ប្រទេសថៃ ៖ក្រុមហ៊ុនផ្តល់សេវាកម្មប្រឹក្សាយោបល់អចលនទ្រព្យ Nexus Property Marketing បានប្រាប់ដល់សារពត៌មាន Bangkok Post ថា អត្ថប្រយោជន៍ផ្នែកអចលនទ្រព្យអាចជួយជំរុញដល់តម្រូវការខុនដូថ្មីៗក្នុងទីក្រុងបាងកកប្រមាណយ៉ាងតិច ២០%ក្នុងឆ្នាំនេះ បន្ទាប់ពីទីផ្សារខុនដូជួបនឹងការអន់ថយក្នុងត្រីមាសទីពីរកន្លងមនេះ។
អ្នកស្រី Nalinrat Chareonsuphong ដែលជានាយកគ្រប់គ្រងរបស់ក្រុមហ៊ុនខាងលើបាននិយាយថា ការបង្កើតរដ្ឋាភិបាលថ្មីនឹងមិនប៉ះពាល់ដល់ទីផ្សារអចលនទ្រព្យទេ ប៉ុន្តែគោលនយោបាយផ្សេងៗដូចជាអត្ថប្រយោជន៍ផ្នែកអចលនទ្រព្យ ឬការទប់ស្កាត់ការផ្តល់ប្រាក់កម្ចីថ្មីអាចនឹងមានការប៉ះពាល់។
អ្នកស្រីបានបន្តថា “តាំងពីឆ្នាំ ២០០៦ មកប្រទេសថៃមានការផ្លាស់ប្តូរដ្ឋាភិបាលចំនួន ៥ ហើយតម្លៃអចលនទ្រព្យរវាងពីពេលមុនបោះឆ្នោតទៅក្រោយបោះឆ្នោតបន្តកើនឡើង។ ប៉ុន្តែវិធានការទប់ស្កាត់ហានិភ័យ និងអត្ថប្រយោជន៍អាចជះឥទ្ធិពលខ្លាំងលើទីផ្សារអចលនទ្រព្យ”។ អ្នកស្រីបានបន្ថែមថា ប្រសិនបើរដ្ឋាភិបាលបច្ចុប្បន្នប្រើប្រាស់ការអនុគ្រោះពន្ធអចលនទ្រព្យដើម្បីជំរុញដល់សេដ្ឋកិច្ចនិងវិស័យអចលនទ្រព្យក្នុងឆមាសទីពីរនោះ ទីក្រុងបាងកកអាចនឹងមានខុនដូប្រមាណ១០,០០០ទៅ ២០,០០០ យូនីតបន្ថែមទៀតដែលត្រូវបានលក់ចេញក្នុងមួយឆ្នាំ។
យោងទៅតាម Nexus បានឲ្យដឹងថា តម្លៃខុនដូថ្មីៗជាមធ្យមដែលត្រូវបានលក់ចេញក្នុងត្រីមាសទី១ បានធ្លាក់ចុះ ១%ពី៤៤០០ដុល្លារក្នុងមួយម៉ែត្រការេកាលពីត្រីមាសទី ៤ ឆ្នាំមុនមកស្មើប្រមាណ៤៣០០ដុល្លារក្នុងមួយម៉ែត្រការេព្រោះខុនដូថ្មីៗដែលត្រូវបានដាក់លក់លើទីផ្សារមានទីតាំងនៅជាយក្រុង។ អ្នកស្រីបានបន្ថែមថា អត្រាទិញខុនដូថ្មីៗដែលត្រូវបានដាក់លក់នៅត្រីមាសទី១មានការអន់ថយមកស្មើពី ៥០ទៅ៦០% ព្រោះក្រុមហ៊ុនអចលនទ្រព្យផ្តោតសំខាន់លើការលក់ខុនដូដែលមានក្នុងស្តុកនិងសម្រេចការសាងសង់អស់សិន។អ្នកស្រីបានឲ្យដឹងទៀតថា ខុនដូដែលមានតម្លៃមធ្យមនឹងបន្តលូតលាស់ព្រោះតម្រូវការនឹងបន្តជំរុញដល់ទីផ្សារ។ ក្នុងផ្នែកខុនដូតម្លៃខ្ពស់វិញ ក្រុមហ៊ុនអចលនទ្រព្យគួរតែមានការប្រុងប្រយ័ត្នព្រោះវិនិយោគិនក្នុងតំបន់នេះនឹងមានការធ្លាក់ចុះ៕
ចែករំលែកព័តមាននេះ