រាជធានីភ្នំពេញ ៖ ទីតាំងម៉ាស្សា២កន្លែង ដែលបង្កប់សេវាបម្រើផ្លូវភេទយ៉ាងពេញបន្ទុក និងគ្រប់គ្រងដោយថៅកែជនជាតិចិន ត្រូវបានកម្លាំងគណៈបញ្ជាការឯកភាពខណ្ឌពោធិ៍សែនជ័យ ស្រាវជ្រាវដឹងក៏ចុះទៅបង្ក្រាបទម្លាក់យីហោតែម្តង និងបានធ្វើការឃាត់ខ្លួនស្ត្រីកុលាប-សជនជាតិចិនចំនួន១០នាក់ ដែលមានមុខរបរជាអ្នកម៉ាស្សា និងសង្ស័យបម្រើសេវាផ្លូវភេទ…
រាជធានីភ្នំពេញ ៖ ទីតាំងម៉ាស្សា២កន្លែង ដែលបង្កប់សេវាបម្រើផ្លូវភេទយ៉ាងពេញបន្ទុក និងគ្រប់គ្រងដោយថៅកែជនជាតិចិន ត្រូវបានកម្លាំងគណៈបញ្ជាការឯកភាពខណ្ឌពោធិ៍សែនជ័យ ស្រាវជ្រាវដឹងក៏ចុះទៅបង្ក្រាបទម្លាក់យីហោតែម្តង និងបានធ្វើការឃាត់ខ្លួនស្ត្រីកុលាប-សជនជាតិចិនចំនួន១០នាក់ ដែល
មានមុខរបរជាអ្នកម៉ាស្សា និងសង្ស័យបម្រើសេវាផ្លូវភេទ នៅក្នុងទីតាំងនោះផងដែរ ។
ក្រៅពីនេះ បុរសជនជាតិចិន២នាក់ទៀត ដែលជាមេការនៅក្នុងហាងម៉ាស្សាទាំង២ខាងលើ ក៏ត្រូវបានឃាត់ខ្លួនដែរ ប៉ុន្តែអ្វីដែលគួរឲ្យស្ដាយនោះគឺស្ត្រីជនជាតិចិនម្នាក់ដែលជាថៅកែ បានរត់គេចខ្លួនបាត់ស្រមោល ។ ក្នុងការបង្ក្រាបនេះ កម្លាំងសមត្ថកិច្ចចម្រុះខាងលើបានរកឃើញស្រោមអនាម័យមិនទាន់ប្រើប្រាស់ជាច្រើនប្រអប់ព្រមទាំងស្រោមដែលប្រើរួចជាច្រើនផងដែរ ។
ការចុះបង្ក្រាបនោះបានធ្វើឡើង កាលពីវេលាម៉ោង៩ព្រឹកថ្ងៃទី៣០ មេសា នៅក្នុងហាងម៉ាស្សាយីហោអុីហុងយ៉ាន ដែលជាទីតាំងទី១ស្ថិតនៅផ្ទះលេខ14J និងទីតាំងទី២ស្ថិតនៅផ្ទះលេខ1J តាមបណ្ដោយផ្លូវលេខ113 ក្នុងភូមិព្រៃទា សង្កាត់ចោមចៅ៣ ខណ្ឌពោធិ៍សែនជ័យ ។
មន្ត្រីសមត្ថកិច្ចបាននិយាយថា ទីតាំងម៉ាស្សាទាំង២កន្លែងនេះមានថៅកែជាជនជាតិចិនឈ្មោះ ភីង អុី ភេទស្រី អាយុ៥០ឆ្នាំ ដែលកំពុងរត់គេចខ្លួន ហើយនៅលើទីតាំងនីមួយៗមានបំពាក់ស្លាកយីហោជាអក្សរចិនសុទ្ធសាធ ដោយគ្មានច្បាប់អនុញ្ញាតត្រឹមត្រូវឡើយ ។
កន្លងមកប្រជាពលរដ្ឋបានរាយការណ៍ប្រាប់ថា ហាងម៉ាស្សាយីហោអុីហុងយ៉ាន២ទីតាំងនេះ មើលពីខាងក្រៅគឺម៉ាស្សាទេ ប៉ុន្តែនៅខាងក្នុងបែរជាបម្រើសេវាផ្លូវភេទ ។ បន្ទាប់ពីទទួលបានដំណឹងនេះភ្លាម កម្លាំងបានធ្វើការស្រាវជ្រាវរហូតដឹងការពិត ទើបចុះបង្ក្រាបដោយស្ងាត់ៗ ប៉ុន្តែទីបំផុតថៅកែនៅតែដឹងខ្លួនទាន់ហើយរត់គេចខ្លួនបាត់ ។
ប្រភពដដែលបានបន្តថា ពេលចុះទៅដល់ផ្ទះលេខ1J រកឃើញស្រោមអនាម័យចំនួន៤ប្រអប់ធំ ព្រមទាំងឃាត់ខ្លួននាងៗបានចំនួន៥នាក់ និងបុរសជាមេការម្នាក់ ។ បន្ទាប់មកបានបន្តទៅផ្ទះលេខ14J រកឃើញស្រោមអនាម័យមួយចំនួនធំ និងឃាត់ខ្លួននាងៗចំនួន៥នាក់ និងបុរសជាមេការម្នាក់ ។
ប្រភពដដែលបានបន្តថា ក្រោយពីការចាប់ខ្លួន កម្លាំងបាននាំខ្លួនមនុស្សទាំង១២នាក់ ទៅកាន់សាលាខណ្ឌពោធិ៍សែនជ័យ រង់ចាំប្រគល់ជូននគរបាលនៃអធិការដ្ឋានខណ្ឌពោធិ៍សែនជ័យ ដើម្បីសាកសួរនិងកសាងសំណុំរឿងចាត់ការតាមច្បាប់ ។
មិនតែប៉ុណ្ណោះ សមត្ថកិច្ចខាងលើកំពុងធ្វើការស្រាវជ្រាវតាមចាប់ខ្លួនស្ត្រីដែលជាថៅកែទីតាំងម៉ាស្សាដែលកំពុងរត់គេចខ្លួននោះហើយ ។ ដោយឡែក ទីតាំងទាំង២នេះ ត្រូវបានសមត្ថកិច្ចទម្លាក់ស្លាកចេញនិងបិទទ្វារចោលតែម្ដង មិនអនុញ្ញាតឲ្យមានដំណើរការតទៅទៀតឡើយ ៕
ចែករំលែកព័តមាននេះ