រាជធានីភ្នំពេញ ៖ ការបង្កហេតុធ្វើឱ្យមានការផ្អើលឆោឡានិងភ័យខ្លាចបែបនេះ គឺគេចមិនរួចពីទោសឡើយ ទោះបីជាវត្ថុក្លែងបន្លំក៏ដោយ ។ ក្រោយបុរសជនជាតិចិនម្នាក់ បានស្ពាយគ្រាប់បែកកែច្នៃក្លែងក្លាយ១កាបូបយកទៅដាក់នៅក្នុងហាងលក់គុជ ថៅកែចិនមួយកន្លែង ដែលជាហេតុបង្កឲ្យមានការផ្អើលឆោឡោយ៉ាងខ្លាំង…
រាជធានីភ្នំពេញ ៖ ការបង្កហេតុធ្វើឱ្យមានការផ្អើលឆោឡានិងភ័យខ្លាចបែបនេះ គឺគេចមិនរួចពីទោសឡើយ ទោះបីជាវត្ថុក្លែងបន្លំក៏ដោយ ។ ក្រោយបុរសជនជាតិចិនម្នាក់ បានស្ពាយគ្រាប់បែកកែច្នៃក្លែងក្លាយ១កាបូបយកទៅដាក់នៅក្នុងហាងលក់គុជ ថៅកែចិនមួយកន្លែង ដែលជាហេតុបង្កឲ្យមានការផ្អើលឆោឡោយ៉ាងខ្លាំង ព្រឹកម្សិលមិញរហូតដល់សមត្ថកិច្ចនគរបាល និងកងរាជអាវុធហត្ថចុះទៅចាប់ខ្លួនចិនរូបនោះបានភ្លាមៗ ។
ក្នុងហេតុការណ៍បង្កការភ្ញាក់ផ្អើលយ៉ាងខ្លាំង ជុំវិញព័ត៌មានបង្កៃគ្រាប់បែកនេះ បានធ្វើឲ្យប្រជាពលរដ្ឋ រងនូវការភ័យខ្លាចព្រលឹងចុងសក់គ្រប់ៗគ្នា ព្រោះភ្លាមៗនោះពុំមាននរណាម្នាក់អាចសន្និដ្ឋានបានថា គ្រាប់បែកនោះក្លែងក្លាយមែន ឬពិតប្រាកដឡើយ ។ លុះក្រោយមក សមត្ថកិច្ចខាងលើរួមជាមួយមន្ត្រីជំនាញសុីម៉ាក់ធ្វើការដោះបំបែកចេញតាមជំនាញ ទើបដឹងច្បាស់ថា ជាគ្រាប់បែកក្លែងក្លាយ ដែលជនសង្ស័យម្នាក់នោះច្នៃផលិតឡើង ក្នុងចេតនាគំរាមបុរសជនជាតិចិនម្នាក់ ដែលជាគូទំនាស់របស់ខ្លួនរួមជាមួយម្ចាស់ហាងលក់គុជនោះផងដែរ ។ តាមពិតវត្ថុដែលសង្ស័យថា ជាគ្រាប់បែកនោះ មិនមែនជាគ្រាប់បែកពិតប្រាកដនិងមិនអាចផ្ទុះបង្កគ្រោះថ្នាក់បានឡើយគឺក្លែងបន្លំ ។
ហេតុការណ៍នេះ បានកើតឡើងនៅវេលាម៉ោង៩និង៤៥នាទីព្រឹកថ្ងៃទី១ ឧសភា នៅក្នុងហាងលក់គុជចិនយីហោហឺហឺ ដែលមានទីតាំងស្ថិតនៅមុខផ្សារកាណាឌីយ៉ា តាមបណ្ដោយផ្លូវបេតុងទី៣ ក្រុមទី៣ ភូមិត្រពាំងថ្លឹង១ សង្កាត់ចោមចៅ១ ខណ្ឌពោធិសែនជ័យ ។ បុរសជនជាតិចិនដែលត្រូវចាប់ខ្លួនឈ្មោះ លីវ ជីន (LIU JUN)អាយុ៣៩ឆ្នាំ កាន់លិខិតឆ្លងដែនលេខE449081127 ។ សមត្ថកិច្ចក៏បានរឹបអូសយកបានបំពង់ក្រដាស់ចំនួន៥ដែលញាត់សុទ្ធតែដីខ្សាច់ និងនាឡិការោទិ៍១គ្រឿង ដែលជនសង្ស័យច្នៃផលិតឡើងធ្វើជាគ្រាប់បែកក្លែងក្លាយ ដើម្បីគំរាមដែលមើលទៅដូចគ្រាប់បែកច្នៃពិតៗកម្រិតម៉ោងផ្ទុះ ។ ចំណែកគូទំនាស់ឈ្មោះតឹង ភេទប្រុស អាយុប្រហាក់ប្រហែលគ្នា រីឯម្ចាស់ហាងលក់គុជយីហោហឺហឺ ឈ្មោះ ថាំង នៀន ភេទប្រុស អាយុ៥០ឆ្នាំ ក៏ទទួលរងនូវការគំរាមកំហែងនេះដែរម្នាក់ៗភ័យព្រលឹងចុងសក់ ។
តាមប្រភពនៅកន្លែងកើតហេតុបានឲ្យដឹងថា នៅវេលាម៉ោង៨និង៣០នាទីព្រឹក មុនពេលកើតមានហេតុការណ៍ភ្ញាក់ផ្អើលនេះ ជនសង្ស័យខាងលើនេះបានជិះរ៉ឺម៉កម៉ូតូ១គ្រឿងតែម្នាក់ឯង ទៅឈប់នៅមុខហាងលក់គុជនោះ ។ បន្ទាប់មក បានចុះដើរដោយស្ពាយកាបូបពណ៌ខ្មៅ១ ចូលទៅទុកនៅក្នុងហាងនោះ ម្យ៉ាងទៀតដោយសារតែនៅក្នុងកាបូបនោះ ឃើញមានវត្ថុគួរឲ្យសង្ស័យ ទើបម្ចាស់ហាងនោះរាយការណ៍ជូនសមត្ថកិច្ច ចុះទៅពិនិត្យមើលឃើញសុទ្ធតែគ្រាប់បែកច្នៃចំនួន៥គ្រាប់ ចងផ្អោបជាប់គ្នា ដោយមានការបំពាក់នាឡិកាកំណត់ម៉ោងផ្ទុះថែមទៀតផង ។ ភ្លាមៗនោះកម្លាំងសមត្ថកិច្ចចម្រុះបានឃាត់ខ្លួនជនសង្ស័យយកទៅធ្វើការសួរនាំ ដើម្បីរកមូលហេតុពីការប៉ុនប៉ងបំផ្ទុះគ្រាប់ទើបដឹងថាជាគ្រាប់បែកក្លែងក្លាយ ។
បើតាមបុរសជាម្ចាស់ហាងលក់គុជខាងលើ បាននិយាយប្រាប់សមត្ថកិច្ចថា នៅក្នុងខណៈដែលគាត់កំពុងលក់ដូរនៅក្នុងហាង ស្រាប់តែលេចមុខជនសង្ស័យដើរស្ពាយកាបូបចូលទៅ បន្ទាប់មកជននេះបានសួររកបុរសជនជាតិចិនម្នាក់ឈ្មោ តឹង ។ ភ្លាមៗនោះ គាត់បានប្រាប់ទៅជននេះវិញថា មិនបានឃើញទេ ។ គ្រាន់តែឆ្លើយបានប៉ុណ្ណឹង ស្រាប់តែជនសង្ស័យបានរូតកាបូបទាញយកគ្រាប់បែកនោះចេញមក ដែលជាហេតុធ្វើឲ្យគាត់មានការភិតភ័យយ៉ាងខ្លាំង ។ ពេលនោះ គាត់បានស្រែកឆោឡោបង្កឲ្យមានការភ្ញាក់ផ្អើលដល់អ្នកជិតខាងជួយប្ដឹងនគរបាលប៉ុស្តិ៍ឲ្យទៅចាប់ខ្លួនជននោះតែម្ដង ហើយគាត់ក៏មិនបានដឹងថាតើជនសង្ស័យមានគំនុំអ្វីជាមួយគាត់ឡើយទើបធ្វើបែបនេះ ។
