រាជធានីភ្នំពេញ ៖ បុរសម្នាក់បានស្លាប់ភ្លាមៗនៅនឹងកន្លែងកើតហេតុ និងបុរសម្នាក់ទៀតរងរបួសធ្ងន់ ក្នុងហេតុការណ៍គ្រោះថ្នាក់ចរាចរណ៍រវាងរថយន្តហ៊ីយ៉ាន់ដាយដឹកទំនិញធុនធំបុកគ្នាជាមួយម៉ូតូមួយគ្រឿងស៊ុយហ្ស៊ុយគីឡែត នៅចំណុចក្បែរស្តុបស្ពានដែក តាមបណ្តោយផ្លូវលេខ២១៧ ក្នុងសង្កាត់ស្ទឹងមានជ័យទី២ ខណ្ឌមានជ័យ កាលពីវេលាម៉ោង៤និង៤០នាទីល្ងាចថ្ងៃទី៤ ខែឧសភា ឆ្នាំ២០១៩ ។
ភាគីខាងរថយន្តម៉ាកហ៊ីយ៉ាន់ដាយ ជាប្រភេទរថយន្តដឹកទំនិញ ពណ៌ខៀវ ពាក់ស្លាកលេខ ព្រះសីហនុ ៣A-៣៤៨២ បើកបរដោយបុរសម្នាក់មិនស្គាល់អត្តសញ្ញាណ និងបុរសម្នាក់ជាព្រូ ចំនួន២នាក់ទៀត មិនស្គាល់អត្តសញ្ញាណ ។ ចំណែកភាគីខាងម៉ូតូមួយគ្រឿងជិះគ្នា២នាក់ម៉ាកស៊ុយហ្ស៊ុយគីឡែត ពណ៌ស ពាក់ស្លាកលេខ ស្វាយរៀង ១M-៩៥៧៥ បើកបរដោយបុរសម្នាក់មិនស្គាល់អត្តសញ្ញាណ និងបុរសម្នាក់ទៀតជាអ្នករួមដំណើរ មិនស្គាល់អត្តសញ្ញាណ។
តាមប្រភពព័ត៌មាននៅកន្លែងកើតហេតុបានអោយដឹងថា មុនកើតហេតុ គេឃើញបុរសរងគ្រោះទាំង២នាក់ខាងលើជិះម៉ូតូមួយគ្រឿងឌុបគ្នាធ្វើដំណើរតាមបណ្តោយផ្លូវ២១៧ ( ផ្លូវព្រះមុន្នីរ៉េត ) ក្នុងល្បឿនធម្មតា និងក្នុងទិសដៅពីត្បូងទៅជើង ។
តាមប្រភពដដែលបានបន្តថា លុះមកដល់ចំណុចកើតហេតុ ម៉ូតូជនរងគ្រោះក៏បានបើកវ៉ារ៉ឺម៉កដឹកបន្លែមួយគ្រឿង ប៉ុន្តែមិនប្រយ័ត្នក៏បណ្តាលអោយទាក់ដៃចង្កូតគ្នា ធ្វើឱ្យម៉ូតូជនរងគ្រោះដួលចូលក្រោមកង់រថយន្តម៉ាកហ៊ីយ៉ាន់ដាយដឹកទំនិញដែលកំពុងបើកបរស្របទិសដៅគ្នា បណ្តាលអោយរថយន្តកិនបុរសស្លាប់ភ្លាមៗនៅនឹងកន្លែងកើតហេតុ និងបុរសម្នាក់ទៀតរងរបួសបាក់ជើង ត្រូវបានគេបញ្ជូនទៅសង្គ្រោះនៅមន្ទីរពេទ្យ ។
ក្រោយកើតហេតុ កម្លាំងនគរបាលមូលដ្ឋាន និងនគរបាលជំនាញចុះអន្តរាគមន៍វាស់វែង អូសយកទាំងរថយន្ត និងម៉ូតូរបស់ជនរងគ្រោះទៅរក្សាទុកនៅការិយាល័យនគរបាលចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ ដើម្បីដោះស្រាយទៅតាមផ្លូវច្បាប់នៅពេលក្រោយ ។ ចំណែកអ្នកបើករថយន្តម៉ាកហ៊ីយ៉ាន់ដាយ និងព្រូ២នាក់ទៀត ក៏ត្រូវឃាត់ខ្លួនផងដែរ ។ ចំណែកសពជនរងគ្រោះត្រូវបានសមត្ថកិច្ចប្រគល់ជូនក្រុមគ្រួសារសាច់ញាតិ ដើម្បីយកទៅធ្វើបុណ្យតាមប្រពៃណី ៕
ចែករំលែកព័តមាននេះ