រាជធានីភ្នំពេញ ៖ ទណ្ឌិតចំនួន២៥២នាក់ មកពីមណ្ឌលអប់រំកែប្រែចំនួន៣ បានត្រូវស្នើសុំបន្ធូរបន្ថយនិងលើកលែងទោសនៅថ្ងៃបុណ្យវិសាខបូជាឆ្នាំនេះ ។ លោក គឹម សន្តិភាព អ្នកនាំពាក្យក្រសួងយុត្តិធម៌…
រាជធានីភ្នំពេញ ៖ ទណ្ឌិតចំនួន២៥២នាក់ មកពីមណ្ឌលអប់រំកែប្រែចំនួន៣ បានត្រូវស្នើសុំបន្ធូរបន្ថយនិងលើកលែងទោសនៅថ្ងៃបុណ្យវិសាខបូជាឆ្នាំនេះ ។ លោក គឹម សន្តិភាព អ្នកនាំពាក្យក្រសួងយុត្តិធម៌ បានឲ្យដឹងនៅថ្ងៃទី៥ ខែឧសភាថា នៅវេលាម៉ោង២និង៣០នាទីរសៀលថ្ងៃទី៦ ខែ ឧសភា ក្រសួងយុត្តិធម៌នឹងបើកកិច្ចប្រជុំពិនិត្យការស្នើសុំបន្ធូរបន្ថយ និងលើកលែកទោសទណ្ឌិតសម្រាប់ថ្ងៃបុណ្យវិសាខបូជា ។លោក បន្តថា កិច្ចប្រជុំប្រារព្ធធ្វើនៅទីស្តីការក្រសួងយុត្តិធម៌ក្រោមអធិបតីភាពលោក អង្គ វង្សវឌ្ឍានា រដ្ឋមន្ត្រីក្រសួងយុត្តិធម៌ និងជាប្រធានគណៈកម្មការថ្នាក់ជាតិពិនិត្យនិងវាយតម្លៃសម្រាប់ការលើកលែងនិងបន្ធូរបន្ថយទោស ។
លោកបន្ថែមថា កិច្ចប្រជុំនេះដើម្បីពិនិត្យលើសំណើសុំអនុគ្រោះទោសរបស់គណៈកម្មការរាជធានី-ខេត្ត មកពីពន្ធនាគាររាជធានី-ខេត្តចំនួន ២២ និងមណ្ឌលអប់រំកែប្រែចំនួន៣(ម១+ម៣+ម៤) ដែលបានស្នើក្នុងឱកាសពិធីបុណ្យវិសាខបូជាឆ្នាំ ២០១៩នេះ លើបញ្ជីទណ្ឌិតដែលស្នើអនុគ្រោះទោសសរុប២៥២នាក់(ស្រី១៦នាក់) ។ សូមជម្រាបថា បើតាមអ្នកនាំពាក្យក្រសួងយុត្តិធម៌ធ្លាប់បានឲ្យដឹងថា ក្នុងក្រឹត្យច្បាប់បានកំណត់ចំពោះទណ្ឌិតដែលអាចបន្ធូរបន្ថយទោសគឺត្រូវអនុវត្តទោសនៅក្នុងពន្ធធនាគារបាន១ភាគ៣នៃ ទោសសរុបទាំងមូល និងទណ្ឌិតដែលអនុវត្តទោសបាន២ភាគ៣នៃទោសទាំងមូលនឹងត្រូវបានទទួលការលើកលែងទោស ។
កាលពីថ្ងៃបុណ្យចូលឆ្នាំថ្មីប្រពៃណីជាតិកន្លងមក ទណ្ឌិតចំនួន៤៦០នាក់មកពីពន្ធនាគាររាជធានី-ខេត្តចំនួន១៨ និងមណ្ឌលអប់រំកែប្រែចំនួន៤បានស្នើសុំបន្ធូរបន្ថយនិងលើកលែងទោស ។ ក្រោយពីពិនិត្យនិងវាយ តម្លៃរួច មានទណ្ឌិតចំនួន១៣៤នាក់ត្រូវបានលើកលែងនិងបន្ធូរបន្ថយ ទោស សម្រាប់ឱកាសបុណ្យ ចូល ឆ្នាំប្រពៃណីជាតិ ។ក្នុងចំណោមទណ្ឌិតទាំងអស់នោះ បានត្រូវស្នើបន្ថយទោស៦ខែចំនួន៥៧នាក់(ស្រី៦នាក់)ស្នើបន្ថយទោស៩ខែចំនួន១៩នាក់(ស្រី២នាក់)ស្នើបន្ថយទោស១២ខែចំនួន៤០នាក់(ស្រី១៧ នាក់) ស្នើបន្ថយទោសពីមួយជីវិតមកត្រឹម២០ឆ្នាំចំនួន២នាក់(ស្រី២នាក់) និងស្នើលើកលែងទោសចំនួន ១៦នាក់(ស្រី១នាក់)។
កាលពីថ្ងៃទី៤ ខែមេសាកន្លងមកនេះ លោកសុច សុផាន់ណារ៉ា អគ្គនាយករងនៃអគ្គនាយកដ្ឋានអយ្យការ នៃក្រសួងយុត្តិធម៌ បានប្រាប់ក្រុមអ្នកសារព័ត៌មានថា ក្នុងចំណោមទណ្ឌិតទាំងអស់នោះ គឺមានស្ត្រីដែលកំពុងជាប់ក្នុងពន្ធនាគារសរុប២.៤៤១នាក់ ក្នុងនោះស្ត្រីមានផ្ទៃពោះ៤៤នាក់ និងស្ត្រីមានកូនតាមម្តាយ១២៦នាក់ ។ទណ្ឌិតដែលត្រូវបានស្នើសុំមកគណៈកម្មការជាតិពិនិត្យនិងវាយតម្លៃ ក៏ត្រូវបានឆ្លងកាត់ការវាយតម្លៃនៅគណៈកម្មការខេត្ត ដែលដឹកនាំដោយអភិបាលខេត្ត តំណាងអយ្យការ និងស្ថាប័នពាក់ព័ន្ធជាច្រើនទៀត ៕
ចែករំលែកព័តមាននេះ