ក្រោយពេលចាប់ខ្លួនជនសង្ស័យបានសារភាពប្រាប់កម្លាំងសមត្ថកិច្ចចម្រុះថា វាជាគ្រាប់បែកក្លែងក្លាយទេ ហើយខ្លួនធ្វើបែបនេះ ក៏ព្រោះតែចង់គំរាមដល់ឈ្មោះ តឹង ដែលជាគូទំនាស់ក្នុងការរកសុីជាមួយគ្នាប៉ុណ្ណោះ ហើយក៏ចង់គំរាមដល់ម្ចាស់ហាងខាងលើផងដែរ ព្រោះសង្ស័យថា បានឃុបឃិតគ្នាជាមួយឈ្មោះ តឹងប្រឆាំងខ្លួន ។ កន្លងមក ខ្លួននិងឈ្មោះ តឹង មានការខ្វែងគំនិតគ្នា ក្នុងការរកសុីតាមប្រព័ន្ធអនឡាញ ដោយខ្លួនពឹងឲ្យឈ្មោះ តឹង ជួយបង្កើតអនឡាញដើម្បីរកសុីផ្សាយជាវីដេអូរាំ-ច្រៀងតាមបែបស្រើបស្រាលផ្សេងៗ ។
ក្រោយមក ក៏មានទំនាស់គ្នា ហើយឈ្មោះ តឹងក៏បានជំពាក់លុយខ្លួនអត់ព្រមសងផងដែរ និងមិនដឹងថា ឈ្មោះតឹងនេះស្នាក់នៅទីណាឡើយ ប៉ុន្តែដឹងថាឧស្សាហ៍ឃើញចេញចូលក្នុងហាងលក់គុជនេះ ទើបខ្លួនបែកគំនិតបង្កើតគ្រាប់បែកក្លែងក្លាយយកទៅគំរាមបែបនេះតែម្ដង ។ សមត្ថកិច្ចបានឲ្យដឹងថា នេះមិនមែនជាគ្រាប់បែកពិតប្រាកដឡើយ គឺក្លែងក្លាយទេ ដោយជនសង្ស័យច្នៃក្រដាស់មូរជាបំពង់រួចញាត់ដីខ្សាច់ចូលក្នុងនោះធ្វើជារំសេវ ព្រមទាំងចងផ្អោបគ្នាជាបាច់ រួចបំពាក់នាឡិការោទិ៍កំណត់ម៉ោងផ្ទុះ ដែលមើលទៅដូចជាគ្រាប់បែកពិតៗ ។
ក្រោយពេលចាប់ខ្លួនទោះជាជននេះសារភាពថា ជាគ្រាប់បែកក្លែងក្លាយក៏ដោយ ប៉ុន្តែមិនអាចទុកចិត្តបានឡើយ កម្លាំងចម្រុះរួមមាននគរបាលដែលមានពីថ្នាក់ប៉ុស្តិ៍រដ្ឋបាល ដល់អគ្គស្នងការដ្ឋាននគរបាលជាតិ រួមជាមួយកម្លាំងកងរាជអាវុធហត្ថ ជាពិសេសមន្ត្រីសុីម៉ាក់ បានរួមគ្នាធ្វើការដោយប្រុងប្រយ័ត្នបំផុត ដោយបានដោះគ្រាប់បែកសង្ស័យនោះ តាមជំនាញច្បាស់លាស់រហូតចប់ចុងចប់ដើម ទើបដឹងថាជាគ្រាប់បែកក្លែងបន្លំ ដូចការសារភាពរបស់ជនសង្ស័យមែន ។ ជនសង្ស័យជនជាតិចិនរូបនេះត្រូវបាននាំខ្លួនទៅកាន់ផ្នែកព្រហ្មទណ្ឌនគរបាលខណ្ឌពោធិ៍សែនជ័យ ដើម្បីឃុំខ្លួនបណ្ដោះអាសន្ន រង់ចាំការសាកសួរបន្ត និងកសាងសំណុំរឿងចាត់ការតាមច្បាប់ ។
ចែករំលែកព័តមាននេះ