត្រូវបានអ្នកភូមិរាយការណ៍ជូនកម្លាំងនគរបាលឲ្យចុះទៅបង្ក្រាប និងចាប់ខ្លួនតែម្ដង ហើយក៏បានដកហូតវត្ថុតាងមួយចំនួន រួមមានលុយរៀលចំនួន៣០ម៉ឺនរៀល និង១៧០ដុល្លារ ទូរស័ព្ទម៉ាកOPPO២គ្រឿង និងម៉ាកវីវូ១គ្រឿង ។ អង្រុតក្រុងមាន់១ និងឧបករ១ចំនួន ។
បើតាមចម្លើយសារភាពរបស់ឈ្មោះ អឿនសំអ៊ុន បានសារភាពថា ខ្លួនបានយកមាន់ទៅជល់ដាក់លុយចំនួន៤៥ម៉ឺនរៀល ហើយមាន់ខ្លួនជល់ឈ្នះទើបតែបាន១គូ ស្រាប់តែសមត្ថកិច្ចចុះទៅដល់ចាប់ខ្លួនតែម្តង ។ ហើយការជល់មាន់មានឈ្មោះជិន ជុន ជារៀបចំ និងអ្នកយកតុង ៕
ចែករំលែកព័តមាននេះ